Kharaar Bilaatus
19
Wa Bilaatus wadda Isa daakhal wa amar askarah achaan yajluduuh.
2 Wa wakit jaladooh khalaas,
al-askar sawwo leyah taaj min al-chook wa khattooh fi raasah wa labbasooh be khalag loonah garadi misil khalag hana malik.
3 Wa gammo yaju giddaamah wa yuguulu «
Salaam aleek,
ya malik al-Yahuud !
» wa yudugguuh amkufuuf.
4 Wa Bilaatus marag battaan.
Wa hajja le l-naas wa gaal :
Chiifuuh,
namurgah leeku achaan taʼarfu ma ligiit foogah jariime.
5 Wa Isa marag laabis al-taaj al-sawwooh min al-chook wa l-khalag al-garadi.
Wa Bilaatus hajja leehum wa gaal :
Daahu al-raajil.
6 Wa kubaaraat rujaal al-diin wa khaddaamiinhum chaafooh wa awwo foogah wa gaalo :
Aktuluuh fi l-saliib !
Aktuluuh fi l-saliib !
Wa Bilaatus gaal :
Intu bas chiiluuh wa aktuluuh fi l-saliib.
Kan leyi ana,
ma ligiit foogah khata.
7 Wa laakin al-Yahuud raddo leyah wa gaalo :
Indina gaanuun wa hasab al-gaanuun da,
hu laazim yumuut achaan hu sawwa nafsah Ibn Allah.
8 Wa wakit Bilaatus simiʼ al-kalaam da,
khoof chadiid karabah be ziyaada.
9 Wa hu gabbal fi beet al-hakuuma wa saʼal Isa wa gaal :
Inta jiit min ween ?
Wa laakin Isa ma radda leyah kalaam.
10 Wa achaan da,
Bilaatus gaal :
Ma tidoor tihajji leyi walla ?
Ma fihimt indi sulta foogak wa ana nagdar natligak aw naktulak fi l-saliib walla ?
11 Wa Isa radda leyah wa gaal :
Ma indak sulta foogi illa kan awwal Allah antaak al-fursa wa achaan da,
al-naadum al-sallamaani leek hu khaati minnak ziyaada.
12 Wa wakit Bilaatus simiʼ al-kalaam da,
hu dawwar yatlig Isa laakin al-Yahuud raddo leyah be hiss chadiid wa gaalo :
Kan tatlig al-naadum da,
sultaan al-Roomaaniyiin ma yiriidak.
Kan naadum yisawwi nafsah malik,
hu yisawwi nafsah adu le sultaan al-Roomaaniyiin.
Hakamo al-Masiih be l-moot
13 Wakit Bilaatus simiʼ al-kalaam da,
hu marag Isa wa gaʼad tihit fi kursi al-waali al-gaaʼid fi l-bakaan al-usmah Saahat al-Hujaar wa be kalaam al-Yahuud usmah Jabbaasa.
14 Wa l-yoom da,
jumʼa hana Iid al-Fisha wa l-wata gaayle.
Wa Bilaatus hajja le l-Yahuud wa gaal :
Chiifuuh,
daahu malikku.
15 Wa awwo foogah wa gaalo :
Chiilah,
aktulah !
Aktulah fi l-saliib !
Wa Bilaatus saʼalaahum wa gaal :
Tidooru ana naktul malikku fi saliib walla ?
Wa kubaaraat rujaal al-diin raddo leyah wa gaalo :
Ma indina malik illa sultaan al-Roomaaniyiin.
16 Wa khalaas,
Bilaatus sallam Isa le l-askar achaan yaktuluuh fi saliib.
Wa gammo chaalooh.
17 Wa Isa marag chaayil al-saliib al-dawwaro yaktuluuh foogah wa waddooh fi bakaan waahid usmah bakaan hana l-Jumjuma wa be kalaam ibraani usmah Juljusa.
Al-Masiih salabooh
18 Wa fi l-bakaan da,
khatto Isa fi l-saliib wa salabo maʼaayah naaseen,
waahid fi nussah al-zeenaay wa waahid fi nussah al-israay wa hu fi usuthum.
19 Wa Bilaatus katab fi looh waahid wa allagah foog fi raas al-saliib.
Wa l-kalaam al-maktuub foogah buguul «
Isa min al-Naasira malik al-Yahuud ».
20 Wa salabo Isa gariib le l-madiina wa achaan da,
Yahuud katiiriin garo kalaam al-maktuub da.
Wa katabooh be kalaam ibraani wa kalaam laatiini wa kalaam yuunaani.
21 Wa kubaaraat rujaal al-diin hajjo le Bilaatus wa gaalo :
Ma taktib malik al-Yahuud.
Aktib al-naadum da gaal hu malik al-Yahuud.
