Wasaaya fi l-akhiide
7
Wa hassaʼ da,
nurudd leeku fi l-kalaam al-saʼaltuuni minnah.
Wa katabtu gultu «
Akheer le l-raajil kan abadan ma yargud maʼa mara ».
2 Laakin muchkilat al-zina gaaʼide wa tidoor takrubku.
Achaan da,
akheer ayyi raajil indah martah halaalah wa ayyi mara indaha raajilha halaalha.
3 Waajib al-raajil al-maakhid yanti nafsah le martah wa l-mara al-maakhde tanti nafisha le raajilha.
4 Al-mara ma indaha huguug fi jisimha,
illa raajilha bas indah hagg.
Wa sawa misil da,
al-raajil ma indah huguug fi jismah,
illa martah bas indaha hagg.
5 Khalli al-raajil ma yaaba martah wa l-mara ma taaba raajilha.
Laakin kan tidooru tiwaggufu al-alaakha al-jinsiiya ambeenaatku le mudda muhaddada,
masalan wakit tinkarubu fi l-sala,
awwalan ke istafugu foogah.
Wa wakit al-mudda di kammalat,
lummu battaan.
Wa gult al-kalaam da achaan kan ma tagdaro talzamo chahwaatku,
akuun Ibliis yilizzuku fi l-zanib.
6 Al-waggafaan al-misil da,
ma amartuku beyah laakin kan tidooru tisawwuuh,
ma indah eeb.
7 Sahiih,
fi fikri akheer kan kulli naadum yukuun misli ana al-ma maakhid.
Laakin ayyi naadum indah al-baraka al-Allah antaaha leyah.
Wa le l-waahid baraka waahide wa le l-aakhar baraka chig.
8 Wa fi l-cheyy al-bukhuss al-rujaal al-hassaʼ ma induhum awiin wa l-awiin al-rujaalhin maytiin,
nuguul akheer kan yagoodu bala akhiide misli ana.
9 Laakin kan ma yagdaro yalzamo chahwaathum,
akheer yaakhudu.
Kan yaakhudu,
da akheer min al-chahwa taakulhum misil al-naar.
10 Wa kan le l-naas al-maakhdiin,
nantiihum wasiiye.
Wa l-wasiiye di ma minni ana laakin min Rabbina Isa.
Waajib al-mara al-maakhde ma titallig raajilha.
11 Wa kan hi tallagatah,
waajib tagood bala akhiide aw tisaalih raajilha.
Wa khalli al-raajil al-maakhid ma yitallig martah.
12 Wa le l-aakhariin,
indi wasiiye.
Wa l-wasiiye di ma min Rabbina,
hi minni ana.
Kan ayyi muʼmin indah mara ma muʼmine wa martah tikhassid tagood maʼaayah,
waajib hu ma yitalligha.
13 Wa kan mara minku indaha raajil ma muʼmin wa raajilha yikhassid yagood maʼaaha,
waajib hi ma titalligah.
14 Achaan al-raajil al-ma muʼmin bigi taahir be sabab iimaan martah wa l-mara al-ma muʼmine bigat taahre be sabab raajilha.
Wa kan ma ke,
iyaalku yukuunu ma taahiriin wa laakin be l-sahiih humman taahiriin.
15 Wa laakin kan al-naadum al-ma muʼmin yidoor al-talaag,
khalli yisawwiih.
Kan sawwaah,
al-muʼmin kan raajil walla mara kula,
ma marbuut.
Laakin intu Allah naadaaku achaan tiʼiichu be l-salaam.
16 Intu ma taʼarfu al-cheyy al-yabga.
Ya l-mara,
akuun raajilki yanja be sababki.
Ya l-raajil,
akuun martak tanja be sababak.
17 Wa l-kalaam al-muhimm daahu,
khalli ayyi muʼmin yagood fi l-haala al-Rabbina jaʼalaaha leyah.
Wa di l-haala al-hu gaaʼid foogha wakit Allah naadaah fi l-iimaan.
Di bas al-wasiiye al-niʼallimha le l-muʼminiin fi ayyi bakaan.
18 Masalan,
kan naadum mutahhar min gubbaal Allah ma naadaah fi derbah,
khalli ma yisawwi cheyy le yibattil al-tahuura.
Wa l-naadum al-ma mutahhar gubbaal Allah ma naadaah,
khalli ma yitahhuruuh.
19 Kan naadum mutahhar walla ma mutahhar,
da ma bisawwi cheyy.
Al-cheyy al-waajib hu yitaabiʼ wasaaya Allah.
20 Khalli ayyi naadum yagood fi l-haala al-hu gaaʼid foogha wakit Allah naadaah.
21 Kan inta abid wakit Allah naadaak,
ma tikhalli al-ubuudiiye tizaʼʼilak.
