Masal al-harraati al-yiteerib
4
Wa battaan Isa gamma yiʼallim al-naas fi khachum al-bahar.
Wa naas katiiriin bilheen lammo foogah achaan yasmaʼo kalaamah.
Wa achaan da,
hu rikib fi markaba wa gaʼad tihit.
Wa l-markaba gaaʼide fi l-bahar wa kulla l-naas gaaʼidiin fi l-turaab fi khachum al-bahar.
2 Wa hajja leehum be amsaal wa allamaahum kalaam katiir.
Wa da masal waahid hu allamaahum beyah.
Hu gaal :
3 Asmaʼo.
Yoom min al-ayyaam,
harraati waahid marag wa macha le l-zereʼ achaan yiteerib.
4 Wa wakit hu gaaʼid yiteerib,
teeraab waahid wagaʼ fi l-derib al-yuchugg al-zereʼ wa l-teer jo akalooh.
5 Wa teeraab aakhar wagaʼ foog bakaan indah hujaar katiir wa turaab chiyya.
Wa l-bizre gammat ajala achaan al-turaab chiyya.
6 Wa wakit al-harraay bigat foog hi taggat al-bizre di wa l-bizre yibsat achaan ma indaha irig.
7 Wa teeraab aakhar wagaʼ fi ust al-chook wa l-chook gamma sawa maʼa l-bizre wa khanagaaha wa ma wildat.
8 Wa teeraab aakhar wagaʼ fi l-turaab al-adiil wa l-bizre gammat wa wildat.
Al-bizre gammat wa zaadat wa kulla ganduul indah talaatiin walla sittiin walla miya habba.
9 Wa khalaas gaal leehum :
Ayyi naadum al-indah adaan khalli yasmaʼ.
10 Wa wakit Isa wa jamaaʼtah gaaʼidiin wiheedhum,
al-talaamiiz al-atnaachar wa l-aakhariin al-maʼaayah saʼalooh fi amsaalah wa maʼanaathum.
11 Wa Isa gaal :
Induku izin taʼarfu sirr mamlakat Allah laakin le l-naas al-aakhariin nihajji leehum daayman be amsaal.
12 Wa be misil da,
akiid induhum uyuun wa laakin ma yichiifu.
Wa akiid yasmaʼo al-kalaam laakin ma yafhamooh.
Wa kan ma misil da,
yutuubu min zunuubhum wa Allah yakhfir leehum.
13 Wa Isa saʼalaahum le talaamiizah wa gaal :
Ma fihimtu masal al-harraati al-yiteerib walla ?
Kan ma fihimtuuh,
kikkeef tafhamo al-amsaal al-aakhariin ?
14 Fi l-masal da,
al-harraati al-yiteerib hu al-naadum al-yiballikh kalaam Allah.
15 Wa l-teeraab al-wagaʼ fi l-derib,
hu yimassil al-naas al-yasmaʼo kalaam Allah wa ajala ke Ibliis yaji yichiil min guluubhum al-kalaam al-ballakhooh leehum.
16 Wa battaan al-teeraab al-teerabooh fi bakaan hajar yimassil al-naas al-yasmaʼo kalaam Allah wa ajala ke yakhbalooh be farha
17 laakin humman misil bizre ma indaha irig.
Wa yagoodu saabtiin wakit chiyya bas.
Wa wakit taʼab yaji fooghum walla l-naas yakrahoohum be sabab tabiʼiinhum le kalaam Allah,
al-naas al-misil dool yamurgu min al-derib.
18 Wa naas aakhariin humman misil al-teeraab al-teerabooh fi ust al-chook.
Humman al-naas al-yasmaʼo kalaam Allah
19 wa laakin machaakil al-dunya wa reedithum le l-maal wa chahwaathum yaktulu al-kalaam al-fi guluubhum.
Wa achaan da,
kalaam Allah ma yijiib fooghum cheyy.
20 Wa l-teeraab al-teerabooh fi l-turaab al-adiil yimassil al-naas al-yasmaʼo kalaam Allah wa yakurbuuh adiil wa yalgo minnah iimaan gawi.
