Al-derib wa l-hagg wa l-haya
14
Ma tihimmu.
Aamunu be Allah wa aamunu beyi.
2 Fiyah buyuut katiiriin fi hooch hana Abuui.
Wa kan ma ke,
ana ma nuguul leeku kadar namchi hinaak nihassil leeku bakaan.
3 Wa wakit macheet hassalt leeku bakaan,
nigabbil niwaddiiku hinaak achaan tagoodu maʼaayi.
Wa be misil da,
intu tagoodu fi l-bakaan al-ana gaaʼid foogah.
4 Wa taʼarfu derib hana l-bakaan al-namchi foogah.
5 Wa Tuuma saʼalah wa gaal :
Sayyidna,
ma naʼarfu al-bakaan al-tamchi foogah.
Kikkeef naʼarfu derbah ?
6 Wa Isa radda leyah wa gaal :
Ana bas al-derib wa l-hagg wa l-haya.
Ma fi naadum yalhag Allah illa beyi.
7 Kan iriftuuni,
akiid taʼarfu Abuui Allah kula.
Wa min hassaʼ taʼarfuuh wa chiftuuh khalaas.
8 Wa Filibbus gaal :
Sayyidna,
khalliina nichiifu Abuuk wa abadan ma nasʼalo cheyy aakhar.
9 Wa Isa gaal leyah :
Filibbus,
ana tawwalt maʼaaku.
Kikkeef ma iriftini ?
Ayyi naadum al-chaafaani,
hu chaaf Abuui khalaas.
Kikkeef tuguul «
khalliina nichiifu Abuuk » ?
10 Wa Isa saʼalah wa gaal :
Lissaaʼ ma aamant kadar ana fi Abuui wa Abuui fiyi walla ?
Al-kalaam al-nuguulah leeku ma jaayi minni wiheedi.
Abuui mawjuud fiyi wa hu yisawwi amalah.
11 Aamunu kadar ana mawjuud fi Abuui wa Abuui mawjuud fiyi.
Wa kan ma tiʼaamunu kalaami kula,
fakkuru fi l-aʼmaal al-sawweethum wa aamunu beyi be sababhum.
12 Asmaʼo,
nuguul leeku al-hagg,
ayyi naadum al-muʼmin beyi hu kula yisawwi al-aʼmaal al-ana nisawwiihum.
Aywa hu yisawwi aʼmaal kubaar minhum achaan ana gabbalt le Abuui.
13 Wa ayyi cheyy al-tasʼalooh be usmi,
ana nisawwiih achaan Abuui yalga chukur ziyaada be sabab Ibnah.
14 Aywa,
ayyi cheyy al-tasʼalooh be usmi,
nisawwiih.
Jayyit al-Ruuh al-Khudduus
15 Kan tihibbuuni,
intu titaabuʼu al-wasaaya al-anteethum leeku.
16 Wa ana nasʼal Abuui wa hu yantiiku fi badali al-Muʼaawin.
Wa l-Muʼaawin yagood maʼaaku daayman.
17 Hu Ruuh al-Hagg.
Naas al-dunya ma yagdaro yakhbalooh fi guluubhum achaan humman ma yichiifuuh wa ma yaʼarfuuh.
Wa laakin intu taʼarfuuh achaan hu gaaʼid maʼaaku wa baʼadeen yagood fi guluubku.
18 Ana nikhalliiku laakin ma nikhalliiku marra waahid.
Ana naji leeku battaan.
19 Baʼad wakit chiyya bas,
ana namchi wa naas al-dunya ma yichiifuuni battaan laakin intu tichiifuuni.
Ana nahya wa achaan da,
intu kula tahyo.
20 Wa fi l-yoom da,
taʼarfu kadar ana gaaʼid fi Abuui wa intu gaaʼidiin fiyi wa ana gaaʼid fiiku.
21 Ayyi naadum al-simiʼ al-wasaaya al-ana anteethum wa gaaʼid yitaabiʼhum,
da bas al-naadum al-yihibbini.
Wa kan naadum yihibbini,
Abuui Allah yihibbah wa ana kula nihibbah wa naji leyah wa nibayyin nafsi leyah.
22 Wa tilmiiz waahid usmah Yahuuza wa hu ma Yahuuza al-Iskhariyooti wa hu saʼal Isa wa gaal :
Sayyidna,
kikkeef tibayyin nafsak leena wa ma le naas al-dunya ?
23 Wa Isa radda leyah wa gaal :
Kan naadum yihibbini hu yitaabiʼ kalaami.
Wa Abuui yihibbah wa aniina naju leyah wa naskunu maʼaayah.
24 Wa l-naadum al-ma yihibbini ma yitaabiʼ kalaami.
Al-kalaam al-tasmaʼooh min khachmi ma hanaayi.
Al-kalaam da jaayi min Abuui al-rassalaani.
25 Ana gult al-kalaam da wakit ana lissaaʼ gaaʼid maʼaaku.
26 Laakin al-Muʼaawin yaji wa hu al-Ruuh al-Khudduus wa Abuui yirassilah leeku be usmi.
Wa hu yiʼallimku kulla cheyy wa yifakkirku kulla l-kalaam al-ana gultah leeku.
27 Nikhalliiku be salaam.
Nantiiku salaam hanaayi.
Al-salaam al-ana nantiih leeku afdal min ayyi salaam al-talgooh fi l-dunya.
Ma tihimmu wa ma takhaafo.
28 Intu simiʼtu ana gult namchi wa nigabbil leeku.
Kan tihibbuuni,
tafraho maʼaayi achaan Abuui akbar minni wa ana namchi leyah.
29 Wa khalaas ana ooreetku be l-cheyy al-gariib yabga.
Wa hajjeet beyah gubbaal ma yabga achaan wakit bigi khalaas,
intu tiʼaamunu.
30 Wa nihajji maʼaaku chiyya bas achaan Ibliis sultaan al-dunya jaayi.
Hu ma yagdar yisawwi leyi cheyy.
31 Wa laakin ana nisawwi kulla cheyy al-Abuui amaraani beyah achaan kulla naas al-dunya yaʼarfu ana nihibb Abuui.
Khalaas gummu foog wa namchu.