Al-safar al-gaasi be l-bahar
27
Fastus kharrar achaan namchu fi balad Itaaliya be l-bahar.
Wa naada masʼuul askari waahid usmah Yuulius min al-gisim al-sultaani wa amarah achaan yahris Buulus wa l-masaajiin al-aakhariin fi l-safar.
2 Wa rikibna fi safiina hana hillit Adraamiit al-tidoor tamchi le hillaal waahidiin fi khachum al-bahar hana balad Aasiya wa khalaas macheena.
Wa Aristaarkus al-Magiduuni min hillit Tasaluuniiki kula saafar maʼaana.
3 Wa ambaakir lihigna hillit Seeda wa gaʼadna chiyya.
Wa Yuulius sawwa zeen le Buulus wa antaah izin achaan yamchi fi l-hille wa yisallim rufgaanah wa yalga minhum al-cheyy al-bidoorah.
4 Wa rikibna battaan wa l-safiina gammat min Seeda.
Wa l-riih gaaʼide tusuug min al-kharib wa wajjaho al-safiina fi l-jaanib al-sabhaani hana jaziirat Gubrus achaan al-jaziira tidaarigna min al-riih.
5 Wa wakit chaggeena al-bahar al-gaaʼid jamb Kilikiiya wa Bamfiiliya,
wisilna fi hillit Miira al-gaaʼide fi balad Leekiyya.
6 Wa hinaak masʼuul al-askar ligi safiina jaaye min al-Iskandriiya wa tidoor tamchi fi Itaaliya wa rakkabaana foogha.
7 Wa muddit ayyaam,
macheena giddaam be raaha bas.
Al-derib bigi gaasi le l-safiina.
Garrabna le hillit Kiniidus wa laakin al-riih tusuug min al-kharib wa ma gidirna namchu giddaam.
Wa khalaas wajjaho al-safiina fi l-jaanib al-junuubi hana jaziirat Kiriit achaan al-jaziira tidaarigna min al-riih.
Wa macheena jamb hajar usmah Raas Salmuuni.
8 Wa be l-taʼab bas,
lihigna al-bakaan al-usmah al-Muwaani al-Jamiile al-gaaʼid gariib le l-hillit Lisaaʼiya.
9 Wa min gammeena lahaddi l-bakaan da,
al-safar tawwal bilheen wa bigi al-wakit al-gaasi le l-safar be l-bahar wa yoom siyaam hana l-Yahuud kula faat khalaas.
Wa Buulus gamma hajja le naas al-safiina.
10 Wa gaal :
Ya l-akhwaan,
ana chift haalitna.
Wa fi fikri ana,
kan namchu giddaam,
akiid al-safar yabga leena gaasi marra waahid.
Ma tiwadduru al-safiina wa chuhnitha bas,
laakin aniina kullina numuutu.
11 Laakin masʼuul al-askar simiʼ kalaam al-sawwaag wa kalaam siid al-safiina wa ma simiʼ kalaam Buulus.
12 Wa dawwaro yalgo bakaan haadi achaan yagoodu foogah lahaddi al-chite yikammil wa l-bakaan al-safiina gaaʼide foogah ma muwaafig.
Wa naas katiiriin gaalo yabga leehum akheer kan yamchu giddaam wa yijaahudu achaan yalhago hillit Fiiniks wa yagoodu foogha.
Fiiniks gaaʼide fi jaziirat Kiriit wa indaha khachum bahar adiil ma faatih le l-riih illa fi nuss al-munchaakh kharib wa fi nuss al-wati kharib.
13 Wa wakit riih khafiife badat tusuug min al-wati,
naas al-safiina gaalo yagdaro yamchu giddaam misil dawwaro.
Wa jabado foog witid hana l-safiina wa macho giddaam.
Wa ma macho fi ust al-bahar laakin taabaʼo taraf al-jaziira.
14 Laakin baʼad chiyya bas,
riih chadiide bilheen gammat ajala ke wa saagat foogna min al-jaziira wa usum al-riih di al-Yuuruukiila.
15 Wa l-riih chaalat al-safiina wa ma gidro yigabbuluuha.
Wa khalaas khallo al-riih waddat al-safiina giddaam.
16 Al-riih lazzatna gariib le l-jaanib al-wati hana jaziira sakhayre usumha Kuuda al-daaragatna chiyya min al-riih.
Wa fi l-bakaan da,
gidirna nisabbutu be taʼab chadiid al-markaba.
17 Wa jabadooha wa dassooha fi l-safiina wa baʼad da,
gammo lawlawo al-safiina be habil gawi achaan ma tinchagga.
Wa humman khaayfiin kadar al-riih tidoor tilizzaha lahaddi tutugg fi l-bakaan al-aali al-gaaʼid gariib le balad Liibiya wa khadamo be juhud achaan yikhaffufu jari hana l-safiina.
Laakin al-riih gaaʼide tiwaddiiha giddaam ajala ke.
18 Wa ambaakir,
al-riih wa l-challaal gaaʼidiin yihizzu al-safiina chadiid wa khaddaamiin al-safiina gammo yidaffugu al-chuhna fi l-bahar achaan al-safiina tabga khafiife.
19 Wa l-yoom al-taalit,
humman zaathum chaalo khumaamhum al-bichtakhulu beyah fi l-safiina wa daffagooh fi l-bahar.
