Al-Masiih khassal rijileen talaamiizah
13
Wa gubbaal Iid al-Fisha ma yabda,
Isa irif kadar al-wakit tamma leyah wa laabudda yamrug min al-dunya wa yigabbil le Abuuh.
Wa min al-bidaaya,
hu yihibb naasah al-gaaʼidiin fi l-dunya wa yihibbuhum lahaddi al-akhiir.
2 Wa Isa wa talaamiizah gaaʼidiin fi l-acha.
Wa Yahuuza wileed Simʼaan al-Iskhariyooti indah niiye fi galbah min Ibliis achaan yukhuun Isa.
3 Wa Isa yaʼarif kadar hu ja min Allah wa yigabbil le Allah wa yaʼarif kadar Abuuh antaah gudra foog kulla cheyy.
4 Wa wakit gaaʼidiin yaakulu,
Isa gamma foog wa salla khalagah al-barraani wa chaal al-gitʼe al-buguchchu beeha wa rabat beeha sulbah.
5 Wa sabba almi fi maaʼuun wa bada yikhassil rijileen talaamiizah.
Wa gachchaahum be l-gitʼe al-rabat beeha sulbah.
6 Wa ja le Simʼaan Butrus.
Wa Butrus gaal :
Sayyidna,
tidoor tikhassil rijileeni walla ?
7 Wa Isa radda leyah wa gaal :
Inta lissaaʼ ma fihimt al-cheyy al-ana gaaʼid nisawwiih laakin baʼadeen tafhamah.
8 Wa Butrus gaal :
Abadan ma tikhassil rijileeni.
Wa Isa radda leyah wa gaal :
Kan ana ma nikhassilak,
inta ma hanaayi.
9 Wa Simʼaan Butrus gaal :
Sayyidna,
kan yabga misil da,
ma tikhassil rijileeni bas.
Khassil iideeni wa raasi kula.
10 Wa Isa gaal :
Kan naadum barrad khalaas,
al-khasuul ma waajib leyah illa fi rijileenah.
Hu nadiif marra waahid wa intu nudaaf laakin ma kulluku.
11 Wa Isa irif al-naadum al-yidoor yukhuunah wa achaan da gaal «
Ma kulluku nudaaf ».
12 Wa wakit Isa khassal rijileenhum khalaas,
hu libis khalagah wa gabbal fi bakaanah wa hajja leehum wa gaal :
Taʼarfu al-cheyy al-ana sawweetah leeku walla ?
13 Intu tuguulu ana muʼallimku wa sayyidku wa kalaamku sahiih.
14 Wa kan ana sayyidku wa muʼallimku wa ana khassalt rijileenku,
waajib kamaan ayyi waahid minku yikhassil rijileen al-aakhariin.
15 Al-cheyy al-ana sawweetah da masal leeku achaan intu kula tisawwu misil ana sawweetah leeku.
16 Asmaʼo,
nuguul leeku al-hagg,
al-abid ma akbar min siidah wa l-mursaal ma akbar min al-rassalah.
17 Wa khalaas,
taʼarfu al-kalaam da wa mabruuk leeku kan tisawwuuh.
18 Wa fi l-kalaam al-nuguulah hassaʼ da,
ma nihajji beeku kulluku.
Naʼarif al-naas al-ana ikhtirtuhum.
Wa laakin al-kalaam al-maktuub fi l-Kitaab laabudda yukuun.
Buguul <Al-naadum al-akal maʼaayi gamma bigi aduui>.
19 Niʼooriiku hassaʼ be l-cheyy al-yidoor yabga gubbaal ma yabga.
Achaan da,
wakit bigi khalaas,
intu tiʼaamunu ana hu.
20 Asmaʼo,
nuguul leeku al-hagg,
ayyi naadum al-yakhbal mursaali,
yakhbalni ana.
Wa l-naadum al-khiblaani ana,
khibil Allah al-rassalaani.
