Al-lisaan
3
Ya akhwaani,
khalli katiiriin minku ma yabgo muʼallimiin achaan taʼarfu kadar Allah yihaasibna aniina al-muʼallimiin chadiid min al-naas al-aakhariin.
2 Ayyi waahid minnina yakhta katiir.
Kan naadum abadan ma yakhta fi kalaamah,
hu da naadum kaamil wa hu da yagdar fi nafsah.
3 Fakkuru fi l-lijaam al-nidissuuh fi khachum al-juwaad.
Al-lijaam sakhayyir laakin be sababah al-juwaad yamchi fi ayyi bakaan al-nidooruuh.
4 Wa fakkuru battaan fi l-safiina.
Hi kabiire bilheen wa riih chadiide tilizzaha giddaam wa laakin hadiid sakhayyar bas yiwaddiiha fi l-bakaan al-sawwaagha bidoorah.
5 Wa chiifu al-lisaan hu kula sakhayyar wa laakin yisabbib cheyy kabiir.
Wa battaan fakkuru fi l-naar.
Naar sakhayre bas tiharrig kulla l-kadaade.
6 Wa l-lisaan al-gaaʼid fi jilidna,
hu kula misil al-naar achaan beyah nuguulu kalaam fasil wa kalaam fasil yinajjis jilidna kulla ke.
Wa naar al-lisaan di taakul hayaatna min awwal lahaddi l-akhiir.
Wa l-naar di jaaye min naar Jahannam zaatah.
7 Wa l-insaan yagdar yidallilhum le l-haywaanaat kan min al-tuyuur walla khumaam al-bahar walla khumaam al-kadaade.
Wa dallalaahum khalaas.
8 Wa laakin ma fi naadum yagdar yidallil lisaanah.
Al-lisaan hu cheyy fasil al-ma yagood saakit wa malaan be l-samm al-baktul.
9 Beyah hu,
nachkuru Allah Abuuna wa beyah hu battaan,
nanʼalo al-naas al-Allah khalagaahum fi suurtah.
10 Be khachum al-waahid bas nibaaruku wa niʼayyuru beyah.
Ya akhwaani,
khalli ma yabga misil da.
11 Hal fi biir waahide nalgo almi halu wa almi murr ?
12 Ya akhwaani,
chadarat al-tiin abadan ma talda zaytuun wa chadarat al-inab abadan ma talda tiin.
Wa abadan ma nagdaro namurgu almi halu min biir al-indaha almi murr.
Al-ilim al-sahiih
13 Yaatu minku aalim wa faahim ?
Khalli yiwassif ilmah be haalah al-samhe wa khalli yisawwi amal al-kheer be nafas baarid al-yaji min al-ilim al-sahiih.
14 Laakin kan induku fi guluubku husud chadiid wa adaawa,
ma tifaachuru be ilimku achaan be l-sahiih fachaarku da kidib fi kalaam al-hagg.
15 Ilimku da ma min Allah laakin hu ilim al-dunya wa marag min fikir al-bachar wa min Ibliis.
16 Fi ayyi bakaan kan al-husud wa l-istikbaar gaaʼidiin foogah,
al-barjaal kula gaaʼid wa battaan kulla cheyy al-fasil.
17 Laakin al-ilim al-min Allah awwalan ke saafi wa l-naadum al-indah yiriid al-salaam wa kalaamah baarid wa raasah ma gawi wa hu hanuun wa yisawwi amal al-kheer wa hu ma indah tafrikha wa la nifaakh.
18 Wa kan al-naas yakhdumu be l-salaam wa yisawwu al-salaam ambeenaathum,
al-haal al-saalhe tabga.