Barakaat al-Ruuh al-Khudduus fi l-malamma
14
Achaan da,
inkarubu fi l-mahabba wa battaan itmannu be niiye waahide achaan talgo barakaat al-Ruuh al-Khudduus.
Wa min al-barakaat dool,
itmannu ziyaada achaan tikallumu al-kalaam al-naazil min Allah.
2 Achaan kan naadum yikallim be lukhkhaat min al-Ruuh al-Khudduus,
hu yihajji le Allah wa ma yihajji le l-naas achaan ma fi naadum yafham kalaamah.
Hu gaaʼid yihajji be gudrat al-Ruuh al-Khudduus kalaam ma maʼruuf.
3 Laakin kan naadum yikallim kalaam naazil min Allah,
hu yihajji le l-naas wa yigawwi iimaanhum wa yichajjiʼhum wa yisabbirhum.
4 Al-yikallim be lukhkhaat yigawwi nafsah laakin al-yikallim kalaam naazil min Allah yigawwi jamaaʼat al-muʼminiin.
5 Wa ana nidoor kulluku tihajju be lukhkhaat laakin nidoor ziyaada kadar tikallumu kalaam naazil min Allah.
Al-yikallim le l-naas kalaam naazil min Allah akheer min al-yikallim le l-naas be lukhkhaat.
Achaan al-yikallim be lukhkhaat ma yigawwi al-muʼminiin illa kan naadum waahid yifassir kalaamah leehum.
6 Ya akhwaani,
kan najiiku wa nikallim leeku kalaam be lukhkhaat,
ma talgo faayde min kalaami.
Laakin talgo faayde muhimma kan nikallim leeku ruʼya al-chiftaha aw kalaam hana l-ilim aw kalaam naazil min Allah aw kalaam hana taʼliim.
7 Chiilu masal hana aalaat al-musiikha misil al-suffaara walla l-jigindiye.
Humman ma induhum ruuh kula laakin nidooru hissuhum yabga waadih.
Wa kan ma waadih,
al-musiikha ma tinʼarif.
8 Kan al-burunji ma yinaadi al-askar be hiss waadih,
yaatu al-yijahhiz nafsah le l-duwaas ?
9 Wa leeku intu kula nafs al-cheyy.
Kan lisaanku ma yihajji kalaam waadih,
kikkeef ayyi naadum yafham al-kalaam al-tuguuluuh ?
Kalaamku macha fi l-riih saakit.
10 Bala chakk,
fiyah lukhkhaat katiiriin fi l-dunya wa ayyi waahide tinfahim.
11 Laakin kan naadum yihajji leyi be lukhkha al-ma naʼarifha,
ana ma nafham kalaamah.
Nabga misil ajnabi le l-naadum al-yihajji beeha wa hu ajnabi leyi ana.
12 Wa leeku intu kula nafs al-cheyy.
Intu munkaribiin fi gudrat al-Ruuh al-Khudduus ambeenaatku wa da adiil laakin inkarubu ziyaada fi l-barakaat al-yigawwu jamaaʼat al-muʼminiin.
13 Achaan da,
waajib ayyi naadum al-yikallim be lukhkhaat yatlub min Allah gudra achaan yifassir kalaamah.
14 Kan nisalli be lukhkhaat min al-Ruuh al-Khudduus,
galbi yisalli laakin al-kalaam al-nuguulah ma jaayi min fikri.
15 Wa l-waajib al-nisawwiih,
nisalli be lukhkhaat min al-Ruuh wa battaan nisalli be kalaam jaayi min fikri.
Nachkur Allah be madih be lukhkhaat min al-Ruuh wa nachkurah be madih jaayi min fikri kula.
16 Wa kan inta chakart Allah be kalaam be lukhkhaat min al-Ruuh,
al-naadum al-ma fihim kalaamak da bigi leek misil ajnabi.
Hu ma fihim al-kalaam al-inta gultah wa achaan da,
ma yagdar yuguul «
Aamiin ».
17 Akuun chakart Allah adiil laakin akhuuk da,
inta ma gawweet iimaanah.
18 Wa l-hamdulillah,
ana zaati nihajji be lukhkhaat min al-Ruuh al-Khudduus ziyaada minku kulluku.
19 Laakin fi malammat al-muʼminiin,
kan niʼallim al-naas be khamsa kalimaat min lukhkha al-tinfahim,
da akheer min nikallim be lukhkhaat achara alif kilme al-ma tinfahim.
20 Ya akhwaani,
khalli fikirku ma yabga misil fikir hana l-iyaal al-dugaag.
