Al-Masiih baan le Chaawul
9
Wa laakin Chaawul lissaaʼah zaʼlaan wa gaaʼid yihaddidhum be l-katil le talaamiiz al-Rabb Isa.
Wa macha le kabiir rujaal al-diin
2 wa saʼalah achaan yaktib makaatiib le buyuut al-sala fi madiinat Dimachkh.
Wa fi l-makaatiib dool,
Chaawul dawwar izin achaan yakrub ayyi naadum al-yitaabiʼ derib Isa,
kan raajil walla mara.
Fi ayyi bakaan al-yalgaahum foogah,
hu yidoor izin achaan yarbuthum wa yusuughum le Madiinat al-Khudus.
3 Wa Chaawul macha.
Wa wakit hu fi l-derib wa yigarrib le Dimachkh,
ajala ke nuur chadiid min al-sama daawa foogah.
4 Wa Chaawul wagaʼ fi l-turaab wa simiʼ hiss naadum gaaʼid yikallim leyah wa yuguul :
Ya Chaawul,
ya Chaawul !
Maalak titaʼʼibni ?
5 Wa Chaawul saʼalah wa gaal :
Ya l-sayyid,
inta yaatu ?
Wa hiss al-naadum gaal :
Ana Isa al-inta gaaʼid titaʼʼibah.
6 Gumm wa adkhul fi Dimachkh wa naadum waahid yiʼooriik be l-cheyy al-waajib tisawwiih.
7 Wa l-naas al-maachiin maʼa Chaawul astakhrabo wa wigfo saakit bas.
Simʼo al-hiss wa laakin ma chaafo naadum.
8 Wa wakit Chaawul gamma foog wa fakka uyuunah ma yagdar yichiif cheyy.
Wa karabooh min iideenah wa waddooh fi Dimachkh.
9 Wa talaata yoom ma bichiif cheyy wa la baakul wa la bachrab.
10 Wa naadum waahid gaaʼid fi Dimachkh usmah Hanaaniiya wa hu tilmiiz al-Masiih.
Al-Rabb Isa baan leyah fi ruʼya wa gaal :
Ya Hanaaniiya !
Wa Hanaaniiya radda leyah wa gaal :
Naʼam,
ya l-Rabb.
11 Wa l-Rabb kallam leyah wa gaal :
Amchi fi l-chaariʼ al-usmah al-Mustakhiim wa amchi fi beet hana Yahuuza.
Asʼal min al-naadum al-min hillit Tarsuus al-usmah Chaawul achaan hassaʼ hu gaaʼid yisalli.
12 Wa fi salaatah,
hu riʼi wa fi l-ruʼya,
hu chaaf naadum usmah Hanaaniiya dakhal fi beetah wa khatta iideenah foogah achaan uyuunah yinfathu.
13 Wa Hanaaniiya radda leyah wa gaal :
Ya Rabbina,
simiʼt khabar min naas katiiriin buguulu al-raajil da sawwa amal cheen foog naasak al-saalihiin fi Madiinat al-Khudus.
14 Wa buguulu hu ja hini be izin kubaaraat rujaal al-diin achaan yakrub ayyi naadum al-yadʼi be usmak.
15 Wa l-Rabb hajja leyah wa gaal :
Amchi bas.
Al-raajil da ikhtirtah achaan yabga khaddaami wa yamchi yibachchir be usmi le l-naas al-ma Yahuud wa le muluukhum wa le Bani Israaʼiil.
16 Wa ana bas niwassif leyah al-taʼab al-chadiid al-hu yatʼabah fi chaani ana.
17 Wa khalaas Hanaaniiya gamma wa macha fi beet Yahuuza wa khatta iideenah foog Chaawul wa gaal :
Ya akhuuna Chaawul,
Rabbina Isa baan leek fi l-derib wakit inta jaayi hini wa hu bas rassalaani leek achaan tichiif battaan wa tinmali be l-Ruuh al-Khudduus.
18 Wa tawwaali ke,
chokhol misil al-gichir wagaʼ min uyuunah wa battaan gamma yichiif.
Wa Chaawul gamma foog wa khattasooh.
19 Wa akal wa ligi gudra.
Wa gaʼad ayyaam chiyya maʼa l-talaamiiz fi Dimachkh.
Chaawul fi Dimachkh
20 Wa tawwaali ke,
Chaawul macha fi buyuut al-sala wa ballakh al-naas be Isa wa gaal kadar Isa hu Ibn Allah.
21 Wa kulla al-naas al-simʼo kalaamah ajjabo marra waahid wa gaalo :
Da bas al-naadum al-gamma fi Madiinat al-Khudus wa taʼʼab al-naas al-yadʼu be usum Isa.
Wa daahu al-ja hini achaan yakrubhum wa yiwaddiihum fi bakaan hana kubaaraat rujaal al-diin.
22 Wa Chaawul bigi gawi ziyaada.
Wa l-Yahuud al-fi Dimachkh ma gidro yikhaalufuuh achaan be kalaam waadih hu gaaʼid yisabbit leehum kadar Isa hu al-Masiih.
