Buʼaas al-Masiih
20
Wa yoom al-ahad wakit al-wata lissaaʼ dalma,
Mariyam al-Majdaliiye gammat machat le l-khabur wa chaafat kadar al-hajar al-kabiir al-awwal saddo beyah al-khabur ma gaaʼid fi bakaanah.
2 Wa hi gammat jarat le Simʼaan Butrus wa le l-tilmiiz al-aakhar,
al-tilmiiz al-Isa yiriidah bilheen,
wa gaalat leehum :
Sayyidna chaalooh min al-khabur wa ma naʼarfu al-bakaan al-waddooh foogah.
3 Wa Butrus wa l-tilmiiz al-aakhar marago wa chaalo al-derib al-maachi le l-khabur.
4 Wa humman jaariyiin wa laakin al-tilmiiz al-aakhar sabagah le Butrus wa lihig al-khabur gubbaalah.
5 Wa dangar taawag fi l-khabur daakhal wa chaaf al-gabag al-kafano beyah Isa laakin hu ma andassa.
6 Wa Simʼaan Butrus wisil waraayah wa andassa tawwaali fi l-khabur.
Wa chaaf al-kafan.
7 Wa l-mindiil al-rabato beyah raas Isa ma gaaʼid maʼa l-gabag wa laakin gaaʼid fi bakaan wiheedah mutabbag adiil.
8 Wa l-tilmiiz al-aakhar al-lihig al-khabur gubbaalah,
hu kula andassa daakhal wa chaaf al-khumaam wa aaman khalaas.
9 Lissaaʼ ma fihmo min al-Kitaab kadar Isa laabudda yabʼas min ust al-maytiin.
10 Wa l-talaamiiz gabbalo fi buyuuthum.
Mariyam chaafat al-Masiih
11 Wa laakin Mariyam gaʼadat waagfe jamb khachum al-khabur wa gaaʼide tabki.
Wa wakit gaaʼide tabki,
hi dangarat wa taawagat fi l-khabur daakhal.
12 Wa chaafat malaaʼika itneen khulgaanhum buyud.
Humman gaaʼidiin tihit fi l-bakaan al-janaazat Isa awwal raagde foogah,
waahid fi bakaan raasah wa waahid fi bakaan rijileenah.
13 Wa hajjo leeha wa gaalo :
Mara zeene,
maalki tabki ?
Wa hi raddat leehum wa gaalat :
Ana gaaʼide nabki achaan chaalo sayyidi wa ma naʼarif al-bakaan al-waddooh foogah.
14 Wa baʼad hi gaalat al-kalaam da,
hi anlafatat wa chaafat Isa waagif waraaha laakin ma irifat hu Isa.
15 Wa Isa hajja leeha wa gaal :
Mara zeene,
maala tabki ?
Tifattichi yaatu ?
Wa fi fikirha,
hu al-khaddaam al-bakhdim fi l-jineene wa raddat leyah wa gaalat :
Al-sayyid,
kan inta chiltah,
ooriini al-bakaan al-khatteetah foogah wa ana niwaddiih fi bakaan aakhar.
16 Wa Isa hajja leeha wa gaal :
Mariyam.
Wa anlafatat chaafatah adiil wa gaalat :
Ya rabbuunaay !
Maʼanaatah «
ya muʼallim »
be kalaam ibraani.
17 Wa Isa hajja leeha wa gaal :
Ma takurbiini.
Ana lissaaʼ ma talaʼt le Abuui.
Amchi le akhwaani wa ooriihum ana taaliʼ le Allah wa hu Abuui wa hu Abuuku.
Wa hu Ilaahi wa hu Ilaahku.
18 Wa Mariyam al-Majdaliiye machat le talaamiizah wa gaalat :
Ana chift sayyidna.
Wa oorathum be kulla cheyy al-hu gaalah leeha.
Al-Masiih baan le talaamiizah
19 Wa nafs al-yoom,
yaʼni yoom al-ahad,
fi l-achiiye al-talaamiiz laammiin fi bakaan waahid wa l-biibaan mugaffaliin achaan humman khaayfiin min al-Yahuud.
Wa Isa ja wa wigif fi usuthum wa sallamaahum.
Wa hu gaal :
Al-salaam aleekum.
20 Wa baʼad hu sallamaahum,
hu wassaf leehum iideenah wa naaytah.
Wa wakit al-talaamiiz chaafo sayyidhum,
humman firho farha chadiide.
21 Wa Isa hajja leehum battaan wa gaal :
Al-salaam aleekum.
Ana nirassilku fi l-dunya misil Abuui rassalaani fi l-dunya.
22 Wa baʼad hu gaal al-kalaam da,
hu nafakh fooghum wa gaal :
Akhbalo al-Ruuh al-Khudduus.
23 Kan tisaamuhu le ayyi naadum zunuubah,
Allah yakhfir leyah.
Wa kan ma tisaamuhu le ayyi naadum zunuubah,
Allah ma yakhfir leyah.
Al-Masiih wa Tuuma
24 Wa Tuuma hu waahid min al-talaamiiz al-atnaachar wa usmah al-aakhar Chigg al-Toom.
Wa hu ma gaaʼid maʼaahum wakit Isa ja fi usuthum.
25 Wa l-talaamiiz al-aakhariin oorooh beyah wa gaalo :
Aniina chifna sayyidna.
Wa laakin hu radda leehum wa gaal :
Kan ma chift be eeni al-bakaan al-taʼanooh fi iideenah be l-musmaar wa kan ma khatteet usbaʼi fi l-bakaan al-musmaar wa kan ma limistah fi naaytah be iidi,
abadan ma niʼaamin.
26 Wa baʼad usbuuʼ waahid,
talaamiiz Isa lammo battaan fi nafs al-beet wa Tuuma maʼaahum.
Wa l-biibaan mugaffaliin wa laakin Isa ja wa wigif fi usuthum.
Wa Isa sallamaahum wa gaal :
Al-salaam aleekum.
27 Wa hajja le Tuuma wa gaal :
Khutt usbaʼak hini wa chiif iideeni.
Midd iidak wa almasni fi naayti.
Khalli minnak al-chakk wa aamin.
28 Wa Tuuma radda leyah gaal :
Inta Rabbi.
Inta Allah.
29 Wa Isa gaal :
Inta aamant achaan chiftini.
Mabruuk le l-naas al-yiʼaamunu beyi kan ma chaafooni kula.