Khalli ayyi naadum yabga bari misil al-tifil fi l-cheyy al-bukhuss al-charr.
Laakin khalli fikirku yabga fikir hana l-naadum al-aagil.
21 Wa maktuub fi Kitaab Allah <Nikallim le l-chaʼab dool be l-naas al-lukhkhaathum ma maʼruufa wa be khuchuum al-ajaanib laakin fi l-bakaan da kula,
al-chaʼab dool yaabo ma yasmaʼo kalaami.
Da bas kalaam Allah>.
22 Wa be misil da,
kalaam be lukhkhaat ma yabga alaama le l-muʼminiin laakin le l-ma muʼminiin.
Wa l-kalaam al-naazil min Allah ma yabga alaama le l-ma muʼminiin wa laakin le l-muʼminiin.
23 Masalan,
kan kulluku taju fi malammat al-muʼminiin wa kulluku tihajju be lukhkhaat wa diifaan aw naas ma muʼminiin yindasso,
humman yuguulu intu muchootiniin.
24 Laakin kan kulluku tikallumu al-kalaam al-naazil min Allah wa naadum ma muʼmin aw deef yindassa fi l-bakaan da,
kalaamku yindassa foogah wa hu yinfadih giddaam Allah.
25 Wa l-zunuub al-labbadaahum fi galbah yinkachfu wa achaan da,
ajala ke yasjud wa yaʼabud Allah.
Wa yachhad wa yuguul «
Be l-sahiih Allah gaaʼid fi usutku ».
Al-adab fi malammat al-kaniisa
26 Wa be misil da ya akhwaani,
chunu al-waajib ?
Wakit tulummu,
khalli ayyi naadum yijiib al-cheyy al-indah.
Naadum waahid indah madih wa naadum aakhar indah taʼliim wa aakhar indah al-cheyy al-Allah wassafah leyah fi ruʼya wa aakhar indah kalaam be lukhkhaat walla tafsiir.
Wa kulla cheyy al-tisawwuuh waajib yigawwi al-akhwaan.
27 Kan naas yikallumu be lukhkhaat min al-Ruuh al-Khudduus,
khalli itneen walla talaata bas yikallumu waahid baʼad waahid.
Wa khalli naadum yifassir kalaamhum.
28 Wa laakin kan ma fi naadum al-yagdar yifassir kalaamhum,
khalli yagoodu saakit ma yikallumu fi malammat al-muʼminiin.
Khalliihum yihajju le Allah be hiss tihit bas.
29 Wa khalli itneen walla talaata naas yikallumu kalaam naazil min Allah wa khalli al-aakhariin yimayyuzu kalaamhum.
30 Wa kan naadum aakhar gaaʼid yasmaʼ wa kalaam Allah yanzil leyah,
khalli al-naadum al-gaaʼid yikallim yaskut.
31 Achaan kulluku induku fursa tikallumu kalaam naazil min Allah waahid baʼad waahid.
Wa misil da,
ayyi naadum yilʼallam min al-aakhariin wa kulluku talgo chajaaʼa.
32 Wa l-naadum al-yikallim al-kalaam al-naazil min Allah indah gudra foog al-kalaam al-yuguulah
33 achaan Allah ma yarda be l-barjaal.
Hu yarda be l-salaam.
Wa yabga misil da fi kulla jamaaʼaat al-saalihiin.
34 Wa fi malammat al-muʼminiin waajib al-awiin yaskutan.
Ma indihin izin yiʼawwan.
Waajib yabgan daluulaat misil maktuub fi l-Tawraat kula.
35 Wa kan indihin suʼaal fi l-taʼaaliim,
khalli yasʼalan rujaalhin fi buyuuthin.
Kan mara tihajji fi malammat al-muʼminiin,
da eeb marra waahid.
36 Wa kikkeef ?
Fi fikirku ballikhiin kalaam Allah awwal bada fi usutku walla ?
Aw intu wiheedku bas simiʼtu kalaam Allah walla ?
37 Kan naadum yuguul hu nabi walla naadum hana l-Ruuh al-Khudduus,
khalli yiʼtarif kadar al-kalaam al-gaaʼid naktibah leeku da amur min Rabbina.
38 Wa kan ayyi naadum yankur al-kalaam da,
Rabbina yankurah.
39 Wa ya akhwaani,
di bas zibdit al-kalaam.
Itmannu be niiye waahide achaan tikallumu kalaam naazil min Allah wa ma tadharo kalaam be lukhkhaat min al-Ruuh al-Khudduus.
40 Wa sawwu kulla cheyy fi malammat al-kaniisa be adab wa nizaam.