Al-ibaada al-waajbe
12
Ya akhwaani,
achaan kulla l-kalaam da wa be sabab kutur rahmat Allah al-ligiituuha,
niwassi ayyi waahid minku achaan yigaddim jismah le Allah dahiiye hayye wa mukhaddasa misil Allah yarda beeha.
Wa diihi ibaaditku al-waajbe.
2 Aabo ma titaabuʼu fikir hana naas al-dunya laakin khalli Allah yikhayyirku wa yantiiku al-agul al-jadiid al-beyah tagdaro timayyuzu muraadat Allah wa taʼarfu al-cheyy al-adiil wa l-cheyy al-Allah yarda beyah wa l-cheyy al-tamaam.
3 Wa be l-niʼma al-Allah antaaha leyi,
niwassiiku achaan naadum minku ma yistakbar.
Khalli ayyi waahid yahsib nafsah be fikir adiil hasab gudrat al-iimaan al-Allah antaaha leyah.
4 Chiifu,
al-naadum indah fi jismah al-waahid aʼda katiiriin wa kulla udu ma yisawwi nafs al-khidme.
5 Be misil da kula,
aniina naas katiiriin laakin bigiina misil jisim waahid fi l-Masiih.
Wa ayyi waahid hu udu fi l-jisim da wa bigi akhu le l-aakhariin kulluhum.
6 Indina ataaya chig chig hasab niʼmat Allah.
Wa kan Allah anta le naadum gudra le yihajji kalaam naazil min Allah,
khalli yihajji fi huduud al-iimaan.
7 Wa kan Allah anta le naadum gudra le yakhdim fi ust al-akhwaan,
khalli yakhdim.
Wa kan Allah anta le naadum gudra le yiʼallim al-naas,
khalli yiʼallimhum.
8 Wa kan Allah anta le naadum gudra le yichajjiʼ al-akhwaan,
khalli yichajjiʼhum.
Wa kan Allah anta le naadum gudra le yanti,
khalli yanti be galib nadiif.
Wa kan Allah anta le naadum gudra le yuguud akhwaanah,
khalli yukhutt baalah wa yuguudhum adiil ke.
Wa kan Allah anta le naadum gudra le yihinn fi l-naas,
khalli yihinn fiihum be l-farah.
9 Hibbu ayyi naadum be mahabba sahiihe.
Akraho al-charr marra waahid wa akurbu al-kheer gawi.
10 Arraayado ambeenaatku misil akhwaan wa khalli ayyi waahid yichiil niiye achaan yihibb akhuuh be l-ihtiraam.
11 Taabuʼu Rabbina be niiye waahide wa bala kasal.
Inkarubu fi khidmit al-Rabb.
12 Afraho achaan induku acham fi Rabbina.
Asburu fi l-taʼab wa sallu daayman bala kasal.
13 Saaʼudu al-muhtaajiin al-ambeen al-saalihiin wa dayyufu be l-farah al-diifaan al-bajuuku.
14 Saamuhu al-naas al-yitaʼʼubuuku wa baarukuuhum.
Aywa,
baarukuuhum wa ma tanʼaloohum.
15 Afraho maʼa l-farhaaniin wa ahzano maʼa l-haznaaniin.
16 Alwaafago ambeenaatku wa khalli ayyi waahid ma yajʼal nafsah kabiir laakin khalli yajʼal nafsah sakhayyar.
Ma tisawwu nufuusku induku irfe katiire.
17 Kan naadum sawwa foogku chokhol fasil,
ma tisawwu leyah chokhol fasil.
Fakkuru wa sawwu al-cheyy al-kulla l-naas yardo beyah.
18 Jaahudu be ayyi daliil achaan tiʼiichu be l-salaam maʼa kulla l-naas.
19 Ya l-mahbuubiin,
ma tikaffu al-taar.
Khallu khadab Allah yichiil leeku al-taar achaan maktuub fi l-Kitaab <Al-taar hanaayi.
Ana bas al-nichiilah.
Da bas kalaam Allah>.
20 Akheer kan titaabuʼu al-kalaam al-buguul <Kan aduuk jiiʼaan,
antiih yaakul.
Wa kan hu atchaan,
antiih yachrab.
Kan tisawwi misil ke da,
tusubb eeb misil jamur fi raasah>.
21 Ma tikhallu al-charr yansur foogku laakin ansuru foog al-charr be l-kheer.