Al-masʼuuliiye al-akhawiiye
6
Ya akhwaani,
kan waahid minku wagaʼ fi zanib,
waajib intu al-gawiiyiin be gudrat al-Ruuh al-Khudduus tikhattumu leyah be nafas baarid wa tigabbuluuh fi l-derib al-adiil.
Wa fakkuru le nufuusku achaan al-zanib ma yinnasir foogku intu kula.
2 Wa fi wakit al-taʼab,
assaaʼado ambeenaatku.
Wa misil da,
titabbugu churuut al-Masiih.
3 Wa kan naadum sawwa nafsah aali min akhwaanah lahaddi ma yisaaʼidhum,
be l-sahiih hu ma bisaawi cheyy wa khachcha nafsah.
4 Khalli ayyi waahid yijarrib al-khidme al-hu zaatah yisawwiiha le l-Rabb wa misil da,
hu yafrah min khidimtah wa ma yichiif khidme hana naadum aakhar.
5 Achaan ayyi waahid masʼuul fi nafsah.
6 Kan naadum gaaʼid yiʼallimku kalaam Allah,
waajib tantuuh min al-maal al-induku.
7 Ma tukhuchchu nufuusku.
Allah ma yinkhachcha.
Al-cheyy al-naadum yiteeribah,
da bas al-yugumm leyah.
8 Kan naadum yitaabiʼ chahwaatah al-fasliin,
hu yalga min chahwaatah al-halaak.
Wa kan naadum yitaabiʼ al-Ruuh al-Khudduus,
khalaas hu yalga min al-Ruuh al-Khudduus al-haya al-abadiiye.
9 Achaan da,
khalli nisawwu al-kheer daayman wa abadan ma naksalo minnah.
Baʼadeen kan ma kisilna,
nalgo minnah faayde.
10 Wa achaan da,
fi ayyi wakit indina fursa,
khalli nisawwu al-kheer le kulla l-naas wa khaassatan le ahal al-iimaan.
Nihaayat al-jawaab
11 Chiifu al-huruuf al-kubaar dool.
Ana chilt al-galam wa ana zaati naktib al-kalaam da.
12 Al-naas al-yidooru yisawwu al-tahuura fard leeku,
humman yidooru rida min al-naas bas.
Yidooru al-Yahuud ma yitaʼʼubuuhum battaan be sabab bichaarat moot al-Masiih fi l-saliib.
13 Wa l-naas al-mutahhariin zaathum ma yitabbugu kulla churuut al-Tawraat laakin yidooru yitahhuruuku achaan yifaachuru le l-naas be jilidku al-mutahhar.
14 Wa kan leyi ana,
abadan ma nidoor nifaachir le l-naas be ayyi cheyy,
illa be saliib hana Rabbina Isa al-Masiih.
Wa l-saliib da katal leyi rida hana naas al-dunya wa beyah ana bigiit le naas al-dunya misil naadum mayyit.
15 Achaan kan naadum mutahhar walla ma mutahhar,
da ma bisawwi cheyy.
Al-cheyy al-muhimm,
ayyi naadum waajib yadkhul fi l-haya al-jadiide.
16 Al-salaam wa l-rahma le kulla l-naas al-yitaabuʼu al-wasiiye di.
Humman bas ummat Allah.
17 Khalaas,
khalli naadum waahid minku ma yibachtinni battaan achaan indi alam fi jildi min zaʼal al-naas wa di al-alaama al-tiwassif ana abid hana Isa be l-sahiih.
18 Ya akhwaani,
aleekum niʼmat Rabbina Isa al-Masiih.
Aamiin.