22 Wa Bilaatus radda leehum wa gaal :
Al-kalaam al-katabtah ma nikhayyirah.
23 Wa wakit al-asaakir al-arbaʼa salabo Isa khalaas,
humman chaalo khulgaanah wa gassamoohum ambeenaathum.
Wa jawaaniitah bas faddalat.
Wa l-jawaaniye hi kullaha ke matruura wa ma indaha khiyaate.
24 Wa achaan da,
hajjo ambeenaathum wa gaalo :
Ma nicharrutuuha.
Nisawwu amʼiyeedaat wa l-naadum al-jaat fi gismah yichiilha.
Wa be misil da,
kalaam al-Kitaab tamma al-buguul <Humman gassamo khulgaani ambeenaathum wa sawwo amʼiyeedaat le lubaasi>.
Wa da bas al-cheyy al-sawwooh al-askar.
25 Wa fiyah awiin waagfaat gariib le l-saliib al-Isa gaaʼid foogah.
Wa hinna ammah Mariyam wa khaaltah wa Mariyam marit Kuluuba wa Mariyam al-Majdaliiye.
26 Wa Isa chaaf ammah wa chaaf al-tilmiiz al-hu yiriidah bilheen waagif gariib leeha.
Wa hajja le ammah wa gaal :
Mara zeene chiifiih,
da wileedki.
27 Wa hajja le tilmiizah wa gaal :
Chiifha,
di ammak.
Wa l-tilmiiz waddaaha fi beetah wa min al-yoom da,
hi sakanat maʼaayah.
Moot al-Masiih
28 Wa Isa irif kulla l-cheyy kammal.
Wa hu hajja battaan achaan al-kalaam al-maktuub fi sababah fi l-Kitaab yitimm.
Wa hu gaal :
Ana atchaan.
29 Wa fi l-bakaan da,
fiyah kooro hana khall haamud wa ballo sooso fi l-khall wa khattooh fi raas ageeg hana zuufa wa rafaʼooh foog gariib le khachmah.
30 Wa Isa chirib min al-khall wa gaal :
Tamma khalaas.
Wa dangar raasah wa khalla ruuhah tufuut.
31 Wa da al-yoom al-yihassulu foogah khumaam hana yoom al-sabit.
Wa ambaakir yoom kabiir fi l-iid.
Wa l-Yahuud dawwaro al-janaazaat ma yagoodu fi l-salabaan yoom al-sabit.
Wa achaan da,
talabo min Bilaatus yikassuru rijileen al-masluubiin achaan yumuutu ajala wa khalaas al-janaazaat yidalluuhum.
32 Wa l-askar jo le awwal naadum al-salabooh maʼa Isa wa kassaro rijileenah wa sawwo nafs al-cheyy le l-taani.
33 Wa laakin wakit jo le Isa,
chaafo hu mayyit khalaas.
Wa achaan da ma kassaro rijileenah.
34 Laakin askari waahid taʼan fi naaytah be harba wa tawwaali ke daffag minnah damm wa almi.
35 Al-chaafah be eenah chaahid leyah wa chahaadtah sahiihe wa hu yaʼarif kalaamah sahiih wa hu yachhad achaan intu kula tiʼaamunu.
36 Wa l-cheyy da bigi achaan kalaam al-maktuub fi l-Kitaab yitimm.
Buguul <Ma yikassuru adum waahid min udaamah>.
37 Wa l-Kitaab kula buguul <Yugummu yichiifu al-naadum al-taʼanooh>.
Al-Masiih dafanooh
38 Wa baʼad da,
Yuusuf min hillit al-Raama macha le Bilaatus wa talab minnah janaazat Isa.
Hu tilmiiz hana Isa laakin gaaʼid yitaabiʼah be sirr achaan hu khaayif min al-Yahuud.
Wa Bilaatus antaah izin wa Yuusuf macha chaal al-janaaza.
39 Wa Nigudiimus al-naadum al-yoom waahid macha hajja maʼa Isa be l-leel,
macha maʼaayah wa jaab talaatiin kiilo hana l-dihin al-indah fiiha sibir wa riihe usumha uud.
40 Wa chaalo janaazat Isa wa ballo gabag tawiil fi l-dihin wa laffo beyah jismah.
Wa be misil da,
kafanooh fi aadat al-Yahuud.
41 Wa fiyah jineene gariib le l-bakaan al-katalo Isa foogah.
Wa fi l-jineene khabur* jadiid gaaʼid wa lissaaʼ ma dafano foogah naadum.
42 Wa l-khabur da gariib.
Wa l-yoom al-Yahuud yihassulu foogah khumaam yoom al-sabit gariib yikammil.
Wa achaan da dafano Isa fi l-bakaan da.