Al-chariiʼa giddaam Fiiliks
24
Wa baʼad khamsa yoom,
Hanaaniiya kabiir hana rujaal al-diin wa chuyuukh waahidiin macho fi Geesariiya wa jaabo maʼaahum muhaami waahid usmah Tartulus.
Wa macho le l-waali wa gaddamo leyah chakwithum foog Buulus.
2 Wa l-waali naada Buulus min al-sijin wa Tartulus bada yiwajjih leyah al-tuhma.
Wa hu gaal :
Ya al-sayyid Fiiliks al-muhtaram,
min khattook waali foogna,
kulla cheyy bigi leena halu wa ichna fi l-salaam mudda tawiile ke.
Wa be sabab hukmak,
haalat chaʼabna bigat akheer marra waahid.
3 Wa khalaas aniina kullina fi kulla bakaan farhaaniin be kulla cheyy al-inta sawweetah wa nachkuruuk katiir.
4 Wa ma nidooru kalaamna yichiil leek wakit katiir.
Natlubu min fadlak achaan tasmah leena wa nihajju leek chiyya.
5 Naʼarfu al-raajil da wa hu fasil marra waahid.
Wa hu gaaʼid yisawwi fitna fi ust al-Yahuud fi kulla buldaan al-dunya.
Hu min kubaaraat hana l-Nasaara* wa humman ahal al-bidʼa.
6 Wa dawwar kamaan yinajjis Beet Allah wa laakin aniina karabnaah.
Dawwarna nichaaruʼuuh ale hasab chariiʼatna.
7 Wa laakin Liisiyaas al-khaayid ja leena wa be gu chadiid chaalah min usutna.
8 Wa gaal leena kadar ayyi naadum al-yidoor yathamah le Buulus,
laazim yaji leek.
Kan tasʼalah adiil ke,
tagdar tiʼakkid min kulla cheyy al-gulnaah foogah.
9 Wa kulla l-Yahuud gaaʼidiin yathamo Buulus wa buguulu kalaam al-muhaami sahiih.
10 Wa be izin al-waali,
Buulus gamma hajja wa gaal :
Naʼarif inta waali foog chaʼabna min mudda tawiile wa nidaafiʼ le nafsi giddaamak be farha.
11 Ana jiit fi Madiinat al-Khudus achaan naʼabud Allah indi atnaachar yoom bas wa hayyin ke tagdar tiʼakkid min kalaami.
12 Wa wakit humman ligooni,
ana ma gaaʼid nikhaalit ayyi naadum wa ma gaaʼid niharrich al-naas wa la fi Beet Allah wa la fi buyuut al-sala wa la fi ayyi bakaan fi l-madiina.
13 Wa humman ma yagdaro yisabbutu al-kalaam al-tahamooni beyah.
14 Cheyy waahid bas min kalaamhum nuguulah sahiih.
Ana aabid Allah Rabb juduudna ale hasab al-derib al-humman buguulu hu bidʼa.
Wa ana muʼmin be kulla cheyy al-gaaʼid fi l-Tawraat wa kitaab al-nubuuwa.
15 Misil al-naas al-jo hini,
ana kula muʼmin be Allah wa narja be acham al-giyaama.
Wa fi l-giyaama,
Allah yabʼas kulla l-naas,
al-naas al-adiiliin wa l-naas al-ma adiiliin.
16 Wa achaan da,
ana naʼasir galbi achaan niʼiich daayman be niiye mukhlisa giddaam Allah wa giddaam al-naas.
17 Wa ana ma fiini fi Madiinat al-Khudus min muddat sanawaat.
Wa jiit achaan nanti sadakha le masaakiin ummati wa achaan naʼabud Allah be gaddimiin dahiiye.
18-19 Wa da bas al-cheyy al-gaaʼid nisawwiih wakit Yahuud waahidiin min balad Aasiya ligooni fi Beet Allah.
Wa wakit humman ligooni,
ana dahaabah kammalt tihaarti.
Ana ma gaaʼid niharrich al-naas wa la nisawwi kalaam.
Wa dool bas al-naas al-waajib yathamuuni giddaamak al-yoom kan sahiih induhum foogi chakwa.
20 Walla khalli al-naas al-gaaʼidiin hini hassaʼ yuguulu leena ayyi cheyy fasil al-ligooh foogi wakit ana gaaʼid giddaam al-majlis.
21 Cheyy ma fiih,
illa wakit ana waagif fi usuthum ana kallamt be hiss aali wa gult «
Yidooru yichaaruʼuuni al-yoom achaan ana muʼmin be l-giyaama ».
22 Wa Fiiliks irif kalaam katiir fi Derib Isa al-Masiih wa wakit simiʼ kalaam Buulus,
hu battal al-malamma wa gaal :
Nilizz al-chariiʼa giddaam lahaddi Liisiyaas al-khaayid yaji.
23 Wa amarah le masʼuul al-askar achaan yaharsu Buulus wa anta izin le rufgaanah achaan yisallumuuh wa yisaaʼuduuh.
24 Wa baʼad ayyaam,
Fiiliks ja maʼa martah.
Usumha Duruusila wa hi Yahuudiiye.
Wa naada Buulus achaan dawwar yasmaʼ kalaamah fi iimaan be l-Masiih Isa.
25 Wa wakit Buulus gaaʼid yifassir leyah kalaam fi l-adaala wa sabbitiin al-nafs wa yoom al-Hisaab al-jaayi,
Fiiliks ankharaʼ wa gaal :
Khalaas.
Hassaʼ da,
gabbil fi haraastak.
Yoom aakhar bas kan indi fursa ninaadiik.