Laakin kan yantuuk fursa tabga hurr,
khassid tawwaali.
22 Wa gult leek ma tazʼal achaan al-abid al-Allah naadaah fi derib Rabbina bigi khaddaam muharrar hana Rabbina.
Wa nafs al-cheyy le l-naadum al-awwal hurr gubbaal Allah ma naadaah.
Hu bigi abid al-Masiih.
23 Allah kaffa al-taman fi chaanku wa achaan da,
ma tabgo abiid le l-naas.
24 Ya akhwaani,
zibdit al-kalaam,
hi khalli ayyi naadum yagood fi l-haala al-gaaʼid foogha wakit Allah naadaah wa khalli yagood foogha fi alaakha maʼa Allah.
Wasaaya le l-ma maakhdiin
25 Wa fi l-cheyy al-bukhuss al-naas al-lissaaʼ ma akhado,
ma indi wasiiye min Rabbina.
Laakin Allah rahamaani wa jaʼalaani naadum saadikh wa achaan da nuguul leeku fikri.
26 Hassaʼ haaliiyan intu gaaʼidiin fi taʼab chadiid.
Achaan da,
fi fikri akheer kan ayyi naadum ma yikhayyir haaltah.
27 Kan naadum indah mara,
khalli ma yitalligha.
Kan naadum ma indah mara,
khalli ma yaakhud.
28 Wa kan sabi yaakhud,
da ma khata.
Wa kan bineeye taakhud,
da ma khata.
Laakin fi l-dunya di,
al-maakhdiin yatʼabo ziyaada wa leeku intu nidoor ninajjiiku min al-taʼab da.
29 Wa gult al-kalaam da achaan al-zaman al-aniina gaaʼidiin foogah da,
Allah haddadah.
Wa min hassaʼ le giddaam,
khalli al-raajil al-indah mara ma yinkarib ziyaada fi martah.
30 Wa khalli al-haznaaniin ma yinkarubu fi hizinhum bas.
Wa khalli al-farhaaniin ma yinkarubu fi farhithum bas.
Wa khalli al-naas al-yachru ma yinkarubu fi khumaamhum.
31 Wa khalli al-naas al-induhum muʼaamala maʼa naas al-dunya ma yichtakhalo beeha.
Akiid,
nizaam al-dunya al-haali da gaaʼid yikammil.
32 Wa nidoor al-hamm ma yakrubku.
Al-muʼmin al-ma indah mara gaaʼid yinkarib fi khidmit Rabbina wa fi rida Rabbina.
33 Laakin al-muʼmin al-indah mara gaaʼid yinkarib fi khidmit al-dunya di,
maʼanaatah hu yidoor yiraddi martah,
34 wa misil da hu indah khidme itneen.
Wa l-mara aw al-bineeye al-muʼmine al-ma maakhde gaaʼide tinkarib fi khidmit Rabbina achaan tabga saalhe be fiʼilha wa fikirha.
Laakin al-muʼmine al-maakhde tinkarib fi khidmit al-dunya di,
maʼanaatah hi tidoor tiraddi raajilha.
35 Wa gult al-kalaam da le faayditku.
Ma nidoor nukhutt leeku huduud.
Gult al-kalaam da achaan niwassifku kikkeef titaabuʼu derib Rabbina be niiye waahide wa takhdumu leyah be galib waahid.
36 Kan ayyi naadum minku karab raas bineeye wa akhkhar mawʼid al-cheeliin wa hu fakkar kadar al-taʼkhiir da bigi gaasi le l-bineeye aw yidoor yichiilha achaan chahwatah bigat chadiide,
khalaas khalli yichiilha.
Khalli yilʼaakhado.
Da ma khata.
37 Laakin al-raajil al-indah niiye saabte fi galbah wa ma jabarooh wa lazam chahwatah tamaam wa chaal kharaar fi galbah achaan yiʼakhkhir mawʼid al-cheeliin da,
hu sawwa cheyy adiil.
38 Wa be misil da,
al-yichiil al-bineeye al-karab raasha yisawwi cheyy adiil wa l-ma yichiilha yisawwi akheer.
39 Wa l-muʼmine al-maakhde marbuuta maʼa raajilha lahaddi mootah.
Wa kan raajilha maat,
hi indaha hagg achaan taakhud ayyi naadum al-tiriidah kan hu kula yitaabiʼ derib Rabbina Isa.
40 Laakin leyi ana,
yabga leeha akheer kan ma taakhud battaan.
Wa fi fikri ana,
Ruuh Allah gaaʼid foogi wa fi kalaami.