3
Wa be misil da,
ween barakat al-Yahuud ?
Tahuurithum di indaha faayde walla ?
2 Aywa,
al-Yahuud induhum baraka kabiire bilheen.
Awwal cheyy,
Allah ammanaahum be kalaamah zaatah.
3 Wa kikkeef ?
Kan waahidiin minhum ma muʼminiin,
hal Allah yikhalli minnah al-waʼad al-antaahum achaan al-waahidiin ma induhum amaan walla ?
4 La,
abadan.
Kan kulla l-naas kaddaabiin kula,
Allah yuguul daayman al-hagg.
Achaan da,
al-Kitaab buguul <Ya Allah,
kan tikallim,
kalaamak yiwassif inta aadil wa fi l-hisaab inta bas al-naasir>.
5 Kan Allah yistaʼmal fasaalat al-Yahuud achaan yiwassif hu aadil,
nuguulu chunu ?
Hal nuguulu Allah yakhta kan yinazzil foog al-Yahuud khadabah walla ?
Be l-kalaam da,
nihajji be fikir insaani bas.
6 La,
abadan ma misil ke.
Kan Allah ma yagdar yihaasibna,
kikkeef yagdar yihaasib al-aalam ?
7 Akuun naadum waahid yuguul «
Sahiih,
ana kadabt laakin kidbi anta le Allah fursa achaan yiwassif be ziyaada kadar kalaamah sahiih.
Wa achaan da,
al-naas yachkuruuh be ziyaada.
Wa be misil da,
maala Allah yihaasibni maʼa al-muznibiin ? ».
8 Wa kan al-kalaam da adiil,
maala ma nuguulu «
Khalli nisawwu cheyy fasil achaan cheyy sameh yaji minnah ?
».
Wa da bas al-kalaam al-naas waahidiin buguulu be kidib hu taʼliimna. Al-azaab al-yaji fooghum waajib leehum.
Kulla l-naas muznibiin
9 Wa kikkeef ?
Aniina al-Yahuud akheer min al-naas al-aakhariin walla ?
La,
da ma sahiih.
Gibeel wassaft be kalaam waadih kadar al-Yahuud wa l-ma Yahuud kulluhum gaaʼidiin tihit al-zanib sawa sawa.
10 Wa l-Kitaab buguul <Ma fi naadum saalih wa la waahid kula.
11 Wa ma fi naadum waahid indah fikir adiil.
Ma fi naadum waahid yidoor Allah.
12 Kulluhum marago min al-derib al-adiil wa kulluhum waddaro marra waahid.
Ma fi naadum al-yisawwi al-kheer wa la waahid kula>.
13 <Al-kalaam al-maarig min khuchuumhum yisabbib al-moot.
Kulla cheyy al-yuguuluuh,
da khachch bas.
Wa kalaamhum misil samm al-dabaayib>.
14 <Gaaʼidiin yanʼalo al-naas be kalaam cheen marra waahid>.
15 <Katil al-naadum ma gaasi leehum.
16 Ayyi bakaan al-yamchu foogah,
yikharrubuuh wa yisabbubu foogah al-hizin.
17 Derib al-salaam abadan ma irifooh>.
18 <Wa abadan ma yakhaafo min Allah>.
19 Wa naʼarfu kadar ayyi cheyy al-maktuub fi l-Kitaab yihajji le ahal al-Kitaab.
Wa be misil da,
ma fi naadum waahid yifaddil le yidaafiʼ le nafsah giddaam Allah.
Wa khalaas kulla naas al-dunya tihit hisaab Allah.
20 Achaan ma fi insaan yabga saalih giddaam Allah be tabbigiin wasaaya Allah.
Wasaaya Allah gaaʼidiin achaan beehum al-zanib yinʼarif.
Allah yisawwi al-naas saalihiin
21 Laakin hassaʼ Allah bayyan al-derib al-beyah hu yisawwi al-naas saalihiin wa da ma be tabbigiin churuut al-Tawraat.
Wa laakin al-derib da,
al-Tawraat wa kutub al-anbiya gaaʼidiin yachhado leyah.
22 Allah yajʼal kulla l-naas saalihiin be derib al-iimaan be Isa al-Masiih wa yisawwi nafs al-cheyy le kulla l-naas al-yiʼaamunu.
Kulla l-naas sawa sawa
23 achaan kulla l-naas aznabo wa be da,
ma yagdaro yalhago majd Allah.
24 Laakin Allah yisawwi kulla l-naas saalihiin be l-niʼma al-yantiiha leehum bala taman be Isa al-Masiih al-faadaahum.
25 Allah gaddam al-Masiih misil dahiiye achaan dammah yamha zunuub al-naas al-yiʼaamunu beyah.
Wa Allah sawwa misil ke achaan yiwassif kadar hu daayman yisawwi al-adaala.
Fi l-zaman al-faat,
Allah ma haasab al-muznibiin be sabab sabrah al-aziim.
26 Wa fi l-zaman al-haali,
hu wassaf be l-dahiiye di kadar hu yisawwi al-adaala.
Wa be misil da,
hu aadil wa hu yibarri ayyi naadum al-yiʼaamin be Isa.
27 Wa kan bigi misil da,
al-insaan indah hagg yistakbar walla ?
La,
ma indah hagg waahid kula.
Wa chunu al-yadhar al-istikbaar ?
Al-kalaam al-buguul Allah yarda be l-naadum be sabab amalah abadan ma yadharah.
Illa l-kalaam al-buguul Allah yarda be naadum be sabab iimaanah bas yadhar al-istikbaar.
28 Achaan nuguulu be kalaam saabit kadar naadum yabga saalih giddaam Allah be sabab iimaanah wa ma achaan hu yitaabiʼ churuut al-Tawraat.
29 Walla nuguulu Allah hu Rabb al-Yahuud wiheedhum wa l-naas al-aakhariin hu ma Rabbuhum walla ?
Akiid,
hu Rabb kulla al-umam.
30 Achaan Allah waahid wa hu yibarri al-Yahuud be sabab al-iimaan wa yibarri al-aakhariin be sabab al-iimaan sawa sawa.
31 Wa be l-misil da,
hal baddalna marra waahid kalaam al-Tawraat be kalaam al-iimaan walla ?
La,
abadan.
Be l-aks,
aniina saabtiin foog al-Tawraat.