Al-awiin al-taabaʼan al-Masiih
8
Wa baʼad da,
Isa gamma yuruukh fi l-mudun wa l-hillaal.
Wa gaaʼid yiballikh al-naas be bichaarat mamlakat Allah.
Wa l-rusul al-atnaachar maachiin maʼaayah.
2 Wa maʼaayah fi awiin al-Isa daawaahin.
Waahdaat awwal mardaanaat wa waahdaat awwal muchootinaat misil Mariyam al-Majdaliiye al-tarad minha sabʼa chawaatiin
3 wa Jaana marit Khuuza wakiil hana Hiruudus al-muhaafiz wa Suusanna wa awiin aakharaat katiiraat.
Wa l-awiin deel gaaʼidaat yisaaʼidan jamaaʼat Isa min maalhin halaalhin.
Masal al-harraati al-yiteerib
4 Wa l-jamaaʼa bigo naas katiiriin bilheen.
Wa l-naas jaayiin leyah min ayyi hille wa Isa hajja leehum be masal wa gaal :
5 Yoom min al-ayyaam,
harraati waahid marag fi l-zereʼ achaan yiteerib gameh.
Wa wakit gaaʼid yiteerib,
teeraab waahid daffag fi l-derib al-naas yuruukhu foogah.
Wa l-naas fajjakhooh wa l-teer jo akalooh.
6 Wa teeraab waahid daffag foog bakaan hajar wa l-bizre yibsat achaan ma ligat almi.
7 Wa teeraab waahid daffag fi ust al-chook wa l-chook gamma sawa maʼa l-bizre wa khanagaaha.
8 Wa teeraab waahid daffag fi l-turaab al-adiil wa l-bizre gammat wa wildat iyaal katiir.
Wa kulla ganduul indah miya habba.
Wa wakit gaal al-kalaam da khalaas,
hu naada al-jamaaʼa wa gaal :
Ayyi naadum al-indah adaan khalli yasmaʼ.
9 Wa talaamiizah saʼalooh fi maʼana hana l-masal da.
10 Wa Isa gaal :
Allah antaaku izin taʼarfu asraar mamlakat Allah laakin nihajji le l-naas al-aakhariin be amsaal.
Wa be misil da,
induhum uyuun wa laakin ma bichiifu wa basmaʼo al-kalaam wa laakin ma bafhamooh.
11 Wa nifassir leeku al-masal.
Al-teeraab yimassil kalaam Allah.
12 Wa l-teeraab al-daffag fi l-derib yimassil al-naas al-yasmaʼo kalaam Allah laakin Ibliis yaji yichiilah min guluubhum achaan ma yiʼaamunu wa yanjo.
13 Wa l-teeraab al-daffag fi bakaan hajar yimassil al-naas al-yasmaʼo al-kalaam wa yakhbalooh be farha laakin yiʼaamunu wakit chiyya bas.
Wa humman misil bizrat al-gameh al-ma indaha irig wa yamurgu min derib Allah wakit al-suʼuubaat yijarrubu iimaanhum.
14 Wa l-teeraab al-daffag fi ust al-chook yimassil al-naas al-yasmaʼo kalaam Allah wa yamchu fi derib Allah laakin guluubhum malaaniin be l-cheyy al-bukhuss al-dunya misil humuumhum wa l-maal wa l-hala.
Wa achaan da,
ma yabgo gawiiyiin fi l-iimaan wa kalaam Allah ma yagdar yikammil fooghum khidimtah.
15 Wa l-teeraab al-gaaʼid fi l-turaab al-adiil yimassil al-naas al-yasmaʼo kalaam Allah wa yakurbuuh adiil be galib adiil wa niiye mukhlisa.
Wa yasburu wa yijiibu natiija adiile.
16 Wa ma fi naadum yiwalliʼ faanuus wa yikhattiih be maaʼuun wa la yukhuttah tihit al-sariir.
Wa laakin yukhuttah fi bakaan foog achaan al-naas al-yadkhulu fi l-beet yichiifu al-deyy.
17 Kulla cheyy al-mulabbad yinchaaf wa ayyi sirr yinʼarif wa yaji fi l-deyy.
18 Achaan da,
khuttu baalku wa asmaʼo adiil.
