Buulus giddaam al-majlis
23
Wa Buulus gaaʼid yichiif naas al-majlis adiil ke fi uyuunhum wa gaal :
Ya l-akhwaan,
kulla hayaati ana ichtaha be niiye mukhlisa giddaam Allah.
2 Wa Hanaaniiya kabiir rujaal al-diin amar al-naas al-waagfiin jamb Buulus achaan waahid minhum yuduggah fi khachmah.
3 Wa Buulus gaal leyah :
Wa Allah yuduggak inta.
Inta misil durdur muchaggag al-talasooh abyad.
Kikkeef tidoor tagtaʼ leyi chariiʼat Allah wa inta zaatak amartah le naadum achaan yuduggini wa amrak da mukhaalif le l-chariiʼa ?
4 Wa l-naas al-gaaʼidiin jambah gaalo :
Haay !
Tiʼayyir al-naadum al-Allah khattah kabiir rujaal al-diin ?
5 Wa Buulus radda leehum wa gaal :
Ya l-akhwaan,
ana ma irift hu kabiir rujaal al-diin.
Maktuub fi l-Kitaab <Ma tuguul kalaam fasil fi haakim hana chaʼabak>.
6 Wa wakit Buulus gaaʼid yichiif naas al-majlis,
hu irif waahidiin minhum Sadduukhiyiin wa waahidiin minhum Fariisiyiin.
Wa hajja be hiss aali wa gaal :
Ya l-akhwaan,
ana Fariisi wileed hana Fariisiyiin !
Yidooru yichaaruʼuuni achaan ana muʼmin be l-cheyy al-narjooh be acham.
Ana muʼmin be l-giyaama.
7 Wa wakit Buulus gaal al-kalaam da,
naas al-majlis bado yikhaalutu ambeenaathum.
Al-Fariisiyiin wa l-Sadduukhiyiin ankhalafo.
8 Al-Sadduukhiyiin ma muʼminiin be l-giyaama wa la be l-malaaʼika wa la be l-junuun wa laakin al-Fariisiyiin muʼminiin beehum kulluhum.
9 Wa l-khilaaf bigi chadiid.
Wa ulama waahidiin min al-Fariisiyiin gammo aarado be chidde wa gaalo :
Aniina ma niʼtaburu al-naadum da khaati.
Akuun be l-sahiih jinn waahid kallam leyah walla waahid min al-malaaʼika.
10 Wa l-kalaam da jaab barjaal lahaddi al-khaayid khaaf min al-naas yimallutu Buulus.
Wa fi l-akhiir,
hu rassal askarah achaan yanzulu yakhtufuuh min usuthum wa yigabbulu beyah fi l-gasir.
11 Wa be l-leel,
al-Rabb Isa baan le Buulus wa hajja leyah.
Wa gaal :
Chidd heelak.
Inta chahadt leyi fi Madiinat al-Khudus wa laazim tachhad leyi fi madiinat Rooma kula.
Al-muʼaamara didd Buulus
12 Wa wakit al-wata asbahat,
Yahuud waahidiin rakano foog Buulus wa halafo ma yaakulu wa la yacharbo cheyy illa kan katalooh.
13 Wa l-naas al-achchaawaro diddah dool adadhum ziyaada min arbaʼiin raajil.
14 Wa macho hajjo le kubaaraat rujaal al-diin wa le l-chuyuukh wa gaalo :
Halafna ma naakulu wa ma nacharbo illa kan katalna Buulus.
15 Achaan da,
rassulu kalaam le l-khaayid.
Guulu leyah intu wa naas al-majlis tidooru tiʼakkudu min kalaamku foog Buulus.
Wa atlubu min al-khaayid hu yiwaddi leeku Buulus.
Wa aniina jaahiziin.
Naktulu Buulus gubbaal ma yaji fi bakaan al-majlis.
16 Wa laakin wileed hana akhut Buulus simiʼ choorithum wa macha fi gasir al-askar wa oora Buulus.
17 Wa Buulus naada masʼuul waahid hana l-askar wa gaal leyah :
Waddi al-sabi da le l-khaayid achaan indah kalaam yidoor yiʼooriih.
18 Wa l-masʼuul wadda al-sabi le l-khaayid wa gaal :
Buulus al-makruub naadaani wa talab minni achaan nijiib leek al-sabi da.
Hu indah khabar yidoor yihajji leek.
19 Wa l-khaayid karab al-sabi min iidah wa waddaah taraf wa saʼalah wa gaal :
Chunu al-khabar al-tidoor tiʼooriini beyah ?
20 Wa l-sabi radda leyah wa gaal :
Al-Yahuud rakano foog Buulus wa ambaakir yatlubu minnak tigaddimah le l-majlis achaan yiʼakkudu al-kalaam al-khattooh foogah.
21 Ma tasmaʼ kalaamhum.
Ziyaada min arbaʼiin raajil yidooru yakursu leyah.
Humman halafo ma yaakulu wa la yacharbo cheyy illa kan katalooh.
Wa hassaʼ humman jaahiziin wa yarjo lahaddi tikhassid be talabhum.
22 Wa l-khaayid gaal leyah :
Ma tuguul le ayyi naadum inta ooreetni be l-kalaam da.
Wa khalla al-sabi yigabbil fi beetah.
23 Wa baʼad da,
al-khaayid naada itneen min masaaʼiil al-askar.
Wa antaahum amur wa gaal :
Lummu miiyteen askari achaan yijahhuzu nufuushum le yamchu fi Geesariiya al-saaʼa tisʼa be l-leel.
Wa chiilu maʼaaku sabʼiin askar siyaad kheel wa miiyteen askari musallahiin be huraab.
24 Wa chiilu kheel achaan Buulus kula yarkab maʼaaku wa wadduuh be l-aafiya le Fiiliks al-waali.
25 Wa l-khaayid katab maktuub le l-waali wa gaal ke :
26 Maktuub min Kuluudi Liisiyaas le l-sayyid al-waali Fiiliks al-muhtaram,
al-salaam aleekum.
27 Al-naadum da,
al-Yahuud karabooh wa dawwaro yaktuluuh.
Wa ana simiʼt hu indah jinsiiya roomaaniye wa macheet be l-askar wa najjeetah minhum.
28 Dawwart naʼarif sabab chakwithum foogah wa waddeetah le majlis al-Yahuud.
29 Wa wakit simiʼt kalaamhum,
ana fihimt tuhmithum foogah muchkila hana diinhum bas wa hu ma sawwa cheyy fasil achaan waajib leyah al-moot wa la l-sijin.
30 Wa naadum ooraani kadar naas waahidiin achchaawaro achaan yaktuluuh.
Wa be da,
waddeetah leek tawwaali.
Wa anteet izin le l-naas al-yathamooh achaan yigaddumu chakwithum fi bakaanak.
31 Wa l-askar tabbago awaamiir al-khaayid wa be leel waddo Buulus fi hillit Antiibaatris.
32 Wa be fajur,
al-askar gabbalo fi bakaanhum wa khallo siyaad al-kheel wiheedhum yiwaddu Buulus lahaddi Geesariiya.
33 Wa wakit wislo fi Geesariiya,
al-askar sallamo Buulus wa l-maktuub le l-waali.
34 Wa l-waali gara al-maktuub wa saʼal Buulus wa gaal :
Baladak ween ?
Wa wakit simiʼ Buulus min Kilikiiya,
35 hu gaal leyah :
Wakit al-naas al-tahamook yaju hini,
nasmaʼ chakwithum foogak.
Wa amaraahum le askarah achaan yaharsu Buulus fi l-gasir al-Hiruudus banaah.