Ibraahiim bigi saalih be sabab iimaanah
4
Wa be misil da,
nuguulu chunu fi abuuna al-bachari Ibraahiim ?
Bigi leyah chunu ?
2 Achaan kan Ibraahiim bigi saalih giddaam Allah be sabab al-cheyy al-sawwaah,
hu indah hagg yistakbar.
Laakin ma fi naadum indah hagg le yistakbar giddaam Allah.
3 Wa l-Kitaab buguul chunu ?
Buguul <Ibraahiim aaman be kalaam Allah wa Allah jaʼalah naadum saalih fi chaan iimaanah>.
4 Fakkuru fi l-kalaam da.
Kan naadum bakhdim,
hu balga ujra wa l-ujra di ma hadiiye.
Hi al-cheyy al-waajbe leyah.
5 Wa laakin al-naadum al-ma yukhutt achamah fi amalah laakin yiʼaamin be Allah al-yibarri al-muznibiin al-khaatiyiin,
al-muʼmin al-misil da Allah yajʼalah saalih.
6 Wa l-nabi Dawuud kula hajja be barakat al-naadum al-Allah jaʼalah saalih bala ma yichiif amalah.
7 Gaal <Mabruuk le l-naas al-Allah khafar leehum khataayaahum wa saamah leehum zunuubhum.
8 Mabruuk le l-naadum al-Allah ma yajʼalah muznib>.
9 Wa nasʼalku,
al-baraka di hint al-Yahuud ahal al-tahuura wiheedhum walla ?
La,
hi hint al-naas al-ma mutahhariin kula.
Gibeel,
gulna be sabab al-iimaan bas Allah jaʼal Ibraahiim saalih.
10 Wa Allah jaʼalah saalih mata ?
Hal da bigi wakit hu mutahhar walla wakit hu lissaaʼ ma mutahhar ?
Da bigi leyah wakit hu ma mutahhar,
gubbaal ma tahharooh.
11 Wa Allah anta alaamat al-tahuura le Ibraahiim achaan yiwassif kadar gubbaal ma tahharooh,
hu bigi saalih be sabab iimaanah.
Wa be misil da,
Ibraahiim bigi abu kulla l-naas al-Allah jaʼalaahum saalihiin be sabab iimaanhum wa humman ma mutahhariin.
12 Wa Ibraahiim bigi abu al-naas al-mutahhariin kula,
kan ma induhum al-tahuura wiheedha laakin induhum battaan iimaan misil al-iimaan al-abuuna Ibraahiim indah wakit hu lissaaʼ ma mutahhar.
Waʼad Allah wa l-iimaan
13 Wa Allah waaʼad Ibraahiim wa zurriiytah humman yawrusu al-dunya.
Wa Allah waaʼad Ibraahiim ma achaan hu taabaʼ churuut al-Tawraat laakin be sabab iimaanah al-bigi beyah saalih.
14 Achaan kan al-warasa hi hint al-naas al-yitaabuʼu churuut al-Tawraat bas,
al-iimaan ma bisawwi cheyy wa l-waʼad bigi baatil.
15 Churuut al-Tawraat yijiibu khadab Allah foog al-naas*.
Wa laakin kan wasiiye ma fi,
mukhaalafat al-wasiiye kula ma fi.
16 Wa achaan da,
Allah waaʼad be l-warasa fi asaas al-iimaan wa l-muʼminiin yalgooha be niʼmat Allah.
Wa Allah dawwar yiʼakkid kadar al-waʼad yabga le zurriiyit Ibraahiim kullaha.
Al-waʼad ma le ahal al-Tawraat bas laakin le kulla l-naas al-iimaanhum misil iimaan Ibraahiim.
Wa misil da,
hu abuuna kullina.
17 Wa achaan da bas,
fi l-Kitaab,
Allah gaal <Ana nisawwiik abu hana umam katiiriin>.
Wa khalaas hu abuuna giddaam Allah al-hu muʼmin beyah wa Allah hu bas al-yanti al-haya le l-maytiin wa be amrah,
hu yikawwin al-cheyy al-awwal ma mawjuud.
18 Wa wakit al-cheyy al-Ibraahiim gaaʼid yarjaah bigi mustahiil kula,
Ibraahiim aaman be kalaam Allah wa achamah fi Allah gaaʼid saabit.
Wa fi l-akhiir,
hu bigi abu hana umam katiiriin misil Allah awwal gaal leyah <Zurriiytak tabga katiire misil al-nujuum>.
19 Ibraahiim irif fi nafsah kadar hu bigi chaayib ma indah gudra le l-waaluuda achaan umrah misil miya sana.
Wa martah Saara kula ajuuz ma indaha battaan acham fi l-waaluuda.
Wa laakin iimaan Ibraahiim ma nagas.
20 Abadan ma chakkak fi waʼad Allah wa ma khalla minnah al-iimaan.
Laakin bigi gawi ziyaada fi iimaanah wa chakar Allah
21 achaan hu muʼakkid tamaam kadar Allah yagdar yitimm al-cheyy al-waaʼadah beyah.
22 Wa khalaas be sabab iimaanah da,
Allah jaʼalah saalih.
23 Al-kalimaat «
Allah jaʼalah naadum saalih »
dool ma ankatabo le Ibraahiim wiheedah bas.
24 Laakin ankatabo leena aniina kula achaan Allah yajʼalna saalihiin aniina al-muʼminiin be Allah al-baʼas Rabbina Isa min ust al-maytiin.
25 Allah sallamah le l-moot be sabab khataayaana wa baʼasah achaan beyah hu nabgo saalihiin.