Al-Masiih hajja be Yahuuza al-khaayin
21 Wa wakit Isa gaal al-kalaam da,
hu hizin fi galbah marra waahid.
Wa hajja leehum wa gaal :
Asmaʼo,
nuguul leeku al-hagg,
naadum waahid minku yukhuunni.
22 Wa l-talaamiiz ajjabo wa ma irifo al-naadum al-minhum al-Isa hajja beyah.
Wa kulluhum gaaʼidiin yichchaawafo ambeenaathum.
23 Wa naadum waahid min talaamiizah muntaki jamb Isa fi nussah al-zeenaay wa hu al-tilmiiz al-Isa biriidah bilheen.
24 Wa Simʼaan Butrus sawwa leyah ichaara achaan yasʼal Isa yaatu al-naadum al-hajja beyah.
25 Wa l-tilmiiz takka wara lahaddi lihig sadur Isa wa saʼalah wa gaal :
Sayyidna,
hajjeet be yaatu ?
26 Wa Isa radda leyah wa gaal :
Chiif,
nichiil lugma wa nimallihha be mulaah wa nantiiha le naadum waahid.
Wa da bas hu.
Wa chaal lugma wa mallahaaha wa antaaha le Yahuuza wileed Simʼaan al-Iskhariyooti.
27 Wa Yahuuza chaal al-lugma wa khalaas Ibliis dakhal fi galbah.
Wa Isa hajja leyah wa gaal :
Al-cheyy al-tidoor tisawwiih,
sawwiih ajala.
28 Wa kulluhum al-gaaʼidiin yaakulu simʼo al-kalaam al-Isa gaalah le Yahuuza laakin ma irifo maʼanaatah.
29 Yahuuza hu masʼuul hana sanduug al-gurus wa fi fikir waahidiin,
Isa gaal leyah khalli yamchi yachri al-khumaam al-waajib le l-iid.
Wa fi fikir waahidiin,
Isa gaal leyah khalli yamchi yanti sadakha le l-masaakiin.
30 Wa Yahuuza chaal al-lugma wa tawwaali ke gamma marag.
Wa l-leel gaaʼid wa l-wata dalma.
31 Wa wakit Yahuuza marag khalaas,
Isa hajja leehum wa gaal :
Hassaʼ gudra majiide hana Ibn al-Insaan tinchaaf wa beyah hu,
gudra majiide hana Allah kula tinchaaf.
32 Wa kan gudra majiide hana Allah tinchaaf be sababah,
akiid Allah yanti le Ibn al-Insaan gudra majiide maʼaayah wa yantiih gudra majiide tawwaali.
Al-wasiiye al-jadiide
33 Ya iyaali,
ana nagood maʼaaku wakit chiyya bas.
Intu tifattuchuuni wa laakin nuguul leeku nafs al-kalaam al-gultah le l-Yahuud.
Al-bakaan al-namchi foogah intu ma tagdaro taju foogah.
34 Wa nantiiku wasiiye jadiide wa l-wasiiye hi arraayado ambeenaatku.
Arraayado misil ana niriidku.
35 Wa misil da bas,
kulla l-naas yaʼarfu intu talaamiizi kan intu tirraayado ambeenaatku.
36 Wa Simʼaan Butrus gaal :
Sayyidna,
inta maachi ween ?
Wa Isa radda leyah wa gaal :
Al-bakaan al-namchi foogah lissaaʼ ma tagdar titaabiʼni foogah.
Laakin wakit aakhar titaabiʼni.
37 Wa Butrus saʼalah wa gaal :
Sayyidna,
maala ma nagdar nitaabiʼak hassaʼ ?
Nitaabiʼak lahaddi nafdaak be ruuhi.
38 Wa Isa radda leyah wa gaal :
Hal sahiih ke tidoor tafdaani be ruuhak walla ?
Asmaʼ,
nuguul leek al-hagg,
gubbaal al-diik ma yiʼooʼi,
inta tankurni talaata marraat.