Al-Masiih baan jamb al-bahar
21
Wa baʼadeen Isa kula baan le talaamiizah jamb bahar hana Tibiriyaas.
Wa daahu kikkeef hu baan leehum.
2 Simʼaan Butrus wa Tuuma al-binaaduuh Chigg al-Toom wa Natanaayil al-min hillit Kaana fi daar al-Jaliil wa awlaad Zabadi wa battaan talaamiiz itneen gaaʼidiin fi bakaan waahid.
3 Wa Simʼaan Butrus hajja leehum wa gaal :
Ana namchi nihawwit.
Wa gaalo leyah :
Namchu maʼaak.
Wa marago wa rikbo fi l-markaba wa laakin tuul al-leel ma karabo cheyy.
4 Wa fajur fajur,
Isa ja wigif fi khachum al-bahar wa l-talaamiiz ma irifo hu Isa.
5 Wa Isa saʼalaahum wa gaal :
Ya l-awlaad,
karabtu huut walla ?
Wa raddo leyah wa gaalo :
La.
6 Wa gaal leehum :
Azgulu charakku fi nuss al-zeenaay wa takurbu huut.
Wa zagalo charakhum wa karabo huut katiir ke lahaddi ma gidro karrooh foog fi l-markaba.
7 Wa l-tilmiiz al-Isa yiriidah hajja le Butrus wa gaal :
Da Rabbina.
Wa wakit Simʼaan Butrus simiʼ kadar al-Rabb ja,
hu gamma rabat khalagah al-barraani wa natta fi l-bahar.
Hu laabis lubaas chiyya bas achaan bakhdim.
8 Wa l-talaamiiz al-aakhariin jo waraayah be l-markaba wa gaaʼidiin yukurru al-charak al-malaan huut.
Humman ma baʼiid min khachum al-bahar illa misil miya mitir.
9 Wa wakit marago min al-markaba khalaas,
chaafo kaanuun malaan jamur wa huutaay foogah wa khubza.
10 Wa Isa hajja leehum wa gaal :
Jiibu waahidiin min al-huut al-dahaaba karabtuuhum.
11 Wa Butrus gamma wa karra al-charak fi khachum al-bahar wa l-charak malaan huut kubaar.
Wa adadhum miya talaata wa khamsiin.
Al-huut katiiriin bilheen wa laakin al-charak ma angataʼ.
12 Isa naadaahum wa gaal :
Taʼaalu afturu.
Ma fi naadum minhum haawal yasʼalah wa yuguul «
Inta yaatu ?
» achaan fi guluubhum irifo da al-Rabb Isa.
13 Wa Isa gamma chaal al-khubza wa antaahum minha wa sawwa nafs al-cheyy be l-huut.
14 Wa di taalit marra Isa baan le talaamiizah min hu baʼas min ust al-maytiin.
Al-Masiih chajjaʼ Butrus
15 Wa wakit fataro khalaas,
Isa saʼal Simʼaan Butrus wa gaal :
Simʼaan wileed Yuuhanna,
tiriidni ziyaada min al-aakhariin walla ?
Wa Butrus radda leyah wa gaal :
Aywa sayyidna,
taʼarif niriidak.
Wa Isa gaal leyah :
Ayyichhum le humlaani.
16 Wa marra taaniye saʼalah wa gaal :
Simʼaan wileed Yuuhanna,
tiriidni walla ?
Wa Butrus radda leyah wa gaal :
Aywa sayyidna,
taʼarif niriidak.
Wa Isa gaal leyah :
Asrah be khanami.
17 Wa marra taalta Isa saʼalah wa gaal :
Simʼaan wileed Yuuhanna,
tiriidni walla ?
Wa bigi le Butrus gaasi achaan talaata marraat Isa saʼalah «
tiriidni walla ?
».
Wa Butrus radda leyah wa gaal :
Sayyidna,
taʼarif kulla cheyy.
Wa taʼarif niriidak.
Wa Isa gaal leyah : Ayyichhum le khanami.
18 Asmaʼ,
nuguul leek al-hagg,
wakit inta sakhayyar,
inta rabatt sulbak wa macheet misil dawwart.
Laakin wakit tabga kabiir,
timattit iideenak wa naadum aakhar yarbutak wa yiwaddiik fi bakaan inta ma tidoor tamchi foogah.
19 Wa Isa gaal al-kalaam da achaan yiʼoori Butrus be l-moot hu yumuut wa yimajjid Allah beyah.
Wa baʼad da,
Isa gaal :
Taabiʼini.
20 Wa Butrus anlafat wa chaaf waraahum al-tilmiiz al-Isa yiriidah.
Wa da bas al-tilmiiz al-takka wara lahaddi lihig sadur Isa wakit gaaʼidiin yilʼachcho wa gaal «
Sayyidna,
yaatu al-naadum al-yidoor yukhuunak ? ».
21 Wa Butrus chaafah wa gaal :
Ya sayyidna,
tuguul chunu fi l-naadum da ?
22 Wa Isa radda leyah wa gaal :
Kan ana nidoor hu yagood lahaddi nigabbil kula,
da ma lammaak.
Taabiʼni bas.
23 Wa min al-yoom da,
naas gaalo al-tilmiiz da ma yumuut.
Wa l-kalaam da chattat fi ust al-akhwaan.
Laakin Isa ma gaal le Butrus kadar al-tilmiiz al-aakhar ma yumuut.
Hu gaal «
kan nidoor hu yagood lahaddi nigabbil kula,
da ma lammaak ».
24 Wa da bas al-tilmiiz al-gaaʼid yachhad le Isa fi l-kalaam da.
Wa hu bas al-katab kulla l-kalaam fi l-Kitaab da wa naʼarfu chahaadtah sahiihe.
25 Wa Isa sawwa achya ziyaada ma maktuubiin fi l-kitaab da.
Wa fi fikri ana,
kan dawwaro yaktubu kulla l-achya dool,
al-dunya kullaha ke ma tagdar tichiil al-kutub al-yaktubuuhum.