Haalit rusul al-Masiih
4
Wa leyi ana wa akhwaani,
waajib tahsubuuna khaddaamiin al-Masiih masʼuuliin min ballikhiin kalaam Allah al-awwal ma irifooh al-naas.
2 Wa l-cheyy al-waajib le ayyi naadum al-masʼuul,
hu al-sidakh.
3 Wa leyi ana,
ma lammaani kan intu tisawwu leyi taftiich fi khidimti walla kan ayyi insaan yisawwi leyi taftiich.
Ana kula ma nisawwi taftiich fi nafsi.
4 Galbi gaaʼid yuguul ana ma indi eeb,
laakin da wiheedah ma yisabbit kadar ana bari.
Al-gaaʼid yakchifni,
hu Rabbina Isa.
5 Be misil da,
ma tisawwu taftiich fi khidmit ayyi naadum gubbaal yoom al-Hisaab.
Fi l-yoom da,
Rabbina yaji wa yibayyin kulla cheyy al-mulabbad fi l-dalaam wa yizahhir niiyit al-naas al-gaaʼide fi guluubhum.
Wa ayyi naadum yalga rida ma min al-naas laakin min Allah.
6 Ya akhwaani,
ana tabbagt kalaami da fi l-cheyy al-bukhussini ana wa Abuluus achaan intu talgo minnah faayde.
Wa be da,
nidoor intu taʼarfu maʼana al-masal al-maʼruuf al-buguul «
Khalli naadum ma yamrug min derib al-Kitaab ».
Ma tistakbaro battaan fi l-naadum al-waahid wa tahguru al-aakhar.
7 Wa nuguul le ayyi waahid,
maala tuguul inta akheer min akhuuk ?
Al-cheyy al-indak da,
hu min Allah.
Wa kan Allah bas antaah leek,
maala tisawwi nafsak kabiir beyah misil hu ma antaak ?
8 Wa khalaas,
tuguulu intu chabʼaaniin wa bigiitu khaniyiin be l-iimaan wa khalleetuuna wara wa gaʼadtu khalaas fi karaasiiku achaan tamluku.
Nitmanna kadar intu tamluku achaan nichaaruku maʼaaku fi l-muluk.
9 Wa gult al-kalaam da achaan fi fikri,
Allah khattaana aniina rusul al-Masiih fi l-bakaan al-wara marra waahid.
Aniina bigiina misil al-masaajiin al-hakamo leehum be l-moot wa maragoohum giddaam al-naas.
Aniina gaaʼidiin natʼabo wa kulla l-dunya wa kulla naasha wa kulla l-malaaʼika gaaʼidiin yichiifu taʼabna.
10 Aniina sawweena nufuusna jaahiliin fi chaan al-Masiih wa laakin intu tuguulu intu ulama fi l-Masiih.
Aniina faagdiin al-gudra laakin intu gawiiyiin.
Intu mukarramiin laakin aniina mahguuriin.
11 Ya hassaʼ aniina jiiʼaaniin wa atchaaniin.
Ma indina khulgaan.
Yudugguuna wa yaturduuna min ayyi bakaan.
12 Wa nakhdumu be duraaʼna achaan niʼiichu.
Al-naas gaaʼidiin yiʼayyuruuna wa aniina nibaarukuuhum.
Yitaʼʼubuuna wa aniina nasburu.
13 Yihajju leena kalaam murr wa nuruddu leehum be nafas baarid.
Wa bigiina misil cheyy al-kulla naas al-dunya yakrahooh wa yidaffuguuh barra.
14 Ana ma katabt al-kalaam da achaan niʼayyibku.
Intu iyaali al-nihibbuku wa katabtah achaan nihazzirku.
15 Akuun induku naas katiiriin al-yidooru yirabbuuku fi derib al-Masiih laakin abbahaat katiiriin ma induku.
Aywa,
ana wiheedi bigiit abuuku achaan ana ballakht leeku bichaarat al-Masiih wa beyi ana bas,
intu dakhaltu fi alaakhitku maʼa l-Masiih Isa.
16 Achaan da nihannisku.
Taabuʼu derbi ana.
17 Wa fi chaan da bas,
ana rassalt leeku Timuutaawus.
Taʼarfu kadar be niʼmat Rabbina hu bigi wileedi al-amiin al-niriidah bilheen.
Hu yifakkirku be haali ana fi derib al-Masiih wa di bas al-haal al-niʼallimha le l-muʼminiin fi ayyi bakaan.
18 Waahidiin minku bigo mustakbiriin.
Akuun fi fikirhum ana abadan ma namchi leeku.
19 Laakin kan Rabbina gaal aamiin,
namchi leeku gariib.
Wa fi l-yoom da,
naʼarif al-mustakbiriin dool.
Ma nidoor nasmaʼ kalaamhum.
Gudrithum bas nidoor nichiifha.
20 Achaan mamlakat Allah ma mabniiye be kalaam al-naas.
Hi mabniiye be gudrat Allah.
21 Wa tidooru chunu ?
Tidooru najiiku be asa walla najiiku be mahabba wa nafas baarid ?