Masal al-wariis
4
Walla be kalaam aakhar,
kan wileed waras maal katiir wa hu lissaaʼ ma aagil,
hu misil abid bas.
2 Laazim yitaabiʼ kalaam al-masaaʼiil al-gaaʼidiin yirabbuuh wa l-muwakkaliin be maalah lahaddi l-wakit al-abuuh gataʼah leyah.
3 Wa awwal bigi misil da leena aniina al-Yahuud.
Awwal aniina misil al-naas al-ma aagliin wa aaychiin misil al-abiid tihit al-gawaaniin al-bukhussu khumaam al-dunya di.
4 Laakin al-wakit tamma khalaas wa Allah rassal Ibnah fi l-dunya.
Hu mawluud min mara wa rabbooh tihit gawaaniin al-Tawraat
5 achaan yafda al-naas al-tihit gawaaniin al-Tawraat.
Wa khalaas,
ligiina beyah al-huguug al-waajbe le iyaal Allah.
6 Wa intu kula bigiitu iyaalah wa achaan da Allah nazzal fi guluubna Ruuh hana Ibnah al-yasrakh «
Abba,
Abuuna ! ».
7 Wa khalaas,
inta ma abid misil awwal.
Bigiit wileed Allah wa kan inta wileedah,
Allah jaʼalak wariisah.
8 Fi l-wakit al-faat,
ma iriftu Allah wa intu abiid le l-ilaahaat al-ma ilaahaat be l-sahiih.
9 Laakin hassaʼ dakhaltu fi alaakha maʼa Allah,
walla akheer nuguul Allah dakhkhalaaku fi alaakha maʼaayah.
Wa kan ke da,
maala tidooru tigabbulu titaabuʼu battaan al-gawaaniin al-ma induhum gudra wa la faayde wa bukhussu khumaam al-dunya bas ?
Maala tidooru tabgo battaan abiid ?
10 Haay !
Intu gaaʼidiin tukhuttu fikirku fi l-ayyaam wa l-chuhuur wa l-fusuul wa l-siniin !
11 Haalitku di hayyaratni bilheen.
Akuun al-taʼab al-tiʼibtah foogku macha fi riih saakit.
12 Ya akhwaani,
awwal ana bigiit misilku intu al-ma Yahuud.
Hassaʼ nachhadku,
abgo misli ana.
Awwal ma sawweetu leyi cheyy fasil.
13 Be l-aks,
taʼarfu kadar wakit awwal marra ana bachchartuku,
ana haass be jildi wa achaan da bas wigift maʼaaku.
14 Wa taʼabi da bigi leeku gaasi laakin be da kula ma hagartuuni wa la taradtuuni.
La,
intu dayyaftuuni misil ana malak Allah walla misil ana al-Masiih Isa zaatah.
15 Ween al-farha al-awwal induku ?
Nachhad leeku kadar fi l-wakit daak,
kan induku gudra achaan tamurgu uyuunku,
tawwaali ke tamurguuhum tantuuhum leyi.
16 Wa hassaʼ da,
ana bigiit aduuku achaan ooreetku al-hagg walla ?
17 Al-naas al-yidooru yijiibuuku fi deribhum dool yakhdumu ambeenaatku be niiye waahide laakin niiyithum ma adiile.
Yidooru yifaaruguuku minnina.
Wa yidooru intu tugummu titaabuʼuuhum wiheedhum be niiye waahide.
18 Wa kan niiyitku chadiide,
da sameh kan al-sabab sameh.
Wa da sameh kan niiyitku chadiide daayman wa ma wakit ana maʼaaku bas.
19 Ya iyaali al-nihibbuku,
ana bigiit misil amm al-iyaal al-gaaʼide taldaaku marra taaniye.
Gaaʼid natʼab fi l-talaga lahaddi tabgo saabtiin fi l-Masiih.
20 Nitmanna kadar nagdar nukuun maʼaaku wa nihajji leeku be hiss baarid.
Laakin ana baʼiid minku wa ana alhayyart minku.
Masal fi Haagar wa Saara
21 Intu al-tidooru titaabuʼu churuut al-Tawraat,
ooruuni cheyy waahid.
Intu ma simiʼtu al-kalaam al-maktuub fi l-Tawraat walla ?
22 Al-Kitaab buguul Ibraahiim indah awlaad itneen*.
Al-waahid hu wileed Haagar al-khaadum wa l-aakhar hu wileed Saara al-hurra.
23 Wileed al-khaadum da,
wildooh be l-waaluuda al-aadiiye wa laakin al-wileed al-aakhar waaluudtah bigat hasab waʼad Allah.
24 Wa l-kalaam da masal leena.
Al-awiin al-itneen dool yiwassufuuna muʼaahadaat itneen been Allah wa been al-naas.
Al-awwalaaniiye hi al-muʼaahada al-Allah sawwaaha fi Jabal Siinaaʼ*.
Wa hi talda naas fi l-ubuudiiye.
Wa di Haagar al-khaadum.
25 Haagar wa Jabal Siinaaʼ al-fi daar al-Arab yiwassufuuna Madiinat al-Khudus aasimat al-Yahuud al-gaaʼide fi l-dunya.
Achaan al-madiina wa naasha gaaʼidiin fi l-ubuudiiye tihit churuut al-Tawraat.
26 Laakin Madiinat al-Khudus al-gaaʼide foog maʼa Allah hi hurra wa hi bas ammina.
27 Wa maktuub fi l-Kitaab <Ya l-mara al-aagre al-ma talde,
afrahi.
Inti al-wajaʼ al-talge ma lihigki,
zakhriti be hiss foog.
Achaan iyaal al-mara al-raajilha khallaaha yabgo katiiriin min iyaal al-mara al-gaaʼide maʼa l-raajil>.
28 Wa khalaas ya akhwaani,
intu bigiitu misil Ishaakh achaan bigiitu iyaal Allah be waʼad Allah.
29 Laakin fi zaman Ibraahiim,
al-wileed al-wildooh be l-waaluuda al-aadiiye gamma yitaʼʼib al-wileed al-wildooh be gudrat al-Ruuh al-Khudduus wa bigi misil da fi zamanna kula.
30 Laakin al-Kitaab buguul chunu ?
Buguul <Atrud al-khaadum wa wileedha.
Achaan wileed al-khaadum ma yawris cheyy maʼa wileed al-hurra>.
31 Wa be misil da ya akhwaani,
aniina ma iyaal al-khaadum.
Aniina iyaal al-hurra.