Ruʼya hana Karniili
10
Wa fi hillit Geesariiya,
fiyah naadum waahid usmah Karniili.
Hu askari Roomaani wa kabiir hana miya askar min al-gisim al-Itaali.
2 Hu naadum takhi wa kulla naas beetah yaʼabudu Allah.
Hu yanti sadakha be juud le l-masaakiin wa daayman gaaʼid yasʼal Allah.
3 Wa yoom waahid misil al-saaʼa talaata baʼad al-duhur,
ruʼya jaat le Karniili.
Wa fi l-ruʼya di,
hu chaaf waahid min malaaʼikat Allah jaayi leyah fi beetah.
Wa l-malak kallam leyah wa gaal :
Ya Karniili !
4 Wa wakit chaaf al-malak,
hu khaaf bilheen wa saʼalah wa gaal :
Chunu,
ya sayyidna ?
Wa l-malak radda leyah wa gaal :
Allah radyaan be salaawaatak wa be l-sadakha al-anteetha.
5 Wa hassaʼ bas rassil rujaal le hillit Yaafa achaan yinaadu Simʼaan al-usmah al-taani Butrus achaan yaji leek.
6 Hu deef hana Simʼaan al-dabbaakhi al-beetah gaaʼid jamb al-bahar.
7 Wa wakit al-malak al-kallam leyah faat,
Karniili naada khaddaamiin itneen wa naada naadum takhi min al-askar al-gaaʼidiin daayman maʼaayah.
8 Wa ooraahum be l-cheyy al-bigi wa rassalaahum le Yaafa.
Ruʼya hana Butrus
9 Wa ambaakir be l-duhur wakit al-rujaal al-talaata dool maachiin fi l-derib garrabo le hillit Yaafa,
Butrus talaʼ fi raas al-beet achaan yisalli.
10 Wa juuʼ chadiid sawwaah wa dawwar yaakul.
Wa wakit gaaʼidiin yihassulu leyah akil,
cheyy misil ruʼya ja foogah.
11 Wa fi ruʼya,
chaaf al-sama faatih wa chokhol kabiir marra waahid yichaabih mindiil marbuut naazil fi l-ard.
12 Wa l-mindiil malaan be kulla nafar al-haywaanaat wa l-dabaayib wa l-tuyuur.
13 Wa Butrus simiʼ hiss naadum yinaadiih wa yuguul :
Ya Butrus,
gumm adbah wa aakul.
14 Wa laakin Butrus radda leyah wa gaal :
La,
ya sayyidna.
Abadan ma akalt cheyy haraam wa la cheyy nijis.
15 Wa l-hiss kallam leyah battaan wa gaal :
Al-cheyy al-Allah tahharah,
ma tuguul hu nijis.
16 Wa l-cheyy da bigi talaata marraat wa khalaas al-mindiil anrafaʼ fi l-sama.
17 Wa Butrus ajjab.
Wa l-kalaam da bigi leyah gaasi wa bada yasʼal fi nafsah chunu maʼana al-ruʼya al-chaafaaha.
Wa fi l-wakit da bas,
al-rujaal al-Karniili rassalaahum ligo beet Simʼaan al-dabbaakhi wa jo wigfo fi khachum al-beet.
18 Wa gaaʼidiin yasʼalo naas al-beet wa buguulu :
Simʼaan al-binaaduuh Butrus da,
hu deef fi bakaanku walla ?
19 Wa fi l-wakit da bas,
Butrus gaaʼid yifakkir fi maʼana al-ruʼya wa l-Ruuh al-Khudduus kallam leyah wa gaal :
Asmaʼ,
fi talaata rujaal gaaʼidiin fi khachum al-beet.
Yasʼalo minnak.
20 Dalli tihit wa laagiihum wa amchi maʼaahum wa ma tuchukk fooghum.
Ana bas rassaltuhum leek.
21 Wa dalla tihit wa macha leehum wa gaal :
Ana bas al-naadum al-tidooruuh.
Jiitu tidooruuh chunu ?
22 Wa raddo leyah wa gaalo :
Allah rassal waahid min malaaʼikatah le naadum usmah Karniili wa gaal leyah waajib yinaadiik taji fi beetah achaan hu yasmaʼ kalaamak.
Wa Karniili hu kabiir hana l-askar wa hu raajil saalih wa yaʼabud Allah.
Wa kulla l-Yahuud buguulu hu naadum adiil.
23 Wa Butrus dayyafaahum wa ragado fi l-beet.
Wa fi l-fajur,
Butrus gamma wa macha maʼaahum sawa.
Wa waahidiin min al-akhwaan min Yaafa kula macho maʼa Butrus.
Butrus fi beet Karniili
24 Wa ambaakir,
wislo fi Geesariiya wa Karniili gaaʼid yarjaahum maʼa akhwaanah wa rufgaanah al-azamaahum.
25 Wa wakit Butrus gaaʼid yindass fi l-beet,
Karniili gaabalah wa sajad leyah.
