2
Wa ana chilt niiye achaan ma nuzuurku battaan le nisabbib leeku muchkila.
2 Achaan kan ana bigiit leeku sabab hana muchkila,
yaatu al-yifarrihni balaaku ?
Illa intu al-ana sabbabt leeku al-muchkila.
3 Wa l-kalaam al-katabtah yoom daak fi l-jawaab,
katabtah achaan wakit najiiku al-naas al-waajib yifarruhuuni ma yabgo leyi sabab muchkila.
Achaan ana muʼakkid kadar kan ana nabga farhaan,
intu kula tabgo farhaaniin.
4 Wa katabtah leeku be galib haznaan chadiid wa mudayyig wa ana gaaʼid nabki katiir.
Wa ma dawwart nisabbib leeku muchkila laakin dawwart niwassifku kadar nihibbuku.
Al-musaamaha
5 Ana ma nidoor nikabbir al-kalaam.
Al-naadum sabbab al-muchkila di ma leyi ana laakin hu sabbab muchkila leeku intu kulluku.
6 Katiiriin minku harajooh wa khalaas,
da yakfi leyah.
7 Wa hassaʼ da,
waajib tisaamuhuuh wa tichajjuʼuuh achaan tikhaffufu leyah nadaamtah al-chadiide.
8 Wa achaan da,
niwassiiku.
Wassufu leyah battaan mahabbitku.
9 Wa awwal kula,
ana katabt leeku jawaab achaan nijarribku wa achaan naʼarif kan titaabuʼu kalaam Allah fi kulla cheyy.
10 Wa ayyi naadum al-intu tisaamuhuuh,
ana kula nisaamihah.
Wa ayyi khata al-ana saamahtah le ayyi naadum,
kan sahiih khata fi wa waajib leyah al-musaamaha,
ana saamahtah fi chaanku giddaam al-Masiih.
11 Wa saamahtah achaan al-Cheetaan ma yinnasir foogna.
Achaan aniina naʼarfu niiyit al-Cheetaan.
Irfat Allah misil riihe halwa
12 Wa macheet fi hillit Turuwaas achaan niballikh bichaarat al-Masiih.
Wa wakit wisilt,
Rabbina fatah leyi al-baab achaan nibachchir.
13 Laakin galbi muʼallag bilheen achaan akhuui Tiitus al-waajib yaji giddaami min bakaanku ana ma ligiitah.
Wa achaan da bas,
gammeet min al-akhwaan al-fi Turuwaas wa macheet fi Magiduuniya.
14 Wa l-hamdulillah.
Allah gaaʼid daayman yuguudna giddaam be l-Masiih.
Wa l-Masiih misil malik kabiir al-annasar foog udwaanah wa jaayi mugabbil min al-harb be farha.
Wa fi ayyi bakaan hu yiwazziʼ beena irfat Allah al-misil riihe halwa.
15 Wa aniina misil al-bakhuur al-gaaʼid yigaddimah al-Masiih le Allah.
Wa l-naas al-gaaʼidiin yanjo yuchummu riihtah wa l-naas al-gaaʼidiin yahlako kula yuchummu riihtah.
16 Wa le l-naas al-yahlako,
hi riihit al-moot al-tiwaddiihum le l-moot.
Wa le l-naas al-yanjo,
hi riihit al-haya al-tiwaddiihum fi l-haya.
Wa ma fi insaan yagdar le l-khidme al-misil di.
17 Naas katiiriin gaaʼidiin yikhalbutu kalaam Allah wa yitaajuru beyah wa aniina ma misilhum.
Aniina nikallumu be niiye mukhlisa.
Aniina naas al-Masiih wa Allah rassalaana wa giddaam Allah nikallumu le l-naas.