Hurriiye min muluk al-zanib
6
Wa kan rahmat Allah kitirat ziyaada fi l-bakaan al-zanib awwal kitir foogah,
aniina nisawwu chunu ?
Hal waajib nagoodu battaan fi zunuubna achaan rahmat Allah tiziid foogna be ziyaada walla ?
2 La,
abadan.
Aniina mutna wa maragna min muluk al-zanib.
Kikkeef niʼiichu foogah battaan ?
3 Hal intu ma iriftu kadar aniina kullina al-khattasoona le nabgo waahid maʼa l-Masiih Isa,
bigiina be l-khattisiin da waahid maʼaayah fi mootah ?
4 Abuuna Allah baʼas al-Masiih be gudurtah al-majiide.
Wa wakit khattasoona,
aniina mutna wa dafanoona maʼa l-Masiih achaan nugummu namchu maʼaayah kula be haya jadiide.
5 Achaan kan aniina bigiina waahid maʼa l-Masiih wa mutna maʼaayah fi mootah,
akiid nabgo maʼaayah waahid fi buʼaasah al-bigi khalaas.
6 Naʼarfu kadar awwal aniina naas hana Adam wa laakin alaakhitna maʼa Adam maatat fi l-saliib maʼa l-Masiih.
Wa misil da,
gudrat al-zanib al-awwal gaaʼide fi ajsaamna bigat baatle.
Wa khalaas,
ma nukuunu battaan abiid le l-zanib
7 achaan al-naadum al-maat hu muharrar min gudrat al-zanib.
8 Wa kan mutna maʼa l-Masiih,
niʼaamunu kadar nahyo maʼaayah kula.
9 Wa naʼarfu kadar Allah baʼas al-Masiih min ust al-maytiin wa l-Masiih abadan ma yumuut battaan achaan al-moot ma indah foogah gudra.
10 Hu maat wa be mootah da,
hu marag min al-bakaan al-maalik foogah al-zanib laakin hassaʼ hu hayy wa aayich fi alaakha maʼa Allah.
11 Wa be misil da,
waajib tukhuttu fi uguulku kadar intu maragtu min gudrat al-zanib be l-moot wa bigiitu hayyiin fi l-Masiih Isa wa beyah hu tiʼiichu fi alaakha maʼa Allah.
12 Ma tikhallu al-zanib yamluk fi ajsaamku al-baʼadeen yumuutu.
Wa ma tikhallu al-zanib yilizzuku achaan titaabuʼu chahwaat ajsaamku.
13 Ma tisallumu battaan ajsaamku le l-zanib al-yidoor yisawwi beehum al-fasaala.
Laakin be l-aks,
aʼarfu kadar intu maragtu min al-moot wa dakhaltu fi l-haya.
Wa khalaas,
sallumu nufuusku le Allah.
Sallumu ajsaamku kulla ke le Allah achaan hu yisawwi beehum al-kheer.
14 Al-zanib ma indah gudra foogku battaan achaan hassaʼ intu ma tihit churuut al-Tawraat laakin intu tihit rahmat Allah.
15 Wa da kikkeef ?
Hal naznubu achaan aniina aaychiin tihit rahmat Allah wa ma tihit churuut al-Tawraat walla ?
La,
abadan.
16 Taʼarfu adiil kadar kan tisallumu nufuusku le naadum achaan titaabuʼu kalaamah misil abiid,
khalaas intu abiid le l-naadum al-titaabuʼu kalaamah da.
Kan tabgo abiid le l-zanib da,
al-zanib yiwaddiiku fi l-moot wa laakin kan titaabuʼu kalaam Allah,
hu yisawwiiku saalihiin.
17 Wa l-hamdulillah,
awwal intu kuntu abiid le l-zanib laakin hassaʼ titaabuʼu be kulla guluubku al-taʼliim al-Allah nazzalah leeku.
18 Intu muharrariin min al-zanib wa bigiitu abiid Allah al-saalihiin.
19 Fikirku fikir insaani wa achaan da,
ana gaaʼid nihajji be kalaam hayyin misil al-naas buguuluuh.
Misil awwal sallamtu ajsaamku le l-zunuub al-najjasooku wa le l-khataaya al-sawwooku khaatiyiin be ziyaada,
hassaʼ waajib tisallumu ajsaamku le l-haal al-saalhe wa tabgo naas Allah al-saalihiin.
20 Wa wakit intu kuntu abiid le l-zanib,
ma gidirtu titaabuʼu al-haal al-saalhe.
21 Wa ween al-faayde al-ligiituuha min al-zunuub al-awwal sawweetuuhum dool ?
Hassaʼ al-eeb karabaaku be sababhum achaan al-zunuub dool yiwaddu al-naas le l-moot.
22 Laakin hassaʼ intu muharrariin min al-zanib wa bigiitu abiid Allah.
Wa l-faayde al-talgooha,
hi al-haal al-saalhe wa hi tiwaddi al-naas le l-haya al-abadiiye.
23 Achaan ujrat al-zanib hi al-moot wa l-atiiye al-Allah yantiiha bala taman hi al-haya al-abadiiye fi Rabbina Isa al-Masiih.