Al-Masiih daawa naadum fi yoom al-sabit
3
Wa Isa andassa battaan fi beet al-sala.
Wa naadum waahid iidah mayte gaaʼid daakhal.
2 Wa naas waahidiin khatto baalhum fi Isa achaan yidooru yichiifu kan hu yidaawiih walla.
Fi fikirhum,
kan hu yidaawi naadum fi yoom al-sabit,
da yabga leehum fursa achaan yukhuttu foogah tuhma.
3 Wa Isa hajja le l-raajil al-iidah mayte wa gaal :
Gumm foog giddaam al-naas.
4 Wa Isa saʼalaahum wa gaal :
Chunu al-halaal fi yoom al-sabit ?
Al-kheer walla l-charr ?
Halaal leena ninajju al-naas walla naktuluuhum ?
Wa humman ma raddo leyah cheyy.
5 Wa hu allaffat wa chaaf guuwat ruuseenhum wa da bigi leyah gaasi bilheen wa ziʼil minhum.
Wa hajja le l-raajil wa gaal :
Midd iidak.
Wa l-raajil maddaaha wa khalaas iidah hiyat.
6 Wa ajala ke al-Fariisiyiin marago wa achchaawaro maʼa naas hana hizib Hiruudus fi chaan kikkeef yaktulu Isa.
Naas katiiriin macho le Isa
7 Wa Isa gamma maʼa talaamiizah wa macha fi khachum al-bahar.
Wa naas katiiriin bilheen min daar al-Jaliil taabaʼooh.
Wa fi naas min daar al-Yahuudiiya kula
8 wa min Madiinat al-Khudus wa balad Aduumiye wa l-buldaan al-khaadi le bahar al-Urdun wa min turaab hana Suur wa Seeda.
Wa l-naas dool jo leyah achaan simʼo khabar hana l-cheyy al-Isa gaaʼid yisawwiih.
Wa adad al-naas bigi katiir bilheen.
9 Wa Isa amaraahum le talaamiizah le yijahhuzu leyah markaba achaan yamrug min al-muʼaasara.
10 Wa Isa daawa naas mardaaniin katiiriin wa achaan da,
kulla l-naas al-mardaaniin gaaʼidiin yilʼaasaro wa yidooru yalhagooh wa yalmasooh.
11 Wa ayyi naadum al-indah cheetaan sajad giddaamah wakit chaaf Isa.
Wa kulla l-chawaatiin aato wa gaalo «
Inta bas Ibn Allah ».
12 Wa Isa amaraahum achaan ma yiʼooru al-naas hu yaatu.
Al-Masiih ikhtaar al-rusul al-atnaachar
13 Wa Isa rikib fi l-hajar wa naada al-naas al-hu yidoorhum wa humman macho leyah.
14 Wa ikhtaar minhum atnaachar rujaal achaan yiraafuguuh.
Wa hu jaʼalaahum rusul.
Dool al-naas al-hu rassalaahum le yiballukhu al-bichaara.
15 Wa antaahum gudra achaan yaturdu al-chawaatiin.
16 Wa l-atnaachar dool humman Simʼaan al-Isa sammaah Butrus
17 wa Yaakhuub wileed Zabadi wa Yuuhanna akhuuh le Yaakhuub wa Isa samma awlaad Zabadi dool Buwaan Arjis maʼanaatah awlaad al-dagdaag.
18 Wa ikhtaar Andareeyas wa Filibbus wa Bartulma wa Matta wa Tuuma wa Yaakhuub wileed Halfa wa Taddaaya wa Simʼaan al-Sawri
19 wa Yahuuza al-Iskhariyooti al-naadum al-khaan Isa.
Gaalo gudurtah min Ibliis
20 Wa Isa macha al-beet.
Wa battaan naas katiiriin bilheen macho leyah lahaddi Isa wa jamaaʼtah ma ligo faraga yaakulu kula.
21 Wa akhwaan Isa simʼo al-khabar da wa gammo le yakurbuuh.
Wa gaaʼidiin yuguulu «
Hu raasah laffa khalaas ».
22 Wa l-ulama al-jo min al-Khudus gaalo :
Akiid hu muchootin.
Ibliis karabah.
Hu gaaʼid yatrud al-chawaatiin be gudra hana kabiir al-chawaatiin.
23 Wa Isa naadaahum wa hajja leehum be amsaal wa gaal :
Kikkeef al-Cheetaan yatrud al-Cheetaan ?
24 Kan naas hana mamlaka biddaawaso ambeenaathum,
al-mamlaka di ma tagdar tagood saabte.
25 Wa kan naas hana beet waahid binfargu wa bidaawusu ambeenaathum,
al-beet ma yagood saabit.
26 Wa kan al-Cheetaan gamma yidaawis nafsah,
mamlakatah tinfarig wa hu ma yagdar yagood saabit wa khalaas mamlakatah tikammil ajala.
27 Wa be masal aakhar nifassir leeku kikkeef natrud al-chawaatiin.
Ma fi naadum al-yadkhul fi beet al-naadum al-gawi wa yasrig khumaamah illa kan awwal rabat al-raajil al-gawi.
Wa kan rabatah khalaas,
akiid yagdar yichiil kula khumaamah.
28 Wa nuguul leeku al-hagg :
Allah yisaamih le l-naas kulla zunuubhum wa kulla kalaam al-kufur al-buguuluuh
29 laakin kan ayyi naadum yihajji kalaam kufur fi l-Ruuh al-Khudduus,
al-zanib da abadan ma yinkhafir.
Hu bigi khaati be zanib al-yagood fi raasah ila l-abad.
30 Wa Isa gaal al-kalaam da achaan gaalo hu indah cheetaan.
Amm al-Masiih wa akhwaanah
31 Wa ammah le Isa wa akhwaanah macho leyah.
Wa wigfo barra min al-beet.
Wa rassalo naadum achaan yinaadiih.
32 Wa naas katiiriin gaaʼidiin maʼa Isa wa hu gaaʼid fi usuthum.
Wa gaalo leyah :
Ammak wa akhwaanak gaaʼidiin barra binaaduuk.