Masal chadarat al-inab
15
Ana bas chadarat al-inab al-sahiihe wa Abuui hu siid al-jineene.
2 Ayyi firiʼ al-ma gaaʼid yalda,
hu yamurgah minni.
Wa ayyi firiʼ al-gaaʼid yalda,
hu yibarbirah achaan yabga nadiif wa yalda ziyaada.
3 Wa intu bigiitu nudaaf khalaas be gudrat al-kalaam al-ana gultah leeku.
4 Agoodu saabtiin foogi wa nagood saabit foogku.
Al-firiʼ ma yagdar yalda wiheedah.
Al-firiʼ yalda achaan gaaʼid saabit fi l-chadara.
Wa intu kula ma tagdaro tisawwu al-cheyy al-Allah bidoorah,
illa kan intu tagoodu saabtiin foogi.
5 Ana chadarat al-inab wa intu al-furuuʼ.
Kan naadum gaaʼid saabit foogi,
ana nagood saabit foogah wa hu yabga misil al-firiʼ al-yalda katiir.
Intu ma tagdaro tisawwu cheyy illa beyi.
6 Kan naadum ma gaaʼid saabit foogi,
hu yabga misil firiʼ al-ma yalda wa yamurguuh min al-chadara wa yazguluuh wa hu yaybas marra waahid.
Wa l-furuuʼ al-misil da,
yilimmuuhum wa yidaffuguuhum fi ust al-naar wa yiharruguuhum.
7 Kan intu tagoodu saabtiin foogi wa kalaami yagood saabit fi guluubku,
asʼalo min Allah ayyi cheyy al-tidooruuh wa Allah yisawwiih leeku.
8 Kan intu talaamiizi,
intu tabgo misil al-furuuʼ al-yaldo iyaal katiir wa be misil da,
Abuui yalga chukur ziyaada.
9 Min al-awwal ana nihibbuku misil Abuui yihibbini.
Agoodu saabtiin fi mahabbati.
10 Kan intu titaabuʼu al-wasaaya al-anteethum leeku,
intu tabgo saabtiin fi mahabbati misil ana saabit fi mahabbat Abuui achaan ana taabaʼt wasaayaah.
11 Ana gult leeku al-kalaam da achaan al-farha al-gaaʼide foogi talhagku wa achaan tabgo farhaaniin marra waahid.
12 Wa l-wasiiye al-nantiiha leeku di hi,
waajib tirraayado ambeenaatku misil ana niriidku.
13 Wa ma fi mahabba kabiire min mahabbat al-naadum al-yihibb rufgaanah lahaddi yafdaahum be ruuhah.
14 Wa intu rufgaani kan titaabuʼu wasaaya al-anteethum leeku.
15 Ana ma nuguul battaan intu khaddaamiini achaan al-khaddaam ma yaʼarif kulla cheyy al-sayyidah gaaʼid yisawwiih.
Ninaadiiku rufgaani achaan ana ooreetku be kulla cheyy al-simiʼtah min Abuui.
16 Intu ma ikhtirtuuni.
Ana bas ikhtirtuku wa rassaltuku achaan tijiibu leyi faayde wa achaan al-faayde di tuduum.
Wa ayyi cheyy al-tasʼalooh min Abuui be usmi,
hu yantiiku.
17 Wa diihi al-wasiiye al-nantiiha leeku,
arraayado ambeenaatku.
Naas al-dunya yakraho al-talaamiiz
18 Kan naas al-dunya yakrahooku,
aʼarfu kadar kirhooni ana gubbaal ma yakrahooku.
19 Kan intu hagg al-dunya halaalha,
naas al-dunya yihibbuuku wa yuguulu intu akhwaanhum.
Laakin hassaʼ intu ma naas hana l-dunya achaan ana ikhtirtuku min usut naas al-dunya achaan tabgo naasi wa khalaas naas al-dunya yakrahooku.
20 Fakkuru fi l-kalaam al-ana gultah leeku.
Ana gult al-abid ma akbar min siidah.
Wa kan taʼʼabooni ana,
yitaʼʼubuuku intu kula.
Wa kan khiblo kalaami,
yakhbalo kalaamku kula.
21 Yitaʼʼubuuku intu achaan intu naas hana usmi wa achaan ma irifo Allah al-rassalaani.
22 Awwal kan ma jiit kallamt leehum,
humman ma yabgo khaatiyiin.
Laakin khalaas,
ana kallamt leehum wa l-khata saabit fooghum.
23 Ayyi naadum al-yakrahni,
yakrah Abuui kula.
24 Awwal kan ana ma sawweet fi usuthum amal al-naadum aakhar abadan ma sawwaah,
humman ma yabgo khaatiyiin.
Laakin hassaʼ chaafo al-ajaayib wa kirhooni wa kirho Abuui.
25 Wa be misil da,
al-kalaam al-maktuub fi l-Kitaab al-humman yagruuh bigi fooghum sahiih.
Maktuub <Kirhooni bala sabab>.