26 Wa Butrus rafaʼah wa gaal :
Gumm foog.
Ana insaan mislak inta bas.
27 Wa Butrus andassa fi l-beet wa gaaʼid yihajji maʼaayah wa macha daakhal wa ligi naas katiiriin laammiin.
28 Wa gaal leehum :
Intu taʼarfu fi diin al-Yahuud haraam le Yahuudi yilimm maʼa naadum ma Yahuudi wa la yisallimah fi beetah kula.
Wa laakin Allah ooraani waajib ma nuguul ayyi naadum nijis be sabab gabiiltah.
29 Wa achaan da,
wakit naadeetuuni,
ana ma gult kalaam wa jiit leeku.
Wa hassaʼ ooruuni naadeetuuni le chunu ?
30 Wa Karniili radda leyah wa gaal :
Indina arbaʼa yoom,
al-saaʼa misil al-wakit da,
ana fi beeti wa gaaʼid nisalli sala hana l-saaʼa talaata.
Wa khalaas ajala ke,
raajil laabis khalag abyad misil al-barraaga baan giddaami.
31 Wa gaal leyi «
Ya Karniili,
Allah simiʼ salaawaatak wa fakkar fi sadakha al-inta anteetha.
32 Wa hassaʼ rassil rujaal fi Yaafa achaan yinaadu Simʼaan al-binaaduuh Butrus achaan baji leek.
Hu deef hana Simʼaan al-dabbaakhi al-beetah jamb al-bahar ».
33 Wa tawwaali ke,
ana rassaltuhum achaan yinaaduuk wa chukran be jaytak.
Wa khalaas,
kullina gaaʼidiin hini giddaam Allah achaan nasmaʼo kulla l-kalaam al-Allah amaraak beyah.
34 Wa Butrus gamma yikallim leehum wa gaal :
Khalaas,
bigi leyi waadih bilheen kadar Allah ma yichiif gabiila waahide akheer min gabaayil aakhariin.
35 Wa Allah yakhbal naadum min ayyi gabiila kan yaʼabudah wa amalah saalih.
36 Wa akiid,
Allah rassal le Bani Israaʼiil bichaarat al-salaam al-yantiina be Isa al-Masiih,
Rabb hana kulla l-naas.
37 Wa intu taʼarfu kulla cheyy al-bigi fi daar al-Yahuudiiya.
Al-cheyy al-bigi da bada fi l-Jaliil baʼad Yahya naada al-naas achaan hu yikhattishum.
38 Wa taʼarfu kadar Allah nazzal al-Ruuh al-Khudduus foog Isa al-min al-Naasira wa antaah gudra.
Wa Isa sawwa al-kheer fi ayyi bakaan wa daawa kulla l-naas al-Ibliis masakaahum achaan Allah kaan maʼaayah.
39 Wa aniina chuhuud fi kulla cheyy al-Isa sawwaah fi daar al-Yahuud wa fi Madiinat al-Khudus.
Wa khalaas,
allagooh fi l-saliib wa katalooh.
40 Wa laakin fi talaata yoom,
Allah gawwamah min al-moot wa bayyanah le l-naas.
41 Laakin ma bayyanah le kulla l-naas,
illa le l-chuhuud al-ikhtaaraahum min awwal,
yaʼni leena aniina al-akalna wa chiribna maʼa Isa baʼad hu baʼas min ust al-maytiin.
42 Wa Isa amaraana achaan niballukhu al-bichaara le gabiilitna wa nachhado leyah wa nuguulu Isa bas al-naadum al-Allah jaʼalah achaan yihaasib al-naas al-hayyiin wa l-naas al-maytiin.
43 Wa kulla l-anbiya yachhado le Isa wa yuguulu ayyi naadum al-yiʼaamin beyah wa yadʼi be usmah,
Allah yakhfir leyah zunuubah.
44 Wa Butrus lissaaʼ gaaʼid yikallim leehum wa ajala ke al-Ruuh al-Khudduus nazal foog kulla l-naas al-gaaʼidiin yasmaʼo kalaamah.
45 Wa l-muʼminiin al-min al-Yahuud al-jo maʼa Butrus ajjabo bilheen achaan chaafo Allah anta al-Ruuh al-Khudduus le l-naas al-ma Yahuud kula.
46 Wa simʼoohum wa humman gaaʼidiin yikallumu be lukhkhaat aakhariin wa yahmudu Allah be farha.
Wa Butrus gaal :
47 Fi naadum yadharna min al-almi achaan nikhattusu al-naas dool walla ?
Allah antaahum humman al-Ruuh al-Khudduus misil antaah leena.
48 Wa Butrus amaraahum le akhwaanah achaan yikhattusuuhum be usum Isa al-Masiih.
Wa baʼad khattasoohum khalaas,
Karniili wa akhwaanah talabo min Butrus hu yagood maʼaahum ayyaam.