Buʼaas al-Masiih
15
Ya akhwaani,
nidoor nifakkirku be bichaarat al-Masiih al-ballakhtaha leeku.
Al-bichaara di intu khibiltuuha wa be sababha bas intu muʼminiin.
2 Wa be l-bichaara di tanjo kan takurbu gawi al-kalaam al-ballakhtah leeku.
Wa kan al-kalaam da ma sahiih,
iimaanku baatil.
3 Wa l-kalaam al-muhimm gubbaal kulla cheyy al-ana allamtah leeku al-ana kula allamooni leyah,
daahu.
Al-Masiih maat fi chaan zunuubna misil maktuub fi l-Kitaab laabudda yabga.
4 Wa hu dafanooh wa Allah baʼasah fi l-yoom al-taalit misil maktuub fi l-Kitaab laabudda yabga.
5 Wa hu baan le Butrus wa baʼad da baan le l-rusul al-atnaachar.
6 Wa yoom aakhar,
hu baan fi bakaan waahid le khumsumiya naas min al-muʼminiin.
Wa l-naas dool waahidiin minhum maato laakin katiiriin minhum lissaaʼhum hayyiin.
7 Wa baʼad da,
baan le Yaakhuub wa le kulla l-rusul.
8 Wa baʼad al-Masiih baan le kulla l-naas dool,
fi l-akhiir baan leyi ana al-misil al-sakhiir al-wildooh fi wakit ma waktah.
9 Wa min kulla l-rusul,
ana bas sakhayyarhum lahaddi ma waajib yinaaduuni rasuul kula achaan awwal ana taʼʼabt ummat al-Masiih al-Allah ikhtaarha.
10 Laakin hassaʼ ana rasuul achaan Allah antaani niʼma wa niʼmatah al-gaaʼide foogi di abadan ma fachalat.
Wa akiid ma fachalat fi chaan ana khadamt khidme ziyaada minhum kulluhum.
Wa be l-sahiih,
al-khadam adiil ma ana laakin niʼmat Allah al-gaaʼide foogi hi bas al-khadamat.
11 Wa kan simiʼtu al-bichaara minni ana walla min al-rusul al-aakhariin,
ma fi farig.
Kullina niballukhu nafs al-kalaam wa khalaas,
be sababah intu aamantu.
Buʼaas al-maytiin
12 Wa kan kullina niballukhu kadar Allah baʼas al-Masiih min ust al-maytiin,
kikkeef waahidiin minku buguulu al-maytiin ma yabʼaso ?
13 Kan buʼaas al-maytiin ma yabga,
al-Masiih kula ma baʼas.
14 Wa kan al-Masiih ma baʼas,
ballakhna kalaam ma indah faayde wa iimaanku baatil.
15 Wa fi l-bakaan da,
aniina gaaʼidiin nakdubu fi Allah achaan chihidna gulna Allah baʼas al-Masiih.
Wa da ma yabga sahiih kan al-maytiin ma yabʼaso.
16 Achaan kan al-maytiin ma yabʼaso,
khalaas al-Masiih kula ma baʼas.
17 Wa kan al-Masiih ma baʼas,
iimaanku baatil wa intu gaaʼidiin be zunuubku.
18 Wa be da,
al-muʼminiin be l-Masiih al-maato waddaro saakit.
19 Wa kan al-giyaama ma fiiha wa khatteena achamna fi l-Masiih fi chaan al-dunya bas,
haalitna gaasiye marra waahid min kulla l-naas.
Al-Masiih wa l-giyaama
20 Laakin be l-sahiih,
Allah baʼas al-Masiih wa l-Masiih bas Bikir al-Maytiin,
maʼanaatah hu awwal naadum al-baʼas min ust al-maytiin.
21 Wa misil al-moot ja foog al-naas be sabab naadum waahid,
al-buʼaas kula ja be sabab naadum waahid.
22 Kulla iyaal Adam yumuutu wa kulla naas al-Masiih yabʼaso.
23 Laakin ayyi naadum yabʼas hasab bakaanah fi nizaam Allah.
Awwal,
al-Bikir baʼas wa hu al-Masiih.
Wa baʼadeen,
fi yoom jaytah,
kulla naas hana l-Masiih yabʼaso.
24 Wa da bas al-wakit al-akhiir.
Wa l-Masiih yidammir gudra hana ayyi raʼiis wa sultaan wa haakim wa khalaas yisallim al-mamlaka le Abuuh Allah.
25 Wa laabudda al-Masiih yamluk lahaddi Allah yukhutt kulla udwaanah tihit rijileenah.
26 Wa aakhir adu al-yidammirah,
hu al-moot.
27 Achaan maktuub fi l-Kitaab <Allah khatta kulla cheyy tihit rijileenah>.
Wa naʼarfu kadar Allah ma khatta nafsah tihit rijileen al-Masiih,
achaan Allah bas al-khatta tihit al-Masiih kulla cheyy.
28 Wa wakit kulla cheyy yukuun tihit rijileen Ibn Allah,
khalaas fi l-wakit daak,
Ibn Allah zaatah yukhutt nafsah tihit Allah al-khatta tihtah kulla cheyy.
Wa khalaas,
Allah wiheedah bas yabga foog kulla cheyy.
Wa kan al-maytiin abadan ma yabʼaso ?
29 Wa kan buʼaas ma fiih,
al-naas al-yikhattusuuhum fi chaan akhwaanhum al-maytiin gaaʼidiin yisawwu chunu ?
Kan al-maytiin abadan ma yabʼaso,
maala naas waahidiin yikhattusuuhum fi chaan akhwaanhum al-maytiin ?
30 Wa aniina kamaan,
maala gaaʼidiin fi l-khutuura ayyi wakit ?
