Al-zaani fi ust al-muʼminiin
5
Simiʼt kalaam ajiib bilheen foogku.
Buguulu naadum minku gaaʼid yisawwi zina al-naas al-ma baʼarfu Allah kula ma yisawwuuh.
Buguulu naadum waahid gaaʼid yazna marit abuuh.
2 Kikkeef bigiitu mustakbiriin ?
Akheer tahzano hizin chadiid.
Wa l-naadum al-sawwa al-zanib da,
waajib taturduuh min usutku.
3 Wa kan leyi ana,
sahiih ana gaaʼid fi bakaan baʼiid minku laakin ana maʼaaku be l-Ruuh al-Khudduus.
Wa ana haakamt al-naadum da khalaas misil ana be nafsi gaaʼid fi usutku.
4 Wa wakit intu laammiin be usum Rabbina Isa wa hasseetu kadar ana gaaʼid maʼaaku wa gudrat Rabbina Isa maʼaaku,
5 waajib tisallumu al-naadum da le l-Cheetaan achaan chahwatah al-bachariiye tiddammar wa hu zaatah yanja fi yoom jayyit Rabbina Isa.
6 Sawweetu nufuusku kubaar wa da ma indah faayde.
Hal nisiitu kadar tawwaara chiyya bas tigawwim al-ajiin kulla ke ?
7 Amurgu minku al-naadum al-gaaʼid yaznib da achaan tabgo battaan misil ajiin jadiid bala tawwaara.
Achaan Allah sawwaaku naas judaad.
Wa aniina naas judaad achaan al-Masiih maat fi chaanna khalaas,
misil al-kharuuf al-dabahooh zamaan fi l-Fisha al-awwalaaniiye*.
8 Achaan da,
khalliina nabgo misil al-naas al-yiʼayyudu Iid al-Fisha al-baakulu al-khubza al-jadiide.
Wa l-khubza al-gadiime tiwassif al-fasaala wa l-zunuub.
Wa l-khubza al-jadiide tiwassif al-niiye al-mukhlisa wa l-hagg.
9 Wa fakkuru fi l-kalaam al-katabtah leeku fi jawaabi al-gibeel.
Ana gult angarʼu min al-zannaayiin wa kussu minhum baʼiid.
10 Wa maʼana al-kalaam da ma bukhuss al-naas al-zannaayiin al-ma muʼminiin wa la l-tammaaʼiin wa la l-sarraagiin wa la aabdiin al-asnaam.
Achaan ma tagdaro tukussu min al-naas dool illa kan tamurgu min al-dunya marra waahid.
11 La.
Fi gaddah,
ana katabt leeku achaan tukussu min ayyi naadum al-buguul hu akhuuku muʼmin wa laakin hu zannaay walla tammaaʼ walla aabid al-asnaam walla nammaam walla sakkaari walla sarraag.
Aywa,
al-naadum al-misil da ma taakulu maʼaayah kula.
12 Ana ma indi hagg nihaasib al-naas al-barra min ummat al-Masiih.
Wa laakin akhwaanku al-muʼminiin al-fi usutku waajib intu tihaasubuuhum.
13 Al-naas al-barra dool,
Allah yihaasibhum.
Wa laakin kan leeku intu,
maktuub <Aturdu min usutku al-naadum al-fasil>.