Iimaan hana kabiir al-askar
7
Wa baʼad Isa gaal kulla l-kalaam da le l-naas,
hu macha fi hillit Kafar Naahuum.
2 Wa fi naadum ajnabi hinaak wa hu kabiir al-askar al-Roomaaniyiin,
Wa hu indah abid waahid mardaan gariib yumuut.
Wa kabiir al-askar yiriidah le abdah bilheen.
3 Wa wakit simiʼ khabar hana Isa,
hu rassal leyah naas min chuyuukh al-Yahuud achaan yatlubu minnah yaji yidaawi abdah.
4 Wa macho le Isa wa chahadooh bilheen.
Wa gaalo :
Al-ajnabi da,
hu naadum adiil bilheen lahaddi waajib tisawwi leyah al-cheyy al-talabah minnak.
5 Hu yihibb chaʼabna wa bana leena beet al-sala.
6 Wa Isa macha maʼaahum.
Wa wakit hu garrab le l-beet,
al-askari rassal leyah rufgaanah achaan yihajju leyah.
Wa gaalo :
Ya sayyidna,
anjamma.
Ma titaʼʼib nafsak.
Ana ma tammeet al-naadum al-inta tadkhul fi beetah.
7 Achaan da bas,
ana zaati khijilt wa ma macheet leek.
Wa laakin guul kalaamak bas wa khaddaami yalga al-aafe.
8 Naʼarif inta tagdar achaan ana kula indi kabiir gaadir minni al-jaʼalaani masʼuul.
Wa achaan da,
indi gudra foog al-askar al-tihti.
Wa kan nuguul le waahid «
Amchi »,
hu bamchi.
Wa kan nuguul le naadum aakhar «
Taʼaal »,
hu baji.
Wa kan nuguul le abdi «
Sawwi ke »,
hu bisawwiih.
9 Wa wakit Isa simiʼ kalaamah,
hu alʼajjab bilheen wa anlafat le l-naas al-jaayiin waraayah wa gaal :
Nuguul leeku ma ligiit naadum waahid min Bani Israaʼiil al-indah iimaan chadiid misil iimaan al-naadum da.
10 Wa khalaas wakit al-murassaliin gabbalo fi l-beet,
chaafo al-abid ligi al-aafe.
Al-Masiih gawwam sabi mayyit
11 Wa baʼadeen Isa macha le hille waahide usumha Naayin.
Wa talaamiizah maʼaayah wa naas katiiriin maachiin waraayah.
12 Wa wakit garrab le baab al-hille,
hu chaaf naadum mayyit wa l-naas maachiin yadfunuuh.
Wa l-mayyit hu wileed waahid fi ammah wa l-mara di raajilha mayyit.
Wa naas katiiriin min al-hille maachiin maʼaaha.
13 Wa wakit al-Rabb Isa chaafaaha,
galbah hanna leeha wa gaal :
Ma tabki.
14 Wa macha le l-mayyit wa limis al-barangaal wa l-naas al-chaaylinnah wigfo.
Wa Isa gaal :
Ya wileedi,
nuguul leek gumm.
15 Wa l-mayyit gamma wa hajja.
Wa Isa antaah le ammah.
16 Wa l-khoof dakhal le kulla l-naas wa humman majjado Allah wa gaalo :
Nabi kabiir ja fi usutna !
Allah bayyan gudurtah le chaʼabah !
17 Wa fi kulla daar al-Yahuudiiya wa fi kulla l-buldaan al-mujaawiriin,
al-naas simʼo khabar hana l-cheyy al-Isa sawwaah.
Suʼaal Yahya
18 Wa talaamiiz Yahya macho le sayyidhum wa oorooh be kulla cheyy al-Isa gaaʼid yisawwiih.
19 Wa Yahya naada talaamiiz itneen wa rassalaahum le l-Rabb Isa achaan yuguulu leyah :
Inta al-naadum al-yaji walla waajib narjo naadum aakhar battaan ?
20 Wa macho le Isa wa gaalo :
Yahya al-Mukhattis rassalaana achaan nasʼalook «
Inta al-naadum al-baji walla waajib narjo naadum aakhar battaan ? ».
21 Wa fi l-wakit da bas,
Isa daawa naas katiiriin min al-mardaaniin wa l-taʼbaaniin wa l-muchootiniin.
Wa fattah uyuun amyaaniin katiiriin.
22 Wa Isa radda leehum wa gaal :
Amchu wa ooru Yahya be kulla cheyy al-chiftuuh wa simiʼtuuh.
Al-amyaaniin gaaʼidiin bichiifu wa l-uruj buruukhu wa l-induhum baras balgo al-aafe wa l-tarchaaniin basmaʼo wa l-maytiin babʼaso wa l-masaakiin gaaʼidiin basmaʼo al-bichaara.
23 Wa mabruuk le l-naadum al-ma bichakkik foogi.
Kalaam al-Masiih fi Yahya
24 Wa wakit murassaliin Yahya maachiin,
Isa bada yihajji fi Yahya le l-naas al-gaaʼidiin maʼaayah.
Wa gaal :
Wakit Yahya gaaʼid fi l-kadaade,
intu maragtu leyah.
Wa dawwartu tichiifu chunu ?
Dawwartu tichiifu ageegaay bas al-riih tihizzaha walla ?
25 Kan ma ke,
dawwartu tichiifu chunu ?
