Al-akil wa l-asnaam
8
Wa ana nurudd leeku fi l-cheyy al-bukhuss al-laham al-gaddamo dahiiye le l-asnaam.
Al-kalaam al-intu gultu «
aniina al-muʼminiin kullina indina ilim »,
da maʼruuf.
Laakin nuguul leeku al-ilim yisabbib al-istikbaar wa l-mahabba bas tigawwi al-ukhuuwa.
2 Kan naadum buguul hu aarif,
hu lissaaʼ ma irif misil hu waajib yaʼarif.
3 Laakin kan naadum yihibb Allah,
al-naadum da Allah aarfah.
4 Wa fi l-cheyy al-bukhuss akil al-laham al-dabahooh dahiiye le l-asnaam,
akiid aniina naʼarfu kadar «
Al-sanam hu yimassil cheyy al-abadan ma mawjuud ».
Wa naʼarfu kadar «
Ma fi ilaah illa Allah al-Waahid ».
5 Wa akiid,
al-naas buguulu fi ilaahaat fi l-samaawaat wa l-ard.
Wa be l-sahiih,
al-naas buguulu fi ilaahaat wa arbaab katiiriin.
6 Wa laakin leena aniina al-muʼminiin,
Allah waahid bas gaaʼid wa hu Abuuna al-khalag kulla cheyy wa aniina mawjuudiin leyah hu.
Wa Rabb waahid bas gaaʼid wa hu Isa al-Masiih wa beyah hu kulla cheyy gaaʼid wa beyah hu aniina hayyiin.
7 Laakin naas waahidiin ma karabo al-ilim da adiil.
Wa akhwaan waahidiin fi aadithum gubbaal ma aamano gaaʼidiin yaʼabudu al-asnaam.
Wa fi fikirhum,
kan yaakulu al-laham da,
yichaaruku battaan fi l-ibaada di.
Wa kan akalo,
al-eeb yisawwiihum achaan fikirhum fi l-iimaan lissaaʼ ma gawi.
8 Wa sahiih,
al-akil ma yiziid leena rida Allah.
Kan ma naakuluuh,
ma nakhsuru cheyy giddaam Allah.
Wa kan naakuluuh kamaan,
ma nalgo minnah faayde giddaam Allah.
9 Laakin awʼu baalku achaan al-hurriiye al-tiriiduuha di ma tamurgah min al-derib le l-muʼmin al-iimaanah ma gawi.
10 Achaan inta tuguul inta naadum aalim wa kan naadum iimaanah ma gawi yichiifak inta gaaʼid taakul fi beet al-asnaam,
akuun hu kula yaakul al-laham al-gaddamooh le l-asnaam wa khalaas al-eeb yakurbah.
11 Wa misil da,
inta taabaʼt ilmak wa tallaft beyah akhuuk al-Rabbina al-Masiih maat fi chaanah.
12 Wa be da,
intu khitiitu fi akhwaanku wa jibtu al-eeb fi l-akhwaan al-iimaanhum ma gawi wa khalaas khitiitu fi l-Masiih.
13 Achaan da,
kan al-laham al-naakulah yamrug akhuui min al-derib,
ana abadan ma naakul al-laham battaan achaan ma nidoor akhuui yamrug min al-derib be sababi ana.