20 Wa min muddit ayyaam,
ma chifna wa la l-harraay wa la l-nujuum wa l-riih tusuug be chidde lahaddi nuguulu mutna khalaas.
21 Min mudda tawiile,
al-naas al-fi l-safiina ma akalo.
Wa yoom waahid,
Buulus gamma hajja leehum wa gaal :
Ya l-akhwaan,
kan awwal simiʼtu kalaami wa gaʼadtu fi Kiriit,
ma fi cheyy yatlaf wa la yiwaddir leeku.
22 Laakin hassaʼ nuguul leeku chiddu heelku !
Naadum waahid minku ma yiwaddir illa l-safiina wiheedha tiwaddir.
23 Fi leele di,
Allah al-ana naʼabudah wa ana hanaayah hu bas,
hu rassal leyi waahid min malaaʼikatah.
Wa l-malak ja wigif fi jambi
24 wa gaal «
Ya Buulus,
ma takhaaf.
Laabudda tagiif giddaam sultaan al-Roomaaniyiin.
Wa Allah antaak al-cheyy al-talabtah minnah.
Ma fi naadum min al-naas al-yisaafuru maʼaak yumuut ».
25 Wa achaan da ya l-akhwaan,
chiddu heelku.
Ana muʼmin be Allah wa kalaamah wa kulla cheyy al-gaalah leyi yabga.
26 Laakin al-safiina laazim tutugg fi turaab hana jaziira waahide.
27 Wa usbuuʼeen min futna min jaziirat Kiriit,
al-riih gaaʼide tilizzina giddaam fi ust al-Bahar al-Mutawassit.
Wa fi ust al-leel,
khaddaamiin al-safiina irifo garrabna le l-turaab.
28 Wa gaawaso al-almi be habil wa ligo ichriin raajil wa baʼadeen battaan gaawasooh wa ligo khamistaachar raajil.
29 Wa l-khaddaamiin khaayfiin achaan fi fikirhum,
al-riih tilizz al-safiina fi l-hujaar al-gaaʼidiin fi taraf al-jaziira wa tikassirha marra waahid.
Wa achaan da,
dallo arbaʼa awtaad wara leechaan ma namchu giddaam ajala.
Wa guluubhum muʼallagiin wa gaaʼidiin yarjo al-wata tasbah achaan yichiifu al-bakaan al-gaaʼidiin foogah.
30 Wa l-khaddaamiin dawwaro yinbalusu min al-safiina wa dallo al-markaba fi raas al-almi.
Wa gaalo leena humman yidooru yarbutu al-safiina be witid giddaam.
31 Wa Buulus hajja le l-askar wa le masʼuulhum wa gaal :
Kan al-rujaal dool ma yagoodu maʼaana fi l-safiina,
intu ma tanjo.
32 Wa ajala ke,
al-askar gataʼo hubaal hana l-markaba wa khallooha faatat min al-safiina.
33 Wa gariib al-sabaah,
Buulus gaal leehum kulluhum waajib yaakulu wa gaal :
Min arbaʼtaachar yoom,
intu taʼbaaniin wa ma akaltu.
34 Wa hassaʼ nuguul leeku waajib taakulu wa talgo gudra achaan tanjo.
Kulluku tanjo be l-aafiya wa l-salaam.
35 Wa baʼad hu gaal al-kalaam da,
hu chaal khubza wa chakar Allah giddaam kulla l-naas wa kasaraaha wa gamma akal minha.
36 Wa guluubhum ragado wa kulluhum gammo akalo.
37 Wa adad al-naas al-gaaʼidiin fi l-safiina miiyteen sitte wa sabʼiin.
38 Wa wakit chibʼo,
daffago fi l-bahar al-gameh al-gaaʼid fi lubb al-safiina achaan tabga khafiife.
39 Wa wakit al-wata asbahat,
chaafo al-bakaan al-wislo foogah laakin ma irifooh.
Wa chaafo khachum al-bahar indah sinyaaka.
Wa kharraro yiwajjuhu aleeha al-safiina achaan yiwaggufuuha fi l-sinyaaka.
40 Wa gataʼo hubaal hana l-awtaad wa l-awtaad faddalo fi l-bahar.
Wa fartago al-iidaan al-yiwaddu al-safiina fi deribha wa fartago al-guraara al-giddaamiye achaan al-riih tilizz al-safiina fi sinyaaka hana l-karkaw.
41 Laakin al-safiina antaggat fi bakaan aali tihit al-almi wa nussaha al-giddaami wihil marra waahid fi sinyaaka.
Wa l-challaal al-chadiid gaaʼid yudugg al-nuss al-waraani wa bada yikassirha.
42 Al-askar dawwaro yaktulu al-masaajiin achaan naadum minhum ma yiʼarrid fi l-almi.
43 Laakin masʼuul al-askar dawwar yinajji Buulus minhum wa dahar al-askar ma yaktulu naadum.
Wa anta izin le ayyi naadum al-yagdar yuʼuum achaan yunutt fi l-bahar wa yalhag al-karkaw.
44 Wa baʼadeen,
anta izin le l-naas al-aakhariin achaan yamsuku khachab walla uud min hatab al-safiina al-gaaʼide tinkasir wa yuʼuumu beyah waraahum.
Wa khalaas,
kulla naadum minnina wisil fi l-jaziira be l-aafe.