Al-chariiʼa ambeenaat al-muʼminiin
6
Wa kan naadum minku mazluum fi akhuuh al-muʼmin,
maala yiwaddiih le l-muznibiin achaan yagtaʼo leyah al-chariiʼa ?
Akheer kan yikhalli al-saalihiin yagtaʼo leyah al-chariiʼa wa yihaasubu al-zaalim.
2 Nisiitu kadar al-saalihiin yahkumu fi l-dunya walla ?
Kan baʼadeen intu tahkumu fi l-dunya,
kikkeef ma tagdaro tahkumu fi muchkila sakhayre kula ?
3 Nisiitu kadar nahkumu fi l-malaaʼika walla ?
Wa kan misil da,
akiid nagdaro nahkumu fi machaakil akhwaanna fi l-dunya kula.
4 Wa kan induku machaakil ambeenaatku,
maala tigaddumuuhum le l-naas al-ma muhimmiin le ummat al-Masiih ?
5 Wa da eeb foogku.
Ma fi naadum minku indah hikma achaan yahkim ambeenaat akhwaanah walla ?
6 Laakin intu gaaʼidiin tikhallu al-muʼmin yachki akhuuh fi l-hukkaam hatta kan al-hukkaam dool ma muʼminiin kula.
7 Kan waddeetu akhuuku fi l-mahkama,
intu fachaltu khalaas.
Akheer takhbalo al-zulum wa tasburu foogah.
Akheer tikhallu naadum yasrig minku.
8 Laakin intu zaatku gaaʼidiin tazlumu akhwaanku wa tasurgu khumaamhum be l-khachch !
9 Nisiitu kadar al-muznibiin ma yawrusu Mamlakat Allah walla ?
Ma tukhuchchu nafisku.
Kan naadum faasikh walla aabid asnaam walla zannaay walla chamrookha walla luuti
10 walla sarraag walla tammaaʼ walla sakkaari walla nammaam walla nahhaab ma indah warasa fi Mamlakat Allah.
11 Wa naas waahidiin minku awwal gaaʼidiin yisawwu al-zunuub dool.
Laakin Allah khassalaaku wa sawwaaku khaassiin leyah wa jaʼalaaku saalihiin be usum Rabbina Isa al-Masiih wa be gudrat Ruuh Allah Ilaahna.
Jisim al-muʼmin hana l-Rabb
12 Intu gultu «
Kulla cheyy halaal leyi »
wa laakin ana nuguul ma kulla cheyy indah faayde.
Gultu «
Kulla cheyy halaal leyi »
wa laakin ana nuguul abadan ma nikhassid kadar ayyi cheyy yiʼabbidni.
13 Wa gultu «
Al-batun gaaʼide le l-akil wa l-akil gaaʼid le l-batun ».
Aywa,
wa fi l-akhiir,
Allah yidammir al-akil wa l-batun sawa sawa.
Wa laakin al-jisim ma gaaʼid le l-zina.
Al-jisim gaaʼid fi chaan Rabbina Isa wa Rabbina baʼas fi chaan al-jisim.
14 Wa Allah baʼas Rabbina wa be nafs al-gudra yabʼasna aniina kula.
15 Ma iriftu kadar hassaʼ jisim al-muʼmin udu min jisim al-Masiih walla ?
Wa kan misil da,
hal niwaddi jismi al-hassaʼ udu min jisim al-Masiih wa nantiih le mara charmuuta ?
Abadan.
16 Ma iriftu kadar al-naadum al-yilimm maʼa charmuuta yabga maʼaaha jisim waahid ?
Maktuub fi l-Kitaab <Al-naaseen yabgo jisim waahid>.
17 Wa laakin al-yilimm maʼa Rabbina al-Masiih yabga maʼaayah ruuh waahide.
18 Khalaas,
angarʼu min al-zina.
Kulla l-zunuub al-aakhariin al-yisawwiihum al-insaan ma yilammusu al-jisim,
laakin al-zannaay hu bas yudurr jismah.
19 Ma iriftu kadar al-Ruuh al-Khudduus gaaʼid fiiku walla ?
Wa be da al-jisim hu beet Allah.
Intu ma hana nufuusku.
Intu hana Allah.
20 Hu kaffa al-taman fi chaanku.
Achaan da,
khalli kulla cheyy al-tisawwu be jisimku yimajjid Allah.