Naadum laabis khulgaan samhiin walla ?
La.
Achaan al-naas al-laabsiin khulgaan samhiin wa l-aaychiin fi bakaan halu gaaʼidiin fi gusuur al-muluuk.
26 Zeen.
Maragtu achaan tichiifu chunu ?
Achaan tichiifu nabi ?
Aywa,
wa nuguul leeku chiftu naadum akbar min nabi.
27 Da bas hu al-be sababah al-Kitaab buguul <Asmaʼo,
nirassil mursaali giddaamak wa hu yiʼaddil leek al-derib>.
28 Wa nuguul leeku ma fi naadum mawluud min mara akbar min Yahya al-Mukhattis.
Wa laakin al-naadum al-sakhayyar fi mamlakat Allah akbar minnah.
29 Wa kulla l-naas simʼo kalaam Yahya wa maʼaahum naas al-jamaarik kula.
Wa taabo min zunuubhum wa khallo Yahya yikhattishum wa misil da,
akkado kadar fikir Allah adiil.
30 Wa laakin al-Fariisiyiin wa ulama al-Tawraat abo ma khallo Yahya yikhattishum.
Wa be misil da,
ma khiblo al-niiye al-Allah indah leehum.
31 Wa nuguul chunu fi l-naas hana al-wakit al-haali da ?
Bichaabuhu chunu ?
Humman misil iyaal dugaag laammiin fi l-door wa binaadu rufgaanhum wa buguulu
32 « Aniina saffagna leeku laakin intu ma liʼibtu.
Aniina khanneena khine hana l-moot laakin intu ma bakeetu ».
33 Achaan Yahya al-Mukhattis ja leeku wa hu ma baakul akil wa ma bachrab khamar wa gultu hu muchootin.
34 Wa baʼadeen ana,
Ibn al-Insaan,
jiit leeku wa ana naakul wa nachrab wa tuguulu «
Hu akkaal wa sakkaari wa bigi rafiig le naas al-jamaarik wa l-muznibiin ».
35 Laakin sabaat hana fikir Allah yinchaaf fi kulla iyaal Allah.
Al-muznibe wa l-Fariisi
36 Naadum waahid min al-Fariisiyiin azam Isa yaakul maʼaayah.
Wa Isa dakhal fi beet al-Fariisi wa antaka.
37 Wa fi mara waahide wa hi muznibe maʼruufa fi l-hille.
Wa wakit hi simʼat kadar Isa azamooh fi beet al-Fariisi,
hi gammat chaalat gazaaza hana itir wa machat.
38 Wa wigfat wara Isa jamb rijileenah.
Wa hi gaaʼide tabki wa badat tibill rijileenah be dumuuʼha wa tuguchchuhum be chaʼarha.
Wa gaaʼide tihibb rijileenah wa tamsah fooghum al-itir.
39 Wa l-Fariisi al-azamah fi beetah chaaf al-cheyy al-hi gaaʼide tisawwiih wa fi galbah gaal :
Kan sahiih al-naadum da nabi,
akiid hu yaʼarif al-mara al-gaaʼide tilammisah di yaati wa yaʼarif haalha al-cheene achaan hi muznibe.
40 Wa Isa radda leyah wa gaal :
Ya Simʼaan.
Nidoor nuguul leek kalaam waahid.
Wa l-Fariisi radda leyah wa gaal :
Naʼam,
ya muʼallim.
Tafaddal hajji.
41 Wa Isa gaal :
Yoom min al-ayyaam,
fi naadum waahid al-yidayyin al-naas wa indah deen foog naaseen.
Wa l-waahid deenah khumsumiya diinaar wa l-taani deenah khamsiin diinaar.
42 Ma gidro yikaffuuh leyah.
Wa khalaas hu saamahaahum marra waahid.
Wa nasʼalak yaatu min al-naaseen dool yihibbah be ziyaada ?
43 Wa Simʼaan radda leyah wa gaal :
Fi fikri ana,
nuguul al-naadum al-saamaho leyah al-deen al-katiir yihibbah be ziyaada.
Wa Isa gaal :
Fikrak sahiih.
44 Wa Isa anlafat le l-mara wa hajja le Simʼaan wa gaal :
Al-mara di chiftaha walla ?
Ana dakhalt fi beetak wa inta ma anteetni almi achaan nikhassil rijileeni laakin hi ballat rijileeni be dumuuʼha wa gachchathum be chaʼarha.
45 Wa inta ma sallamtini be hubb wa laakin min ana dakhalt fi beetak hi gaaʼide tihibb rijileeni.
46 Wa inta ma anteetni dihin achaan namsah beyah raasi laakin hi masahat itir fi rijileeni.
47 Wa nuguul leek da yiwassif kadar zunuubha al-katiiriin saamahoohum leeha.
Wa achaan da,
hi tihibb katiir.
Laakin al-naadum al-saamahooh leyah chiyya,
yihibb chiyya.
48 Wa Isa gaal leeha :
Akiid ana saamaht leeki zunuubki.
49 Wa l-naas al-gaaʼidiin baakulu maʼaayah gammo buguulu ambeenaathum :
Haay !
Da yaatu al-yisaamih al-muznibiin ?
50 Wa Isa hajja le l-mara battaan wa gaal :
Be sabab iimaanki nijiiti.
Amchi be l-salaam.