23 Wa baʼad Chaawul gaʼad ayyaam fi Dimachkh,
al-Yahuud achchaawaro ambeenaathum achaan yaktuluuh.
24 Wa Chaawul simiʼ khabar hana muʼaamarithum.
Wa l-Yahuud yarjooh fi biibaan al-madiina leel wa nahaar achaan yaktuluuh.
25 Wa khalaas be l-leel,
waahidiin min talaamiizah waddo Chaawul le durdur al-madiina wa dassooh fi chabaka kabiire wa dallooh tihit be habil fi turaab khaadi min al-durdur.
Chaawul fi Madiinat al-Khudus
26 Wa Chaawul macha fi Madiinat al-Khudus wa dawwar yilimm maʼa talaamiiz al-Masiih wa laakin humman ma saddakho kadar hu kula tilmiiz wa humman khaayfiin minnah.
27 Wa Barnaaba lamma maʼa Chaawul wa gaddamah le l-rusul.
Wa Barnaaba ooraahum be kikkeef al-Rabb baan le Chaawul fi derib wa kallam leyah.
Wa ooraahum be kikkeef Chaawul gamma bala khoof fi Dimachkh wa ballakh al-bichaara be usum Isa.
28 Wa khalaas,
Chaawul bada yakhdim maʼaahum fi Madiinat al-Khudus wa gaaʼid yiballikh bala khoof al-bichaara be usum Isa.
29 Wa kallam le l-Yahuud al-yihajju be kalaam yuunaani wa khaalataahum.
Wa humman rakano foogah achaan yaktuluuh.
30 Wa l-akhwaan simʼo be l-kalaam da wa waddo Chaawul fi khachum al-bahar fi hillit Geesariiya.
Wa min hinaak rassalooh fi Tarsuus.
31 Wa khalaas,
ummat al-Masiih al-fi daar al-Yahuudiiya wa fi daar al-Jaliil wa fi daar al-Saamira gaaʼide be l-aafe wa l-salaam.
Wa kulla l-muʼminiin gaaʼidiin yitaabuʼu kalaam al-Rabb be l-takhwa wa be chajaaʼat al-Ruuh al-Khudduus wa adadhum zaad ziyaada.
Amal Butrus fi Ludda wa Yaafa
32 Wa Butrus gaaʼid yamchi hille le hille wa khalaas macha le l-muʼminiin al-gaaʼidiin fi hille usumha Ludda.
33 Wa ligi naadum waahid maʼduur usmah Iniyaas.
Min tamaane sana,
hu raagid fi l-sariir.
34 Wa Butrus hajja leyah wa gaal :
Ya Iniyaas,
Isa al-Masiih yidaawiik.
Gumm foog wa tabbig sariirak.
Wa ajala ke,
Iniyaas gamma foog aafe.
35 Wa kulla sukkaan Ludda wa Chaaruun chaafooh wa aamano be l-Rabb Isa.
36 Wa mara waahide gaaʼide fi hillit Yaafa usumha Taabiita wa maʼana usumha Khazaala.
Wa hi kula min al-talaamiiz.
Wa ayyi yoom,
hi gaaʼide tisaaʼid al-masaakiin wa hi daayman chakhkhaala be amal al-kheer.
37 Wa fi l-wakit da,
hi bigat mardaane wa maatat.
Wa barradooha wa khatto janaazatha fi l-gasir al-taani.
38 Wa l-talaamiiz al-fi Yaafa simʼo khabar Butrus gaaʼid fi Ludda.
Wa Ludda ma baʼiide min Yaafa wa khalaas rassalo rujaal itneen achaan yinaaduuh wa yuguulu leyah :
Taʼaal leena ajala.
39 Wa Butrus gamma macha maʼaahum.
Wa wakit ja fi l-beet,
waddooh foog fi l-bakaan al-hi raagde foogah.
Wa kulla l-ajaayiz al-masaakiin gaaʼidaat yabkan wa machan le Butrus achaan yiwassifan leyah al-lubaas wa l-khulgaan al-Khazaala khayyatathum wakit hi hayye.
40 Wa Butrus saʼal kulla l-naas al-haadiriin yamurgu barra.
Wa wakit marago,
hu barak wa saʼal Allah.
Wa baʼad da,
hu anlafat le l-janaaza wa gaal :
Ya Taabiita,
gummi foog !
Wa hi fakkat uyuunha.
Wa wakit chaafat Butrus,
hi gammat be heelha.
41 Wa Butrus karabha min iideenha wa aawanaaha wa hi gammat foog.
Wa naada kulla l-saalihiin wa l-ajaayiz al-masaakiin wa khalaas gaddamaaha leehum hayye.
42 Wa kulla naas hana hillit Yaafa simʼo be l-ajab da wa naas katiiriin aamano be l-Rabb Isa.
43 Wa Butrus gaʼad ayyaam fi Yaafa wa sakan fi beet dabbaakhi waahid usmah Simʼaan.