Buulus wa Abuluus akhwaan fi khidmit Allah
3
Ya akhwaani,
wakit ana maʼaaku ma gidirt nihajji leeku misil intu naas al-induhum al-Ruuh al-Khudduus.
Intu gaaʼidiin titaabuʼu fikir al-bachar.
Fi derib al-Masiih intu misil atfaal dugaag.
2 Achaan da bas,
ana allamtuku be taʼliim hayyin misil ridaaʼat al-laban wa ma be taʼliim gawi misil madikhiin al-asab achaan intu ma gidirtu takhbalo taʼliim gawi.
Ya hassaʼ intu ma tagdaro.
3 Intu gaaʼidiin titaabuʼu fikir al-bachar wa ma fikir Allah.
Intu gaaʼidiin tilhaasado wa tilkhaalato ambeenaatku.
Hal da ma yisabbit kadar fikirku fikir al-bachar wa haalku misil haal naas al-dunya walla ?
4 Naadum waahid buguul «
Ana hana Buulus »
wa naadum aakhar buguul «
Ana hana Abuluus ».
Wa kan tihajju misil ke khalaas,
intu misil naas al-dunya.
5 Wa Abuluus hu yaatu ?
Wa ana Buulus kula yaatu ?
Aniina khaddaamiin bas wa be sabab kalaamna intu aamantu.
Ayyi waahid minnina sawwa al-khidme al-Rabbina kallafah beeha.
6 Intu misil jineene wa ana teerabt foogha kalaam Allah wa Abuluus zagaaha laakin Allah bas gawwam al-bizre.
7 Wa be da,
al-yiteerib ma kabiir wa l-yazgi ma kabiir illa Allah al-yigawwim al-bizre bas kabiir.
8 Wa l-yiteerib wa l-yazgi humman sawa sawa wa ayyi waahid yalga ujurtah hasab khidimtah.
9 Wa khalaas,
aniina akhwaan fi khidmit Allah wa intu bigiitu jineene hana Allah,
aw be masal aakhar,
intu al-beet al-Allah gaaʼid yabniih.
Masal al-buna
10 Wa ana misil bannaay al-baʼarif khidimtah wa be l-niʼma al-Allah antaani ana khatteet asaas al-beet wa naadum aakhar ja bana foogah.
Wa ayyi naadum al-yabni foogah waajib yukhutt baalah fi khidimtah.
11 Naadum ma yagdar yukhutt asaas aakhar min al-asaas al-gaaʼid wa l-asaas da Isa al-Masiih.
12 Wa hassaʼ ayyi naadum yabni foog al-asaas da.
Wa waahidiin yabnu foogah be dahab walla be fudda walla be hajar luʼlu wa waahidiin yabnu be hatab walla be gechch walla be ageeg.
13 Wa l-khidme al-ayyi naadum khadamha tinʼarif achaan yoom al-Hisaab yiwassifha achaan al-yoom da yaji be naar wa l-naar tijarrib khidimtah wa tiwassif khidme hana ayyi naadum kan adiile walla ma adiile.
14 Wa kan naadum bana foog al-asaas wa l-naar ma akalat khidimtah,
al-naadum da yalga ujra.
15 Wa kan naadum bana foog al-asaas wa l-naar akalat khidimtah,
khalaas khidimtah talaʼat khasaara laakin hu zaatah yanja.
Wa hu yanja misil al-naadum al-fazaʼooh min ust al-naar al-ma faddal leyah cheyy.
16 Intu nisiitu walla ?
Intu zaatku Beet Allah.
Ruuh Allah saakin foogku.
17 Kan naadum tallaf Beet Allah,
al-naadum da Allah yitallifah.
Achaan Beet Allah hu mukhaddas.
Wa intu bas al-beet da.
18 Khalli naadum ma yukhuchch nafsah.
Ayyi naadum minku al-yuguul hu indah fikir adiil wa fikrah fikir hana naas al-dunya,
khalli yabga jaahil achaan yalga al-fikir al-sahiih.
19 Achaan fikir naas al-dunya baatil giddaam Allah.
Wa maktuub fi l-Kitaab <Allah yakrub al-ulama fi najaadithum>
20 wa battaan <Allah yaʼarif kadar afkaar al-ulama ma induhum faayde>.
21 Achaan da,
ma tisawwu nufuusku kubaar fi ayyi insaan.
Achaan kulla cheyy hanaaku.
22 Aywa,
Buulus wa Abuluus wa Butrus kulluhum hineeku intu.
Wa l-dunya wa l-haya wa l-moot wa l-wakit al-haali wa l-wakit al-jaayi kulluhum hineeku.
23 Wa intu hana l-Masiih wa l-Masiih hu hana Allah.