Fikir Allah wa Ruuh Allah
2
Ya akhwaani,
wakit ana macheet leeku,
ballakht leeku kalaam Allah al-awwal al-naas ma irifooh.
Laakin ma ballakhtah be kalaam saʼab ziyaada wa ma hajjeet leeku misil aalim kabiir.
2 Wa chilt niiye achaan nikallim leeku misil ma naʼarif cheyy illa Isa al-Masiih wa mootah fi l-saliib.
3 Wa ana faagid al-gudra wakit ana gaaʼid maʼaaku wa khaayif bilheen.
4 Wa kallamt leeku be kalaam hayyin wa ma jibtuku fi l-derib be kalaam al-biraddi guluubku wa la be fikir insaani.
Fi badal al-kalaam da,
khalleet al-Ruuh al-Khudduus yiwassifku gudurtah.
5 Wa misil da,
tabgo muʼminiin ma be sabab fikir insaani laakin be gudrat Allah.
6 Wa laakin kan aniina gaaʼidiin maʼa muʼminiin kubaar fi l-iimaan,
nikallumu leehum be fikir adiil.
Wa l-fikir da ma yichaabih fikir naas al-dunya wa la fikir kubaaraat naas al-dunya al-laabudda yabgo ma fiihum.
7 Wa niʼarrufu al-naas sirr Allah al-hu fikir Allah al-ma irifooh.
Wa gubbaal bidaayit al-dunya,
Allah kharrar be l-fikir da yiwaddiina fi majdah.
8 Wa ma fi naadum min kubaaraat al-zaman da fihim niiyit Allah di.
Kan awwal fihmooha,
ma yaktulu Rabbina al-majiid fi l-saliib.
9 Wa khalaas,
da muwaafig maʼa l-kalaam al-maktuub fi l-Kitaab <Le l-naas al-yihibbu Allah,
hu jahhaz leehum cheyy ajiib bilheen.
Wa l-naas abadan ma chaafo cheyy mislah wa la simʼo foogah khabar.
Wa raay fi cheyy misil da abadan ma dakhal fi galib insaani>.
10 Wa l-cheyy al-Allah jahhazah da,
hu wassafah leena be l-Ruuh al-Khudduus.
Achaan al-Ruuh al-Khudduus yichiif kulla cheyy wa yaʼarif fikir Allah wa asraarah.
11 Akiid,
al-naas ma yaʼarfu afkaar naadum illa l-naadum zaatah yaʼarif afkaarah.
Wa misil da,
ma fi naadum yaʼarif afkaar Allah illa Ruuh Allah yaʼarif afkaar Allah.
12 Wa Allah antaana al-Ruuh al-Khudduus wa l-Ruuh al-Khudduus da ma jaayi min al-dunya.
Hu Ruuh Allah al-naazil leena fi chaan yiʼarrifna al-barakaat al-Allah antaahum leena.
13 Wa aniina nikallumu be l-barakaat deel le l-naas.
Wa ma nihajju beehum be l-kalaam al-allamnaah min al-ilim al-insaani.
La.
Nihajju be l-kalaam al-allamah leena al-Ruuh al-Khudduus.
Wa nifassuru taʼaaliim al-Ruuh al-Khudduus le l-naas al-induhum al-Ruuh al-Khudduus.
14 Wa naadum aadi ma yakhbal kalaam hana l-Ruuh al-Khudduus.
Fi fikrah,
kalaam al-Ruuh al-Khudduus baatil wa hu ma yafhamah.
Achaan naadum ma yafhamah illa be gudrat al-Ruuh al-Khudduus.
15 Wa l-naadum al-indah al-Ruuh al-Khudduus hu yakchif kulla cheyy laakin ma fi naadum al-indah hagg yakchifah hu.
16 Achaan maktuub fi l-Kitaab <Yaatu al-indah hagg yiʼallim Allah ?
Yaatu al-irif fikrah ?>.
Wa laakin aniina fikirna wa fikir al-Masiih waahid.