31 Ya akhwaani al-be sababku raasi foog giddaam al-Masiih Isa Rabbina,
nachhad kadar kulla ma yoom ana gaaʼid fi ust al-moot.
32 Hini fi hillit Afasus ana tiʼibt marra waahid misil naadum gaaʼid yidaawis al-haywaanaat al-khatariyiin.
Wa kan buʼaas ma fiih,
ween al-faayde le l-insaan min al-taʼab al-misil da ?
Kan misil da,
akheer nitaabuʼu kalaam hana muznibiin al-zamaan al-gaalo <Khalli naakulu wa nacharbo wa nafraho achaan ambaakir numuutu bas>.
33 Ma tukhuchchu nufuusku.
Haal al-saalihiin tatlaf fi ust al-muznibiin.
34 Gabbulu fi l-derib al-adiil al-taʼarfuuh wa khallu minku al-zunuub.
Gult al-kalaam da achaan naas waahidiin minku ma baʼarfu Allah.
Wa da eeb leeku.
Al-jisim fi l-giyaama
35 Wa laakin akuun naadum yasʼal wa yuguul «
Al-maytiin yabʼaso kikkeef ?
Jisimhum yabga kikkeef ? ».
36 Inta al-matmuus !
Al-teeraab al-titeeribah fi l-ard ma yugumm hayy illa kan awwal ma dafantah misil cheyy mayyit.
37 Wa l-teeraab al-tadfinah da ma al-nabaat al-kaamil al-yugumm minnah baʼadeen.
La.
Hu habba yaabse bas,
kan hana gameh walla nabaat aakhar.
38 Laakin ayyi teeraab,
Allah yantiih al-jisim al-hu jaʼalah leyah wa yanti le ayyi nafar hana teeraab al-jisim al-waajib leyah.
39 Achaan kulla l-achya al-hayyiin ma sawa sawa wa lahamhum ma waahid.
Laham waahid hu hana l-naas wa laham aakhar hana l-haywaanaat wa fi aakhar hana l-tuyuur wa aakhar hana l-huut.
40 Wa fiyah ajsaam samaawiiye wa ajsaam ardiiye.
Wa l-jisim al-samaawi indah jamaal haggah wa l-jisim al-ardi indah jamaal chig.
41 Wa l-harraay indaha jamaal wa jamaalha chig min jamaal al-gamar wa jamaal al-nujuum.
Wa ayyi najma jamaalha chig min al-nujuum al-aakhariin.
42 Wa buʼaas al-maytiin kula yabga misil da.
Al-jisim al-yadfunuuh fi l-ard yatlaf laakin al-jisim al-baʼas abadan ma yatlaf.
43 Wa l-jisim al-yadfunuuh misil cheyy mazguul ke laakin wakit yabʼas indah ikraam.
Wa l-jisim al-yadfunuuh ma indah gudra wa laakin wakit yabʼas,
indah gudra katiire.
44 Wa l-yadfunuuh hu jisim aadi wa l-yabʼas hu jisim hana l-ruuh.
Wa akiid kan jisim aadi gaaʼid,
jisim hana l-ruuh kula gaaʼid.
45 Wa achaan da,
maktuub fi l-Kitaab,
Adam al-insaan al-awwal ligi al-haya.
Wa Adam al-akhiir hu al-Masiih wa hu bigi siid al-Ruuh wa hu yanti al-haya.
46 Wa insaan hana l-Ruuh ma ja awwal.
Al-insaan al-aadi hu ja awwal wa baʼadeen ja insaan hana l-Ruuh.
47 Wa l-insaan al-awwal hu bas hana l-ard wa hana l-turaab.
Wa l-insaan al-taani hu bas hana l-sama.
48 Wa Adam hu insaan hana l-turaab wa iyaal hana Adam humman naas hana l-turaab mislah hu.
Wa l-Masiih hu insaan hana l-sama wa naas hana l-Masiih kula naas hana l-sama mislah hu.
49 Wa misil awwal suuritna tichaabih suurat insaan al-turaab,
baʼadeen suuritna tichaabih suurat insaan al-sama.
50 Ya akhwaani,
asmaʼo kalaami.
Ayyi jisim al-indah damm wa laham ma yawris Mamlakat Allah.
Wa l-yatlaf abadan ma yawris al-ma yatlaf.
51 Asmaʼo wa niʼooriiku be sirr waahid Allah bas wassafaana.
Ma kullina numuutu laakin akiid kullina nilkhayyaro.
52 Wa da yabga ajala ke,
misil ramchit een.
Wa yabga fi daribiin al-burunji al-akhiir.
Achaan hiss al-burunji yinsamiʼ wa l-maytiin yabʼaso be l-jisim al-ma yatlaf wa kullina ke nilkhayyaro.
53 Achaan al-jisim al-yatlaf da waajib yalbas al-jisim al-abadan ma yatlaf.
Wa l-jisim al-yumuut waajib yalbas al-ma yumuut.
54 Wa wakit al-yatlaf libis al-ma yatlaf wa l-yumuut libis al-ma yumuut,
fi l-bakaan da bas al-kalaam al-maktuub da yitimm <Khalaas,
al-nasur battal al-moot marra waahid>.
55 <Ya l-moot,
nasrak ween ?
Ya l-moot,
gudurtak ween ?>.
56 Wa l-moot indah gudra foogna be sabab al-zunuub wa l-zunuub induhum gudra foogna be sabab churuut Allah.
57 Chukran le Allah al-antaana al-nasur be Rabbina Isa al-Masiih.
58 Ya akhwaani al-nihibbuku,
fakkuru fi kulla l-kalaam da wa agoodu saabtiin wa gawiiyiin.
Inkarubu daayman fi khidmit Rabbina achaan taʼarfu kadar al-khidme al-takhdumuuha le Rabbina abadan ma baatle.