Akiid al-naadum al-karab al-kalaam adiil,
Allah yantiih ziyaada.
Wa l-naadum al-ma karab al-kalaam adiil,
Allah yichiil minnah al-kalaam al-hu buguul hu karabah kula.
Amm al-Masiih wa akhwaanah
19 Wa amm Isa wa akhwaanah jo leyah.
Dawwaro yichiifuuh laakin ma gidro yigarrubu leyah achaan katarat al-naas saddat leehum al-derib.
20 Wa l-naas oorooh wa gaalo :
Ammak wa akhwaanak waagfiin barra wa bidooru bichiifuuk.
21 Wa hu radda leehum wa gaal :
Al-naas al-yasmaʼo kalaam Allah wa yitaabuʼuuh,
humman bas ammi wa akhwaani.
Al-Masiih waggaf al-riih al-chadiide
22 Wa yoom waahid Isa hajja le talaamiizah wa gaal :
Taʼaalu nagtaʼo al-bahar.
Wa rikib fi markaba maʼa talaamiizah wa macho.
23 Wa wakit maachiin,
Isa naam fi l-markaba.
Wa riih chadiide bilheen jaat wa saagat foog al-bahar wa gawwamat challaal.
Wa l-markaba gaaʼide tinmali almi wa gariib tatmus.
Wa bigi leehum gaasi bilheen.
24 Wa l-talaamiiz macho le Isa wa gawwamooh min al-noom wa gaalo :
Ya sayyidna,
ya sayyidna !
Aniina mutna !
Wa Isa gamma wa kachcha le l-riih wa l-challaal al-chadiid wa l-riih wa l-challaal wigfo marra waahid.
Wa khalaas al-wata bigat haadiye.
25 Wa hajja leehum wa gaal :
Ween iimaanku ?
Wa l-khoof dakhal leehum wa astakhrabo bilheen wa gaalo ambeenaathum :
Da yaatu al-naadum da,
al-yaamurhum le l-riih wa l-almi kula wa yasmaʼo kalaamah ?
Al-muchootin al-indah chawaatiin katiiriin
26 Wa khalaas,
gataʼo al-bahar wa wislo fi daar al-Jaraasiyiin al-gaaʼide mugaabile daar al-Jaliil.
27 Wa wakit Isa dalla min al-markaba,
naadum min al-hille ja laagaah.
Wa hu muchootin.
Wa min wakit tawiil ma laabis khalag wa la saakin fi beet.
Wa hu saakin fi l-khubuur.
28 Wa hu chaaf Isa wa aat wa sajad giddaamah.
Wa be hiss aali hu gaal :
Ya Isa Ibn Allah al-Aali !
Tidoor minni chunu ?
Nachhadak ma tiʼazzibni.
29 Wa gaal al-kalaam da,
achaan Isa amarah le l-cheetaan al-gaaʼid foogah le yamrug minnah.
Wa l-naadum da,
al-cheetaan daayman yaji foogah yakurbah.
Wa awwal rabatooh wa janzarooh laakin hu gataʼ kulla rubaat wa l-cheetaan saagah fi l-khala.
30 Wa Isa saʼalah wa gaal :
Usmak yaatu ?
Wa hu gaal :
Ana usmi Deech.
Wa hu gaal deech achaan chawaatiin katiiriin dakhalo foogah.
31 Wa l-chawaatiin chahadooh le Isa achaan ma yirassilhum fi bakaan al-azaab.
32 Wa fi taraf al-hajar da,
khanaaziir katiiriin gaaʼidiin basraho.
Wa l-chawaatiin chahado Isa achaan yikhalliihum yadkhulu fi l-khanaaziir.
Wa antaahum izin.
33 Wa l-chawaatiin marago min al-naadum wa dakhalo fi l-khanaaziir.
Wa l-khanaaziir kulluhum jaro min al-juruf wa wagaʼo fi l-bahar wa khalaas,
al-almi akalaahum.
34 Wa wakit ruʼyaanhum chaafo al-cheyy al-bigi da,
gammo arrado wa ooro beyah kulla l-naas al-fi l-hille wa fi l-ziraaʼa.
