Fi Maalita
28
Wa wakit kullina maragna min al-bahar be l-aafe,
naadum waahid ooraana kadar al-jaziira di usumha Maalita.
2 Wa sukkaan Maalita zeeniin leena marra waahid wa faddaloona kullina.
Wa oogado leena naar achaan al-wata baarde wa almi bada yusubb.
3 Wa Buulus gaaʼid yukhumm hatab achaan yusubbah fi l-naar.
Wa ajala ke,
daabi waahid marag min al-hatab jaari min hamu al-naar wa adda Buulus fi iidah wa lisig foogha.
4 Wa wakit naas al-bakaan chaafo al-daabi laasig fi iidah,
hajjo ambeenaathum wa gaalo :
Akiid,
al-naadum da kattaal dimam !
Hu niji min al-bahar ma akalah wa laakin ilaah hana l-hagg ma dawwar hu yiʼiich wa hassaʼ katalah khalaas !
5 Wa laakin Buulus hatta iidah min al-daabi wa l-daabi wagaʼ fi l-naar wa cheyy ma bigi le Buulus.
6 Wa naas al-bakaan gaaʼidiin yarjo wa yidooru yichiifu Buulus yinnafikh walla yagaʼ yumuut ajala ke.
Wa rijo mudda tawiile wa cheyy ma bigi le Buulus.
Wa achaan da,
khayyaro afkaarhum wa gaalo :
Al-naadum da akiid waahid min al-ilaahaat.
7 Wa l-bakaan al-aniina gaaʼidiin foogah gariib le ziraaʼat hana naadum waahid usmah Bubliyuus wa hu kabiir hana naas Maalita.
Wa hu faddalaana wa dayyafaana fi beetah talaata yoom.
8 Wa abu Bubliyuus raagid wa indah wirde wa bisabbib damm.
Wa Buulus macha chaafah wa saʼal leyah Allah wa khatta iideenah foogah wa khalaas daawaah.
9 Wa baʼad da,
kulla l-naas al-mardaaniin al-fi Maalita jo leena wa ligo al-aafe.
10 Wa chakaroona katiir wa wakit dawwarna nisaafuru,
antoona kulla cheyy al-waajib le l-safar.
11 Wa gaʼadna talaata chuhuur fi Maalita.
Wa baʼad da,
rikibna fi safiina waahide.
Indaha foogha suura manjuura hana l-Tiimaan al-Samaawiyiin.
Hi min al-Iskandriiya wa gaaʼide fi Maalita tuul al-chite.
12 Wa macheena wisilna fi hillit Siraakuusa wa gaʼadna foogha talaata yoom.
13 Min hinaak,
macheena giddaam min hille le hille lahaddi wisilna fi hillit Riikhiyuun.
Wa gaʼadna fiiha yoom waahid.
Wa l-riih gammat tusuug min al-wati wa ambaakir lihigna khachum bahar hana Buutiyuuli.
14 Nazalna wa macheena ligiina akhwaan muʼminiin wa humman dayyafoona wa gaʼadna maʼaahum sabʼa yoom.
Wa khalaas,
wisilna fi Rooma.
15 Wa wakit al-akhwaan al-saakniin fi Rooma simʼo aniina jaayiin,
marago achaan yilaaguuna.
Waahidiin jo lahaddi Suug Abiyuus wa aakhariin le l-hille al-usumha al-Hanaawiit al-Talaata.
Wa wakit Buulus chaafaahum,
chakar Allah wa chadda heelah.
16 Wa wakit dakhalna fi Rooma,
masʼuul al-askar sallam al-masaajiin le l-khaayid wa anto izin le Buulus achaan yalga beet wa yaskun foogah wiheedah maʼa l-askari al-gaaʼid yaharsah.
Buulus fi madiinat Rooma
17 Wa baʼad talaata yoom,
Buulus naada kubaaraat al-Yahuud al-saakniin fi Rooma achaan yaju leyah.
Wa humman jo leyah wa hu hajja leehum wa gaal :
Ya l-akhwaan,
ana ma sawweet cheyy didd chaʼabna wa ma sawweet cheyy didd aadaat juduudna laakin karabooni fi Madiinat al-Khudus wa sallamooni le l-Roomaaniyiin.
18 Wa l-Roomaaniyiin saʼalooni fi l-kalaam da wa dawwaro yatluguuni.
Wa gaalo al-moot ma waajib leyi.
19 Laakin al-Yahuud aarado achaan ma yatluguuni.
Wa ma gidirt nisawwi cheyy illa natlub izin nidaafiʼ le nafsi giddaam al-sultaan.
Wa abadan ma nidoor nigaddim chakwa foog akhwaani al-Yahuud.
20 Wa achaan da,
dawwart nihajji maʼaaku.
Wa ana marbuut be l-jinziir da fi chaan al-naadum al-Bani Israaʼiil gaaʼidiin yarjooh be acham.
21 Wa l-Yahuud gaalo leyah :
Ma ligiina foogak maktuub min daar al-Yahuudiiya.
Wa l-akhwaan al-jo min hinaak naadum waahid ke ma jaab leena khabar foogak wa ma simiʼna foogak cheyy fasil.
22 Laakin nidooru nasmaʼo kalaamak wa naʼarfu fikrak.
Wa kan le tariiga hanaaku di,
naʼarfu kadar fi kulla bakaan al-naas gaaʼidiin yachku minha.
23 Wa gataʼo leyah yoom achaan yihajji leehum.
Wa l-yoom da,
naas katiiriin bilheen jo lammo fi beetah.
Wa min al-fajur lahaddi l-makharib,
Buulus gaaʼid yachhad le Mamlakat Allah wa gaaʼid yihajji leehum be l-kalaam Tawraat Muusa wa l-anbiya achaan yijiibhum fi derib Isa.
24 Wa waahidiin minhum simʼo kalaamah wa aamano wa waahidiin minhum abo ma yiʼaamunu.
25 Wa ma astafago ambeenaathum.
Wa Buulus gaal cheyy waahid ziyaada wa khalaas kulluhum chatto le buyuuthum.
Hu gaal :
Akiid,
kalaam al-Ruuh al-Khudduus sahiih wakit hajja le juduudku be khachum al-nabi Ichaʼya.
Hu gaal
26 <Amchi kallim le l-chaʼab da wa guul intu tasmaʼo katiir wa laakin ma tafhamo cheyy.
Wa uyuunku gaaʼidiin bichiifu wa laakin ma tichiifu cheyy
27 achaan al-naas dool ma induhum niiye fi guluubhum wa ma yidooru yasmaʼo wa ma yidooru yichiifu.
Wa kan haalithum ma misil ke,
uyuunhum bichiifu wa adaanhum basmaʼo wa humman bafhamo adiil wa yigabbulu leyi wa nantiihum al-aafe>.
28 Khalaas,
waajib taʼarfu Allah rassal bichaarat al-naja le l-naas al-ma Yahuud wa humman yasmaʼooh.
29 Wa baʼad gaal al-kalaam da,
al-Yahuud marago min al-beet wa gaaʼidiin yikhaalutu ambeenaathum marra waahid.