Al-daʼiif wa l-gawi fi l-iimaan
14
Akhbalo al-muʼmin al-daʼiif fi iimaanah wa ma tikhaalutuuh fi fikrah.
2 Hasab iimaan naas waahidiin,
kulla nafar al-akil halaal.
Wa laakin al-naas al-iimaanhum daʼiif abadan ma yaakulu ayyi laham.
3 Al-naadum al-yaakul ayyi nafar al-akil waajib ma yahgir al-muʼmin al-ma yaakul al-laham.
Wa l-ma yaakul al-laham waajib ma yuluum al-naadum al-yaakul kulla cheyy achaan akhuuk da Allah khiblah khalaas.
4 Inta yaatu al-tuluum al-khaddaam al-inta ma sayyidah ?
Sayyidah bas yuguul kan hu saabit walla ma saabit.
Wa akiid hu yagood saabit achaan Rabbina yagdar yisabbitah.
5 Wa fi fikir naas waahidiin,
fiyah yoom waahid muhimm ziyaada min al-ayyaam al-aakhariin.
Wa fi fikir naas aakhariin,
kulla l-ayyaam sawa sawa.
Khalli ayyi naadum yabga muʼakkid fi nafsah.
6 Al-naadum al-yikhassis yoom waahid yikhassisah achaan yikarrim Allah.
Wa l-naadum al-yaakul kulla nafar al-akil yachkur Allah fi chaanah wa be da yikarrim Allah.
Wa l-naadum al-ma yaakul al-laham yaaba ma yaakulah achaan hu yidoor yikarrim al-Rabb wa hu kula yachkur Allah.
7 Ma fi naadum minnina yiʼiich le nafsah bas wa ma fi naadum minnina yumuut le nafsah bas.
8 Kan niʼiichu,
niʼiichu le Rabbina wa kan numuutu,
numuutu le Rabbina.
Wa misil da,
kan aniina hayyiin walla maytiin,
aniina hana Rabbina.
9 Fi l-sabab da bas,
al-Masiih maat wa baʼas achaan yabga Rabb al-hayyiin wa Rabb al-maytiin.
10 Wa inta,
maala gaaʼid tuluum akhuuk ?
Wa inta,
maala gaaʼid tahgir akhuuk ?
Ayyi waahid minnina yagiif giddaam kursi Allah fi yoom al-Hisaab.
11 Achaan da,
maktuub fi l-Kitaab <Akiid ana hayy wa kulla rukba tabruk giddaami wa ayyi lisaan yachhad ana Allah al-Majiid.
Da bas kalaam Allah>.
12 Wa be misil da,
fi yoom al-Hisaab,
kulla naadum minnina masʼuul giddaam Allah fi l-cheyy al-sawwaah.
13 Achaan da,
khalliina ma nuluumu akhwaanna.
Akheer nichiilu niiye achaan abadan ma nisawwu al-cheyy al-akhuuna yichakkik foogah lahaddi yamurgah min al-derib.
14 Ana naʼarfah achaan al-Rabb Isa akkadah leyi kadar kulla nafar al-akil halaal fi zaatah.
Laakin al-akil yabga haraam le l-naadum al-fi fikrah al-akil da haraam.
15 Kan al-akil al-taakulah yisabbib le akhuuk muchkila,
inta ma maachi fi derib al-mahabba.
Ma tikhalli akilak yisabbib halaak le akhuuk al-Isa al-Masiih maat fi chaanah.
16 Ma tikhallu al-chokhol al-sameh leeku yisabbib kalaam cheen.
17 Achaan al-muhimm fi Mamlakat Allah ma al-akil wa l-charaab laakin hu al-adaala wa l-salaama wa l-farha fi l-Ruuh al-Khudduus.
18 Al-naadum al-yitaabiʼ al-Masiih misil da,
Allah yarda beyah wa l-naas kula yikarrumuuh.
19 Be misil da,
khalli nijaahudu achaan nisawwu al-cheyy al-yisabbit al-salaam ambeenaatna wa l-yigawwiina kullina.
20 Ma titallif amal Allah be sabab al-akil.
Sahiih,
kulla nafar al-akil halaal fi zaatah.
Laakin ayyi akil al-taakulah al-yisabbib le akhuuk chakak,
da haraam leek.
21 Kan ma taakul al-laham wa ma tachrab al-khamar wa kan taaba ayyi cheyy al-yiwaddir akhuuk,
misil da tisawwi al-cheyy al-adiil.
22 Al-cheyy al-tiʼaamin beyah fi l-kalaam da,
khalli yabga beenak wa been Allah.
Mabruuk le l-naadum al-gaaʼid yisawwi al-cheyy al-nafsah tarda beyah wa ma yuluum nafsah be sababah.
23 Wa ayyi naadum al-yichakkik fi galbah fi l-cheyy al-gaaʼid yaakulah,
Allah yuluumah achaan ma gaaʼid yitaabiʼ iimaanah.
Ayyi cheyy al-nisawwuuh al-ma hasab al-iimaan,
hu zanib.