Al-talaamiiz yatʼabo
16
Ana gult leeku kulla l-kalaam da achaan ma tamurgu min al-derib al-adiil.
2 Yaturduuku min buyuut al-sala.
Wa yaji wakit waahid ayyi naadum al-yaktulku yuguul hu gaaʼid yakhdim le Allah.
3 Yakrahooku misil da achaan Abuui Allah ma irifooh wa ma irifooni ana.
4 Laakin gult leeku al-kalaam da achaan wakit al-taʼab yaji foogku,
tifakkuru wa taʼarfu kadar ana ooreetku beyah.
Wa ana ma ooreetku min al-bidaaya be l-taʼab al-yajiiku achaan awwal ana gaaʼid maʼaaku.
Amal al-Ruuh al-Khudduus
5 Wa hassaʼ ana nigabbil le Allah al-rassalaani wa ma fi naadum minku yasʼalni «
Inta maachi ween ? ».
6 Intu haznaaniin bilheen achaan ana hajjeet leeku be l-kalaam da.
7 Laakin nuguul leeku al-hagg,
yukuun leeku akheer kan namchi.
Kan ana ma namchi,
al-Muʼaawin ma yaji leeku.
Laakin kan ana macheet khalaas,
nirassilah leeku.
8 Wa wakit hu yaji,
hu yiʼarrif le naas al-dunya zunuubhum wa yiʼarrifhum al-haal al-saalhe wa l-hisaab.
9 Hu yiʼarrifhum al-zanib achaan ma aamano beyi.
10 Hu yiʼarrifhum al-haal al-saalhe achaan ana namchi le Abuui wa ma tichiifuuni.
11 Hu yiʼarrifhum al-Hisaab achaan Allah haasab Ibliis sultaan al-dunya khalaas.
12 Indi kalaam ziyaada nidoor nuguulah leeku laakin hassaʼ intu ma tagdaro tahmalooh.
13 Wakit Ruuh al-Hagg yajiiku,
hu yuguudku fi l-hagg al-kaamil.
Al-kalaam al-yuguulah ma jaayi minnah bas laakin hu yuguul kulla cheyy al-yasmaʼah wa yiʼooriiku be l-cheyy al-lissaaʼ ma bigi.
14 Hu yichiil min kalaami wa yiʼooriiku beyah wa misil da,
hu yibayyin leeku gudurti al-majiide.
15 Kulla cheyy hana Abuui hanaayi.
Wa achaan da,
gult leeku hu yichiil min kalaami wa yiʼooriiku beyah.
16 Baʼad chiyya bas,
ma tichiifuuni wa baʼad chiyya battaan,
tichiifuuni.
Al-farha gariibe
17 Wa waahidiin min talaamiizah hajjo ambeenaathum wa gaalo :
Maala gaal «
Baʼad chiyya bas ma,
tichiifuuni.
Wa baʼad chiyya battaan,
tichiifuuni ».
Wa maala gaal «
achaan nigabbil le Abuui »
?
Chunu maʼana al-kalaam da ?
18 Wa gaalo :
Wa da chunu «
wakit chiyya »
?
Ma fihimna kalaamah.
19 Wa Isa irif kadar dawwaro yasʼalooh.
Wa saʼalaahum wa gaal :
Hal intu gaaʼidiin tichaawuru ambeenaatku fi kalaami walla ?
Hal fihimtu kalaami «
baʼad chiyya bas,
ma tichiifuuni wa baʼad chiyya battaan,
tichiifuuni » ?
20 Asmaʼo nuguul leeku al-hagg,
intu tabku wa tahzano wa naas al-dunya yafraho.
Sahiih,
intu tahzano laakin al-farha tibaddil leeku al-hizin.
21 Kan mara khalbaane wa wakt al-waaluuda ja,
hi tatʼab taʼab chadiid.
Wa wakit wildat sakhiirha khalaas,
hi farhaane wa tansa al-taʼab achaan jaabat naadum fi l-dunya.
22 Wa yabga leeku misil da.
Hassaʼ tatʼabo laakin ana nigabbil battaan nichiifku wa intu tafraho farha chadiide wa ma fi naadum yichiil minku al-farha.
23 Fi l-yoom al-yaji da,
intu ma tasʼalooni cheyy.
Asmaʼo,
nuguul leeku al-hagg,
ayyi cheyy al-tasʼalooh min Abuui be usmi,
hu yantiiku.
24 Lahaddi l-yoom,
intu ma saʼaltu cheyy min Allah be usmi.
Asʼalooh wa hu yantiiku achaan tafraho farha chadiide.
25 Ana hajjeet leeku be amsaal laakin fi l-wakit al-baji,
ma nihajji be amsaal wa niʼooriiku be Abuui be kalaam waadih.
26 Wa fi l-wakit al-baji tasʼalo Allah be usmi.
Ana ma nuguul kadar ana nasʼal Abuui fi chaanku.
27 Abuui zaatah yihibbuku achaan intu habbeetuuni wa aamantu ana jiit min Allah.
28 Ana jiit min Abuui wa dakhalt fi l-dunya.
Wa hassaʼ namrug min al-dunya wa nigabbil le Abuui.
29 Wa talaamiizah gaalo :
Khalaas hassaʼ da hajjeet be kalaam waadih wa ma be amsaal.
30 Hassaʼ naʼarfu inta taʼarif kulla cheyy wa kan naadum ma yasʼalak kula,
inta taʼarif suʼaalah.
Wa achaan da,
aniina nisaddukhu inta jiit min Allah.
31 Wa Isa radda leehum wa gaal :
Hassaʼ tuguulu aamantu walla ?
32 Laakin wakit waahid yaji wa hassaʼ al-wakit da ja.
Wa fi l-wakit da,
yichattutuuku ayyi waahid yamchi le beetah.
Intu tikhalluuni wiheedi.
Laakin be l-sahiih,
ana ma wiheedi achaan Abuui gaaʼid maʼaayi.
33 Ana gult leeku kulla l-kalaam da,
achaan talgo al-salaam be alaakhitku maʼaayi wa guluubku yarugdu.
Akiid,
tatʼabo fi l-dunya laakin ana annasart fi l-dunya wa achaan da,
chiddu heelku.