Al-zanib wa churuut al-Tawraat
7
Ya akhwaani,
intu al-nihajji leeku taʼarfu chariiʼat al-Tawraat.
Wa akiid taʼarfu kadar al-chariiʼa indaha gudra fi l-naadum wakit hu hayy bas.
2 Masalan,
al-mara al-maakhde marbuuta maʼa raajilha be l-chariiʼa wakit hu hayy.
Laakin kan raajilha maat,
al-mara tabga hurra min rubaat al-chariiʼa.
3 Wa be misil da,
kan machat akhadat raajil aakhar wakit raajilha lissaaʼ gaaʼid hayy,
al-chariiʼa tuguul hi zaaniye.
Laakin kan raajilha maat,
hi tabga hurra min al-chariiʼa di.
Wa kan tamchi taakhud raajil aakhar kula,
al-chariiʼa ma tuguul hi zaaniye.
4 Wa bigi leeku misil da,
ya akhwaani.
Wakit katalo al-Masiih,
intu muttu fi jismah wa bigiitu hurriin min churuut al-Tawraat.
Wa be da,
tagdaro tichiilu sayyid aakhar wa hu al-naadum al-baʼas min ust al-maytiin.
Wa nadkhulu fi l-alaakha al-maʼaayah di achaan nisawwu al-kheer al-Allah yidoorah.
5 Wakit aniina lissaaʼna aaychiin be l-gudra al-insaaniiye bas,
wasaaya al-Tawraat sabbabo fi ajsaamna al-chahwaat al-fasliin wa l-chahwaat dool lazzoona le nisawwu al-cheyy al-yiwaddiina le l-moot.
6 Laakin hassaʼ aniina hurriin min churuut al-Tawraat achaan mutna maʼa al-Masiih wa anhalleena min churuut al-Tawraat.
Wa be misil da,
naʼabudu Allah ma be l-ibaada al-gadiime al-hasab al-kalaam al-maktuub,
laakin be gudrat al-Ruuh al-Khudduus fi l-haya al-jadiide.
7 Wa kan nuguulu wasaaya al-Tawraat sabbabo foogna zunuub,
fi l-kalaam da nuguulu al-Tawraat wa l-zunuub akhwaan walla ?
La,
abadan.
Ma ke achaan awwal ana ma irift al-zanib wa l-Tawraat bas hu arrafaani leyah.
Awwal kan al-Tawraat ma gaal <Ma tatmaʼ>,
ana ma naʼarif al-tamaʼ.
8 Laakin al-zanib ligi fursa be l-wasiiye wa sabbab foogi kulla nafar al-tamaʼ.
Achaan kan wasaaya Allah ma fiihum,
al-zanib mayyit.
9 Awwal ana hayy wa ma irift kalaam al-Tawraat laakin al-wasiiye jaat leyi wa l-zanib hiyi foogi
10 wa khalaas ana mutt.
Wa be misil da,
al-wasiiye al-dawwarat tiwaddiini le l-haya waddatni le l-moot.
11 Achaan al-zanib ligi fursa be jayyit al-wasiiye wa gamma khachchaani wa karab al-wasiiye achaan yaktulni beeha.
12 Wa khalaas,
al-Tawraat mukhaddas wa l-wasiiye mukhaddasa wa saalhe wa adiile.
13 Wa be misil da,
al-cheyy al-adiil katalaani walla ?
La,
abadan.
Laakin al-zanib karab al-cheyy al-adiil wa beyah sabbab foogi al-moot.
Wa misil da,
al-zanib yinʼarif.
Wa be l-wasiiye zaatha,
charr al-zanib yinchaaf marra waahid.
14 Naʼarfu kadar kalaam al-Tawraat hu hana l-Ruuh,
yaʼni jaayi min Allah,
laakin ana bachari bas.
Ana misil abid wa l-zanib hu misil siidi.
15 Ana ma nafham al-cheyy al-nisawwiih achaan al-cheyy al-ana nidoor nisawwiih,
da ma nisawwiih.
Laakin al-cheyy al-ma niriidah,
da bas al-cheyy al-nisawwiih.
16 Wa kan ana gaaʼid nisawwi al-cheyy al-fi nafsi ma nidoor nisawwiih,
misil da ana nistafig maʼa kalaam Allah wa nuguul hu sahiih wa adiil.
17 Wa be da,
ana ma al-naadum al-yisawwi al-fiʼil da.
Al-yisawwi al-fiʼil hu al-zanib al-gaaʼid foogi.
18 Naʼarif ma fi cheyy adiil gaaʼid foogi,
yaʼni fi tabiiʼti al-bachariiye.
Indi niiye nisawwi al-kheer laakin ma nagdar.
19 Ma nisawwi al-kheer al-nidoor nisawwiih laakin al-fasaala al-ma nidoor nisawwiiha,
di bas al-cheyy al-nisawwiih.
20 Wa kan ana gaaʼid nisawwi al-cheyy al-ma nidoor nisawwiih,
be misil da al-bisawwiih ma ana laakin hu al-zanib al-gaaʼid foogi.
21 Ana chift kadar da bas al-cheyy al-daayman bigi leyi.
Kan nidoor nisawwi al-kheer,
illa al-fasaala titaatir leyi.
22 Fi galbi,
ana niriid wasaaya Allah
23 laakin nihiss fi nafsi cheyy aakhar al-gaaʼid fi jismi al-yidoor yamlukni wa hu yidaawis fikri.
Wa khalaas,
ana bigiit masjuun fi tihit muluk al-zanib al-gaaʼid fi jismi.
24 Haay !
Ana naadum taʼbaan marra waahid.
Yaatu al-yinajjiini min jismi da al-yiwaddiini fi l-moot ?
25 Illa Allah yinajjiini be Rabbina Isa al-Masiih wa l-hamdulillah.
Wa khalaas,
be misil da ana abid le Allah fi agli wa nidoor nitaabiʼ muraadtah laakin ana kula abid le l-zanib fi nafsi wa nitaabiʼ muraadat al-zanib achaan ana bachar bas.