Al-Masiih karabooh
18
Wa wakit Isa kammal al-duʼa da,
hu gamma maʼa talaamiizah wa gataʼo waadi Khidruun.
Wa jo le jineene waahide wa dakhalo fiiha.
2 Wa Yahuuza al-naadum al-khaan Isa kula irif al-bakaan achaan Isa lamma foogha maʼa talaamiizah iddat marraat.
3 Wa Yahuuza ja le l-jineene be askar roomaaniyiin wa be naas murassaliin min kubaaraat rujaal al-diin wa l-Fariisiyiin.
Wa humman musallahiin wa chaayliin fawaaniis wa iidaan bidaawu beehum.
4 Wa Isa irif kulla cheyy al-yabga foogah wa macha leehum wa gaal :
Tifattuchu yaatu ?
5 Wa raddo leyah wa gaalo :
Nifattuchu Isa min hillit al-Naasira.
Wa Isa gaal :
Ana bas hu.
Wa Yahuuza al-khaayin gaaʼid fi usuthum.
6 Wa wakit Isa gaal «
Ana bas hu »
humman kasso minnah wara wa wagaʼo fi l-turaab.
7 Wa marra taaniye hu saʼalaahum wa gaal :
Tifattuchu yaatu ?
Wa gaalo :
Isa min hillit al-Naasira.
8 Wa Isa radda leehum wa gaal :
Awwal ooreetku ana bas hu.
Wa khalaas kan tidooruuni,
khallu al-naas al-maʼaayi yamchu.
9 Wa hu gaal al-kalaam da,
achaan al-kalaam al-gaalah min awwal yitimm.
Awwal hu gaal «
min al-naas al-inta anteetni,
ma fi naadum waddar ».
10 Wa Simʼaan Butrus indah seef wa sallah wa darab beyah abid hana kabiir rujaal al-diin wa gataʼ adaanah al-zeene.
Wa usum al-abid da Malkhus.
11 Wa Isa hajja le Butrus wa gaal :
Dakhkhil seefak fi beetah.
Kikkeef ma nachrab min kaas al-taʼab al-Abuui antaani ?
12 Wa l-askar maʼa kabiirhum wa l-naas al-murassaliin min kubaaraat al-Yahuud karabo Isa wa rabbatooh.
13 Wa awwal cheyy,
waddooh le Hanaan.
Wa hu abu marit Gayaafa kabiir rujaal al-diin fi l-sana di.
14 Wa Gayaafa da,
hu bas al-naadum al-gaal le kubaaraat al-Yahuud akheer leehum kan naadum waahid yumuut le faaydit al-chaʼab.
Butrus nakar Isa
15 Wa Simʼaan Butrus wa tilmiiz aakhar macho wara Isa.
Wa l-tilmiiz al-aakhar maʼruuf le kabiir rujaal al-diin wa achaan da,
gidir dakhal fi hooch al-beet maʼa Isa.
16 Wa Butrus wigif barra fi khachum al-beet.
Wa l-tilmiiz al-maʼruuf le kabiir rujaal al-diin marag le l-khaddaama al-masʼuula fi l-baab wa hajja leeha wa wadda Butrus daakhal.
17 Wa l-khaddaama saʼalatah le Butrus wa gaalat :
Inta kula tilmiiz hana l-raajil da ?
Wa Butrus gaal :
La,
la.
18 Al-wata baarde.
Wa l-khaddaamiin wa l-haras oogado naar fi kaanuun achaan yiddaffo fi l-naar.
Wa Butrus gaaʼid yiddaffa maʼaahum.
19 Wa kabiir rujaal al-diin gamma saʼal Isa min talaamiizah wa min taʼaaliimah.
20 Wa Isa radda leyah wa gaal :
Ana hajjeet kalaam waadih giddaam kulla al-naas.
Min al-awwal allamt al-naas fi buyuut al-sala wa fi Beet Allah wa fi l-bakaanaat al-kulla l-Yahuud yilimmu fooghum.
Ma gult cheyy be achiir.
21 Maala tasʼalni ?
Al-naas al-simʼo kalaami asʼalhum min al-kalaam al-ana gultah leehum.
