Al-muʼminiin wa l-hakuuma
13
Khalli ayyi naadum yasmaʼ kalaam al-hakuuma achaan ma fi hakuuma illa be izin Allah wa ayyi hakuuma al-gaaʼide Allah assasaaha.
2 Achaan da,
ayyi naadum al-yikhaalif al-hakuuma,
yikhaalif al-cheyy al-Allah assasah.
Wa l-yikhaalif da,
hukum Allah yanzil foogah.
3 Achaan al-naadum al-haalah adiile ma yakhaaf min al-kubaaraat illa al-naadum al-haalah fasle hu yakhaaf minhum.
Kan tidoor ma takhaaf min al-haakim,
khalaas sawwi al-kheer wa l-haakim yachkurak.
4 Al-haakim hu khaddaam Allah achaan yisawwi leek al-kheer.
Laakin kan inta mujrim laabudda takhaaf minnah achaan al-haakim indah al-seef wa ma yichiilah saakit.
Hu khaddaam Allah achaan yinazzil khadab Allah fi l-mujrim.
5 Achaan da,
waajib tasmaʼo kalaam al-hakuuma.
Wa da ma achaan takhaafo min al-khadab bas laakin kula achaan tidooru tiʼiichu be niiye mukhlisa.
6 Wa achaan da,
waajib tikaffu al-miiri kula.
Al-kubaaraat humman khaddaamiin Allah wa yichtakhalo be l-khidme al-antaaha leehum di.
7 Antu ayyi naadum al-cheyy al-waajib leyah.
Wa l-naadum al-waajib leyah tikaffu al-miiri,
kaffuuh leyah.
Wa l-naadum al-waajib leyah tikaffu jamaarik,
kaffuuh leyah.
Wa l-naadum al-waajib leyah ihtiraam,
ihtarumuuh.
Wa l-naadum al-waajib leyah al-ikraam,
karrumuuh.
Al-mahabba hi waajbe
8 Ma tikhallu al-deen yagood foogku.
Deen waahid bas gaaʼid foogku wa hu al-mahabba ambeenaatku.
Wa l-naadum al-yihibb akhuuh,
hu tabbag wasaaya Allah khalaas.
9 Achaan al-wasaaya misil ma tazna wa ma taktul wa ma tasrig wa ma tatmaʼ wa kulla l-wasaaya al-aakhariin deel,
zibdithum hi al-wasiiye al-tuguul <Hibb akhuuk misil tihibb nafsak>.
10 Al-naadum al-yihibb akhuuh abadan ma yisawwi leyah cheyy fasil.
Wa be misil da,
al-naadum al-yihibb al-naas yitabbig al-wasaaya be l-sahiih.
11 Wa khalaas,
taʼarfu kadar aniina gaaʼidiin fi wakit al-weenu.
Al-wakit tamma khalaas.
Chiddu heelku,
yoom al-naja gariib leena hassaʼ wa ma baʼiid minnina misil wakit awwal aamanna.
12 Al-leel gariib yikammil wa l-nahaar jaayi gariib.
Waajib nikhallu minnina kulla fiʼil hana l-dalaam wa nijahhuzu nufuusna achaan niʼiichu fi l-nuur.
13 Khalli haalna tukuun haal hana iyaal al-nuur.
Wa khalli ma namchu fi l-safaaha wa l-sakar,
wa la fi l-zina wa l-fasaad,
wa la fi l-duwaas wa l-husud.
14 Wa fi badal al-zunuub dool,
arbutu sulubku wa khuttu fi uguulku intu khaddaamiin le Rabbina Isa al-Masiih wa aabo ma tichtakhalo be chahwaat al-insaan.