Agoodu saabtiin fi l-hurriiye
5
Al-Masiih sawwaana naas hurriin achaan niʼiichu fi l-hurriiye.
Agoodu saabtiin fi l-hurriiye wa aabo ma tabgo battaan abiid.
2 Fukku adaanku.
Ana Buulus nuguul leeku kan tikhalluuhum yitahhuruuku,
barakat al-Masiih ma tanfaʼ leeku bat.
3 Nachhad leeku battaan kadar ayyi naadum al-yikhalli nafsah yitahhuruuh be tahuurat al-Tawraat,
waajib leyah yitabbig churuut al-Tawraat kulluhum ke.
4 Intu al-tidooru tabgo saalihiin be tabbigiin churuut al-Tawraat dool,
anfaragtu marra waahid min al-Masiih wa khalleetu minku niʼmat Allah.
5 Laakin be gudrat al-Ruuh al-Khudduus,
aniina nukhuttu achamna fi Allah al-yisawwiina saalihiin be sabab iimaanna.
6 Achaan fi derib al-Masiih Isa,
kan naadum mutahhar walla ma mutahhar,
da ma bisawwi cheyy.
Al-cheyy al-waajib hu al-iimaan be l-Masiih wa l-mahabba al-jaaye min al-iimaan da.
7 Badeetu adiil fi derib al-Masiih.
Kikkeef khalleetu naadum yamrugku min al-derib ?
8 Al-kalaam da ma jaayi min Allah al-gaaʼid yinaadiiku.
9 Angarʼu !
Tawwaara chiyya bas takfi le tigawwim al-ajiine kullaha ke.
10 Laakin al-Rabb antaani damaan leeku wa naʼarif kadar intu ma takhbalo fikir chig min fikirna.
Wa l-naadum al-gaaʼid yibarjilku da,
al-hukum yaji foogah kan yabga yaatu kula.
11 Ya akhwaani,
kan ana zaati gaaʼid niʼallim al-naas kadar al-tahuura waajbe,
maala al-Yahuud gaaʼidiin yitaʼʼubuuni ?
Kan sahiih ana gaaʼid nuguul kalaam misil da,
bichaarat al-saliib ma tizaʼʼilhum battaan.
12 Al-naas al-gaaʼidiin yibarjuluuku dool,
nitmanna kadar yikhassu nufuushum marra waahid.
Derib al-Ruuh al-Khudduus
13 Ya akhwaani,
Allah naadaaku achaan yidoor intu tiʼiichu fi l-hurriiye.
Laakin ma tisawwu al-hurriiye di fursa le titaabuʼu chahwaatku al-fasliin.
Akheer takhdumu le akhwaanku be l-mahabba.
14 Achaan kulla churuut al-Tawraat zibdithum tinlagi fi wasiiye waahide wa hi <Hibb akhuuk misil tihibb nafsak>.
15 Laakin kan tilkhaalafo ambeenaatku wa tiddaawaso misil kulaab,
khalaas fi l-akhiir tilʼaakalo marra waahid.
16 Nuguul leeku taabuʼu Allah be derib al-Ruuh al-Khudduus wa misil da ma titaabuʼu chahwaatku al-fasliin.
17 Achaan al-cheyy al-galib al-bachar yiriidah chig min al-cheyy al-yiriidah al-Ruuh al-Khudduus.
Wa l-cheyy al-yiriidah al-Ruuh al-Khudduus chig min al-cheyy al-galib al-bachar yiriidah.
Al-itneen dool yiddaawaso ambeenaathum achaan yadharooku min al-cheyy al-tidooru tisawwuuh.
18 Wa kan al-Ruuh al-Khudduus gaaʼid yuguudku,
intu ma abiid tihit churuut al-Tawraat.
19 Wa khalaas,
al-zunuub al-yaju min galib al-bachar maʼruufiin.
Humman al-zina wa l-khabaasa wa l-fasaad
20 wa ibaadat al-asnaam wa l-sihir wa l-huraaj wa l-duwaas wa l-husud wa l-khabiine wa l-khilaaf wa l-mukhaasamaat wa l-tafrikha
21 wa l-tamaʼ wa l-sakar wa l-safaaha wa cheyy aakhar misil da.
Nuguul leeku misil awwal gultah leeku,
al-naas al-yisawwu al-achya dool ma yawrusu cheyy fi mamlakat Allah.
22 Laakin misil al-chadar yalda iyaal,
al-Ruuh al-Khudduus yiwallid fi l-naas al-mahabba wa l-farah wa l-salaam wa l-sabur wa l-galib al-abyad wa l-karam wa l-amaana
23 wa l-nafas al-baarid wa sabbitiin al-nafs.
Al-achya dool ma fi chart waahid didduhum.
24 Wa l-naas al-bigo naas hana l-Masiih Isa khatto chahwaathum al-fasliin fi l-saliib wa kataloohum.
25 Wa kan niʼiichu be gudrat al-Ruuh al-Khudduus,
waajib nikhallu al-Ruuh al-Khudduus yuguudna fi l-derib.
26 Khalliina ma nistakbaro wa la nizzaaʼalo ambeenaatna wa la nilhaasado.