Humman baʼarfu al-kalaam al-ana gultah.
22 Wa wakit gaal al-kalaam da,
waahid min al-haras al-waagfiin jambah chaddagah wa gaal :
Kikkeef turudd le kabiir hana rujaal al-diin be misil da ?
23 Wa Isa radda leyah wa gaal :
Kan kalaami kidib,
achhad foog al-kidib.
Laakin kan kalaami sahiih,
maalak darabtini ?
24 Wa Hanaan wadda Isa murabbat ke le Gayaafa kabiir rujaal al-diin.
25 Wa Simʼaan Butrus waagif yiddaffa fi l-naar.
Wa gaalo leyah :
Inta ma tilmiizah ?
Wa hu nakar wa gaal :
La,
ana ma tilmiizah.
26 Wa waahid min khaddaamiin hana kabiir rujaal al-diin hajja leyah.
Wa hu akhu hana l-naadum al-Butrus gataʼ adaanah.
Wa hu saʼal Butrus wa gaal :
Ana ma chiftak maʼaayah fi l-jineene walla ?
27 Wa Butrus nakar battaan wa tawwaali ke al-diik ooʼa.
Al-Masiih giddaam Bilaatus
28 Wa marago Isa min beet Gayaafa wa waddooh fi beet al-hakuuma.
Al-wata bigat fajur.
Al-kubaaraat zaathum ma dakhalo fi beet hana l-waali al-Roomaani achaan da yoom al-iid.
Wa kan dakhalo fi beet naadum ma Yahuudi,
yitallufu tihaarithum wa ma yagdaro yaakulu acha al-Fisha.
29 Wa achaan da,
Bilaatus al-waali marag leehum wa gaal :
Chunu al-tuhma al-khatteetuuha foog al-naadum da ?
30 Wa raddo leyah wa gaalo :
Al-naadum da kan ma mujrim,
ma nisallumuuh leek.
31 Wa Bilaatus gaal :
Chiiluuh wa chaaruʼuuh hasab gaanuunku.
Wa l-Yahuud gaalo :
Gaanuunak ma yasmah leena achaan nahkumu ayyi naadum be l-moot.
32 Be misil da,
al-kalaam al-Isa gaalah fi keefiiye hana mootah* bada yabga.
33 Wa Bilaatus gabbal fi beet al-hakuuma wa naada Isa.
Wa saʼalah wa gaal :
Inta malik al-Yahuud walla ?
34 Wa Isa radda leyah wa gaal :
Al-suʼaal da,
suʼaalak walla suʼaal hana naas aakhariin ?
35 Wa Bilaatus radda leyah wa gaal :
Haay !
Ana Yahuudi walla ?
Gabiiltak inta bas wa kubaaraat rujaal al-diin sallamook leyi.
Chunu al-cheyy al-inta sawweetah ?
36 Isa radda leyah wa gaal :
Mamlakati ma mamlaka hana l-dunya.
Kan mamlakati hana l-dunya,
khaddaamiini yugummu yidaawusu achaan al-Yahuud ma yakurbuuni.
Wa laakin mulki ma jaayi min al-dunya.
37 Wa Bilaatus gaal :
Haa,
inta malik ?
Wa Isa radda leyah gaal :
Inta gult ana malik.
Wa be l-sahiih,
daahu al-sabab ana mawluud wa jiit fi l-dunya,
achaan nachhad le l-hagg.
Ayyi naadum al-yiriid al-hagg yasmaʼ kalaami.
38 Wa Bilaatus gaal :
Chunu al-hagg ?
Wa wakit gaal al-kalaam da,
Bilaatus marag le l-Yahuud wa gaal leehum :
Ana ma ligiit foog al-naadum da ayyi jariime.
39 Laakin fi aaditku waajib natlig makruub waahid fi Iid al-Fisha.
Tidooru natlig malik al-Yahuud walla ?
40 Wa be hiss chadiid gaalo :
La,
ma hu.
Atlig leena Baraabaas.
Wa Baraabaas hu mujrim wa saawri.