Al-mahabba
13
Kan nikallim be lukhkhaat al-naas wa be lukhkhaat al-malaaʼika wa ma indi al-mahabba,
kalaami ma indah faayde.
Be da kalaami bigi misil daggiin al-nahaas walla baki hana jaras.
2 Wa kan nikallim kalaam naazil min Allah wa nafham kulla l-asraar wa kulla cheyy hana l-ilim wa kan indi iimaan gawi marra waahid lahaddi narfaʼ al-jibaal min bakaanaathum kula wa kan ma indi al-mahabba,
ana ma cheyy.
3 Wa kan nanti kulla cheyy al-indi le l-masaakiin wa nisallim jismi le l-khidme achaan fi l-yoom al-akhiir narfaʼ raasi foog* wa ma indi al-mahabba,
ma nalga cheyy.
4 Al-naadum al-indah mahabba sabuur wa zeen.
Al-indah mahabba ma hasuud.
Al-indah mahabba ma fachchaar wa ma mustakbir.
5 Hu ma yisawwi cheyy hana eeb.
Hu ma yifakkir fi nafsah bas.
Wa ma yazʼal ajala.
Hu ma yifakkir fi l-khata al-akhwaanah sawwooh.
6 Hu abadan ma yafrah be l-zulum laakin yafrah daayman be l-hagg.
7 Al-indah mahabba hu yahmal ayyi cheyy.
Hu yiʼaamin fi kulli haal wa achamah saabit fi kulli haal wa hu saabir fi kulli haal.
8 Al-mahabba abadan ma tikammil.
Wakit hana l-kalaam al-naazil min Allah yikammil.
Wa wakit hana l-lukhkhaat al-min al-Ruuh al-Khudduus yintahi.
Wa wakit hana l-ilim yikammil.
9 Achaan al-ilim al-indina muhaddad wa niballukhu kalaam naazil min Allah laakin ballikhiinah muhaddad.
10 Laakin yoom al-aakhira yaji wa fi l-yoom da,
al-muhaddad yikammil khalaas.
11 Masalan,
wakit ana wileed sakhayyar ana hajjeet hije hana iyaal dugaag wa fikri kula hana iyaal dugaag wa agli kula hana iyaal dugaag.
Wa wakit ana kibirt khalaas wa bigiit raajil,
khalleet minni al-iyaaliiye.
12 Achaan hassaʼ fi zamanna da,
nichiifu al-hagg misil nichiifuuh fi amchawwaafa al-waskhaane wa fi l-aakhira nichiifuuh tamaam.
Hassaʼ da,
ana irift chiyya wa baʼadeen naʼarif tamaam misil Allah irifni.
13 Wa khalaas,
al-talaata al-yagoodu daayman humman al-iimaan wa l-acham wa l-mahabba.
Wa l-akbar minhum al-mahabba.