35 Wa be l-khabar da,
al-naas marago min al-hille achaan yichiifu al-cheyy al-bigi.
Wa jo le Isa wa chaafo al-naadum al-marago minnah al-chawaatiin.
Wa hu gaaʼid tihit yasmaʼ kalaam Isa laabis khulgaan wa aglah aafe.
Wa khaafo bilheen.
36 Wa l-naas al-chaafo al-cheyy al-Isa sawwaah,
ooro al-naas al-aakhariin be kikkeef al-naadum al-awwal muchootin ligi al-aafe.
37 Wa kulla l-naas hana daar al-Jaraasiyiin talabo min Isa yikhalliihum achaan humman khaayfiin khoof chadiid.
Wa achaan da,
hu rikib fi l-markaba wa gabbal fi Daar al-Jaliil.
38 Wa gubbaal Isa ma yamchi,
al-naadum al-marago minnah al-chawaatiin chahadah le Isa achaan yamchi maʼaayah.
Laakin Isa rassalah fi hillitah wa gaal :
39 Gabbil fi beetak wa oori al-naas be kulla cheyy al-Allah sawwaah leek.
Wa khalaas,
gamma faat wa oora kulla naas hillitah be kulla cheyy al-Isa sawwaah leyah.
Al-bineeye al-maatat wa l-mara al-taʼbaane
40 Wa Isa gabbal fi Daar al-Jaliil wa kulla l-naas gaaʼidiin yarjooh wa laagooh be farah.
41 Wa naadum waahid ja usmah Jaayrus wa hu masʼuul fi beet al-sala.
Wa hu sajad giddaam Isa wa chahadah bilheen achaan yaji fi beetah.
42 Indah bineeye waahide bas umurha misil atnaachar sana wa hi gariib tumuut.
Wa Isa macha maʼaayah.
Wa fi naas katiiriin fi l-derib lahaddi gaaʼidiin yiʼassuruuh.
43 Wa fi ust al-naas fiyah mara taʼbaane.
Wa min atnaachar sana damm bidaffig minha.
Wa dafaʼat kulla maalha fi dakaatiir wa ma fi naadum gidir yidaawiiha.
44 Wa hi jaat wara Isa wa maddat iidha wa limsat taraf khalagah.
Wa ajala ke dammaha wigif.
45 Wa Isa gaal :
Yaatu al-limisni ?
Wa kulla l-naas nakaro.
Wa Butrus gaal :
Sayyidna,
fi naas katiiriin muhawwaginnak wa gaaʼidiin yiʼassuruuk.
46 Wa Isa gaal :
Naadum waahid limisni.
Naʼarif gudra maragat minni.
47 Wa khalaas al-mara irfat kadar hi ma tagdar tilabbid nafisha wa jaat le Isa wa gaaʼide tarjif min al-khoof.
Wa sajadat giddaamah wa be kalaam waadih oorat Isa giddaam kulla l-naas be sabab lammisiinha wa ooratah be kikkeef hi ligat al-aafe ajala.
48 Wa Isa gaal leeha :
Ya bineeyti,
iimaanki beyi najjaaki.
Amchi be l-salaam.
49 Wa wakit hu gaaʼid yihajji leeha,
naadum ja min beet hana l-masʼuul wa gaal :
Bineeytak maatat khalaas.
Khalli al-muʼallim yinjamma.
50 Wa laakin Isa simiʼ al-kalaam da wa hajja le l-masʼuul wa gaal :
Ma takhaaf.
Aamin beyi bas wa hi tanja.
51 Wa wakit Isa wisil fi beet al-masʼuul,
hu ma khalla ayyi naadum yadkhul maʼaayah daakhal illa Butrus wa Yuuhanna wa Yaakhuub wa abu al-bineeye wa ammaha.
52 Wa fi l-beet,
kulla l-naas gaaʼidiin yabku haznaaniin leeha.
Wa Isa gaal leehum :
Ma tabku.
Hi ma maatat.
Hi naayme bas.
53 Wa dihiko leyah be chammaata achaan irifo hi mayte.
54 Laakin hu karab iidha wa hajja leeha be hiss gawi wa gaal :
Gummi,
ya bineeyti.