Al-musaaʼada
16
Wa fi l-cheyy al-bukhuss al-musaaʼada al-tirassuluuha le l-saalihiin al-fi daar al-Yahuudiiya*,
waajib titaabuʼu nafs al-wasiiye al-anteetha le jamaaʼaat al-muʼminiin al-fi balad Khalaatiya.
2 Kulla yoom al-ahad,
khalli ayyi naadum minku yifakkir fi kikkeef Allah razakhah wa yamrug cheyy min maalah le l-musaaʼada.
Khalli yukhuttah jaahiz lahaddi najiiku.
Wa be misil da,
wakit ana naji ma waajib tugummu tutcukku.
3 Ikhtaaru min ambeenaatku al-akhwaan al-tidooru yiwaddu musaaʼaditku.
Wa wakit najiiku,
nirassilhum be makaatiib hana chahaada fi Madiinat al-Khudus.
Wa khalaas humman yiwaddu al-musaaʼada al-anteetuuha.
4 Wa fi l-bakaan da kan bigi leyi,
ana kula nisaafir wa humman yiraafuguuni.
Ruwaakhit Buulus wa akhwaanah
5 Wa wakit nuchugg balad Magiduuniya khalaas,
namchi leeku ziyaara achaan awwal ke nuruukh fi Magiduuniya.
6 Wa akuun nagood maʼaaku ayyaam.
Akuun tuul al-chite kula,
achaan fi l-akhiir tantuuni zaad le l-safar wakit naʼarif al-bakaan al-namchi foogah.
7 Achaan ma nidoor nugumm hassaʼ wa nakhchaaku bas laakin kan Rabbina gaal aamiin,
nitawwil chiyya maʼaaku.
8 Wa nagood hini fi hillit Afasus lahaddi Iid al-Khamsiin
9 achaan Allah fatah leyi al-baab wa indi fursa nisawwi khidme adiile bilheen.
Wa l-yikhaalufu kalaam Allah kula katiiriin.
10 Wa wakit Timuutaawus yajiiku,
akurbuuh gawi wa khalli yagood maʼaaku be l-salaam achaan hu gaaʼid yakhdim khidmit Allah misli ana.
11 Achaan da,
ma tikhallu ayyi naadum yahgirah.
Antuuh zaad wa khallu yaji leyi be l-salaama achaan ana gaaʼid narjaah,
hu wa l-akhwaan al-maʼaayah.
12 Wa akhuuna Abuluus al-niriiduuh hu gaaʼid hini.
Ana hannastah achaan yamchi leeku maʼa l-akhwaan laakin hassaʼ haaliiyan da,
ma yidoor yamchi.
Akiid hu yamchi leeku wakit indah fursa.
Nihaayat al-jawaab
13 Agoodu waaʼiyiin wa saabtiin fi l-iimaan.
Ma takhaafo min cheyy.
Abgo gawiiyiin.
14 Sawwu kulla cheyy be l-mahabba.
15 Ya akhwaani,
taʼarfu naas beet Istifaan wa taʼarfu kadar fi balad al-Yuunaan humman awwal naas al-aamano be l-Masiih wa taʼarfu humman munkaribiin fi l-khidme fi chaan al-saalihiin.
16 Wa niwassiiku achaan tasmaʼo adiil kalaam hana l-naas al-misilhum wa hana ayyi naadum al-yakhdim maʼaahum be niiye waahide.
17 Wa ana firiht bilheen be jayyit akhwaanku Istifaan wa Furtuuna wa Akhaayik achaan ana garmaan leeku wa humman jo fi gadduku.
18 Wa barrado galbi misil barrado guluubku intu kula.
Karrumu al-naas al-misil dool.
19 Wa jamaaʼaat al-muʼminiin al-fi balad Aasiya yisallumuuku.
Wa Akiila wa Firiska wa l-muʼminiin al-yilimmu fi beethum yisallumuuku katiir fi Rabbina al-Masiih.
20 Wa l-akhwaan kulluhum yisallumuuku.
Assaalamo ambeenaatku be l-salaam al-saalihiin.
21 Wa khalaas ana zaati chilt al-galam wa katabt be iidi «
Ana Buulus nisallimku ».
22 Kan ayyi naadum ma yihibb Rabbina Isa,
khalli Allah yanʼalah.
Ya Rabbina taʼaal!*
23 Wa aleekum niʼmat Rabbina Isa.
24 Nirassil leeku kulluku mahabbiti fi l-Masiih Isa.