Al-salaama wa l-farha be l-Masiih
5
Wa khalaas,
bigiina saalihiin be sabab al-iimaan wa achaan da aniina gaaʼidiin be l-salaam maʼa Allah be Rabbina Isa al-Masiih.
2 Wa be l-Masiih bas gidirna dakhalna fi l-niʼma di al-aniina saabtiin foogha.
Wa nafraho be acham kadar nalhago majd Allah.
3 Wa ziyaada min da,
nafraho kula fi l-taʼab al-yaji foogna achaan naʼarfu al-taʼab yantiina al-sabur.
4 Wa l-sabur yigawwi guluubna.
Wa kan guluubna bigo gawiiyiin,
indina acham.
5 Wa l-acham da abadan ma yifachchilna achaan Allah nazzal mahabbitah fi guluubna be l-Ruuh al-Khudduus al-hu antaah leena.
Al-suluh be l-Masiih
6 Aywa,
achaan fi l-yoom al-Allah gataʼah,
wakit aniina ma indina gudra ninajju nufuusna,
al-Masiih maat fi chaan al-khaatiyiin.
7 Gaasi le l-naadum yumuut fi chaan naadum aakhar hatta kan al-naadum da saalih kula.
Akuun naadum yikhassid yumuut fi chaan naadum galbah abyad bilheen.
8 Laakin daahu kikkeef Allah wassaf leena mahabbitah al-kabiire.
Wakit aniina lissaaʼna muznibiin,
al-Masiih maat fi chaanna.
9 Wa kan al-Masiih sawwaana saalihiin be daffigiin dammah,
akiid hu kula yinajjiina min khadab Allah al-yaji baʼadeen foog al-naas.
10 Fi l-wakit al-aniina lissaaʼna udwaan Allah,
moot Ibnah saalahaana maʼaayah.
Wa be misil da,
kan indina suluh be sabab moot Ibnah,
akiid nanjo be buʼaas Ibnah.
11 Wa ziyaada min da,
hassaʼ aniina gaaʼidiin nafraho be l-alaakha al-indina maʼa Allah be Rabbina Isa al-Masiih.
Be l-Masiih bas,
aniina ligiina al-suluh.
Al-moot min Adam wa l-haya be l-Masiih
12 Wa khalaas be sabab naadum waahid,
al-zanib dakhal fi l-dunya.
Wa be sabab al-zanib,
al-moot kula ja.
Wa misil da,
al-moot lihig kulla l-naas achaan kulluhum aznabo.
13 Aywa,
al-zanib gaaʼid fi l-dunya gubbaal Allah ma yanti al-wasaaya le Muusa.
Laakin al-zunuub ma yinkatubu fi l-bakaan al-wasiiye ma fiiha.
14 Wa laakin al-moot gaaʼid yamluk foog al-naas min zaman Adam lahaddi zaman Muusa.
Wa gaaʼid yamluk foog al-naas kan zunuubhum ma misil khata hana Adam kula.
Wa Adam hu masal hana l-naadum al-yaji waraayah.
15 Laakin al-atiiye al-Allah antaaha bala taman di,
ma misil khata hana Adam.
Be sabab khata hana l-naadum al-waahid da,
naas katiiriin maato.
Wa laakin niʼmat Allah hi akbar min al-khata.
Wa hi al-niʼma al-jaat be l-naadum al-waahid Isa al-Masiih wa hi sawwat kheer katiir bilheen le naas katiiriin.
16 Wa atiiyit Allah chig min natiijat al-khata al-Adam sawwaah.
Al-hisaab ja baʼad al-khata al-waahid wa wadda kulla l-naas fi l-halaak.
Laakin al-atiiye al-bala taman di jaat baʼad al-naas sawwo khata katiir wa hi sawwat al-naas saalihiin.
17 Al-moot ja be sabab khata hana l-naadum al-waahid da.
Wa be sabab al-naadum al-waahid da bas,
al-moot malak foog al-naas.
Wa akiid al-naas al-ligo niʼmat Allah al-kabiire bilheen wa bigo saalihiin be l-atiiye al-bala taman,
humman yamluku fi l-haya al-abadiiye be l-naadum al-waahid Isa al-Masiih.
18 Wa be sabab khata hana naadum waahid,
kulla l-naas yahlako.
Wa laakin be sabab al-amal al-saalih al-naadum aakhar sawwaah,
kulla l-naas yagdaro yabgo saalihiin wa yalgo al-haya al-abadiiye.
19 Wa naadum waahid isi Allah wa sawwa naas katiiriin muznibiin.
Wa misil da battaan,
naadum waahid taaʼ Allah wa sawwa naas katiiriin saalihiin.
20 Wa baʼad zaman Adam,
churuut al-Tawraat jo achaan gudrat al-khata tinchaaf be ziyaada.
Laakin fi l-bakaan al-kitir foogah al-zanib,
rahmat Allah kitirat be ziyaada.
21 Wa awwal al-moot gamma malak foog al-naas be sabab al-zanib wa hassaʼ rahmat Allah tamluk fi l-naas wa tisawwiihum saalihiin wa tiwaddiihum fi l-haya al-abadiiye be Isa al-Masiih Rabbina.