Wa humman misil habba waahide al-tugumm bizre wa taldaah ganduul indah talaatiin walla sittiin walla miya habba.
Masal al-deyy
21 Wa Isa gaal :
Kan naadum yijiib deyy fi beetah,
hu yidissah fi tihit doozam walla ?
Aw tihit sariir walla ?
La.
Hu yukhuttah fi bakaan foog.
22 Wa ma fi cheyy mulabbad al-ma yinchaaf baʼadeen wa ma fi sirr al-ma yabga maʼruuf.
23 Ayyi naadum al-indah adaan khalli yasmaʼ.
Masal al-bizre
24 Wa Isa hajja leehum battaan wa gaal :
Khuttu baalku wa asmaʼo adiil.
Kan tasmaʼo al-kalaam be niiyitku,
Allah yantiiku kalaamah be niiyitah wa yiziidah leeku.
25 Achaan al-naadum al-karab al-kalaam adiil,
Allah yantiih ziyaada wa l-naadum al-ma karab al-kalaam adiil,
Allah yichiil minnah al-kalaam al-hu simʼah kula.
26 Wa Isa gaal :
Mamlakat Allah tabga misil ke.
Naadum waahid chattat teeraab fi l-ard.
27 Wa kulli leel hu yargud wa kulli fajur hu yugumm wa l-teeraab yabzur wa yiziid wa l-naadum ma baʼarif kikkeef da yabga.
28 Wa l-ard wiheedha tanti.
Awwal al-gechch wa baʼad da,
al-ganduul.
Wa baʼad da,
al-hubuub al-kubaar fi l-ganduul.
29 Wa wakit al-khalla nijdat khalaas,
hu yimidd al-khanjar achaan wakit al-gatiʼ ja.
Masal al-khardal
30 Wa Isa gaal :
Nuguulu Mamlakat Allah tichaabih misil chunu ?
Wa nimassuluuha leeku kikkeef ?
31 Hi misil habba waahide min teeraab hana khardal.
Wa min kulla l-teeraab al-naas yiteerubuuh fi l-ard,
da bas al-sakhayyar minhum.
32 Laakin wakit yabzur,
hu yabga akbar nabaataat al-jineene wa yisawwi furuuʼ kubaar bilheen lahaddi al-tuyuur yabnu foogah uchuuchhum.
33 Wa Isa hajja le l-naas be amsaal katiir misil al-amsaal dool wa ballakh leehum kalaam Allah.
Wa hajja leehum be kalaam ma gaasi leehum.
34 Wa hu ma hajja leehum bala masal.
Laakin hu fassar le talaamiizah kulla cheyy wakit hu gaaʼid wiheedah maʼaahum.
Al-Masiih waggaf al-riih al-chadiide
35 Wa nafs al-yoom wakit bigi makharib,
Isa hajja le talaamiizah wa gaal :
Taʼaalu nagtaʼo al-bahar.
36 Wa gammo khallo al-naas wa rikbo fi l-markaba al-Isa gaaʼid foogha wa macho.
Wa fi maraakib aakhariin kula maʼaahum.
37 Wa ajala ke riih chadiide marra waahid saagat wa gawwamat challaal wa l-challaal gamma yihizz al-markaba wa l-markaba tidoor tinmali.
38 Wa Isa naayim wara fi l-markaba raagid fi wassaada.
Wa gawwamooh min al-noom wa gaalo :
Sayyidna,
ma lammaak kan numuutu walla ?
39 Wa hu gamma wa kachcha le l-riih wa amarah le l-almi wa gaal :
Khalaas.
Agood saakit.
Wa l-riih wigfat wa l-wata bigat haadiye marra waahid.
40 Wa hu hajja le talaamiizah wa gaal :
Maala intu khaayfiin ?
Lissaaʼ ma induku iimaan walla ?
41 Wa khaafo khoof chadiid bilheen wa hajjo ambeenaathum wa gaalo :
Da yaatu al-naadum da ?
Hu yaamur al-riih wa l-bahar wa yasmaʼo kalaamah!