Al-Masiih khafar le l-mukarsah zunuubah
2
Wa baʼadeen Isa gabbal fi hillit Kafar Naahuum.
Wa l-naas simʼo kadar hu gaaʼid.
2 Wa naas katiiriin jo lammo foogah wa l-beet anmala lahaddi fi l-baab kula ma faddal bakaan le naadum.
Wa Isa gaaʼid yibachchirhum be kalaam Allah.
3 Wa arbaʼa rujaal jo leyah chaayliin naadum mukarsah.
4 Wa ma gidro yigarrubu le Isa be sabab al-naas al-katiiriin al-saddo leehum al-derib.
Wa achaan da,
rikbo fi raas al-beet wa gaddooh wa sawwo fatiikh foog le l-bakaan al-Isa gaaʼid foogah.
Wa khalaas dallo al-maʼduur be sariirah fi lubb al-beet.
5 Wa Isa chaaf iimaanhum wa hajja le l-maʼduur wa gaal :
Ya wileedi,
ana khafart leek zunuubak.
6 Wa fiyah ulama waahidiin fi lubb al-beet.
Wa fakkaro fi guluubhum gaalo :
7 Kikkeef yihajji kalaam ma adiil misil da ?
Da kalaam muchrik.
Ma fi insaan al-yakhfir le l-naas zunuubhum illa Allah.
8 Wa ajala ke Isa irif al-chakak al-fi guluubhum.
Wa hajja leehum wa gaal :
Maala tichakkuku fi guluubku misil da ?
9 Weenu al-hayyin nuguulah le l-maʼduur ?
Nuguul «
ana khafart leek zunuubak »
walla nuguul leyah «
gumm wa ruukh » ?
10 Wa laakin nidoor intu taʼarfu kadar ana,
Ibn al-Insaan,
indi gudra fi l-ard achaan nakhfir le l-naas zunuubhum.
12 Wa ajala ke al-maʼduur gamma foog wa chaal sariirah wa marag giddaamhum.
Wa kulla l-naas astakhrabo wa gammo yachkuru Allah.
Wa gaalo :
Abadan ma chifna cheyy misil da.
Al-Masiih naada Laawi
13 Wa Isa marag battaan wa macha fi khachum al-bahar.
Wa naas katiiriin jo leyah wa hu allamaahum.
14 Wa fi ruwaakhitah,
hu chaaf naadum usmah Laawi wileed Halfa al-gaaʼid yakhdim fi maktab al-jamaarik.
Wa Isa gaal leyah :
Taʼaal taabiʼni.
Wa khalaas Laawi gamma foog wa taabaʼah.
15 Wa Isa achcha fi beet hana Laawi.
Wa fi naas hana jamaarik katiiriin wa muznibiin aakhariin gaaʼidiin yaakulu maʼa Isa wa talaamiizah achaan naas katiiriin minhum gaaʼidiin yitaabuʼuuh.
16 Wa ulama waahidiin min al-Fariisiyiin chaafo Isa yaakul maʼa l-muznibiin wa naas al-jamaarik.
Wa hajjo le talaamiizah wa gaalo :
Maala hu gaaʼid yaakul maʼa naas al-jamaarik wa l-muznibiin ?
17 Wa Isa simiʼ kalaamhum wa gaal :
Al-naas al-tayyibiin ma hawjaaniin daktoor,
illa l-mardaaniin bas al-hawjaaniin.
Wa ana ma jiit achaan ninaadi al-saalihiin le l-tooba laakin jiit achaan ninaadi al-muznibiin.
Al-Masiih saʼalooh fi l-siyaam
18 Wa fi l-wakit da,
talaamiiz Yahya wa l-Fariisiyiin saaymiin.
Wa fi naas waahidiin macho le Isa saʼalooh wa gaalo :
Talaamiiz Yahya wa talaamiiz al-Fariisiyiin busuumu.
Wa maala talaamiizak ma busuumu ?
19 Wa Isa radda leehum wa gaal :
Kan naas gaaʼidiin fi iris wa l-ariis maʼaahum,
humman yusuumu walla ?
Abadan.
Akiid humman ma yusuumu kan al-ariis lissaaʼ gaaʼid maʼaahum.
20 Wa laakin yoom waahid baji al-ariis bichiiluuh minhum wa fi l-wakit daak busuumu.
21 Ma fi naadum al-yargaʼ gitʼe jadiide fi khalag gadiim.
Kan naadum yisawwi misil da,
al-rugʼa al-jadiide ticharrit al-khalag al-gadiim wa l-gadd yabga ziyaada min awwal.
22 Wa ma fi naadum yusubb khamar jadiid fi girbe gadiime.
Wa kan yisawwi misil da,
al-khamar al-jadiid yuchugg al-girbe wa l-khamar bidaffig wa l-girbe tatlaf.
Wa laakin al-khamar al-jadiid yusubbuuh illa fi girbe jadiide.
Al-Masiih saʼalooh fi churuut yoom al-sabit
23 Wa yoom waahid,
Isa raayikh fi ust al-ziraaʼa maʼa talaamiizah.
Wa da yoom al-sabit wa talaamiizah gaaʼidiin yagtaʼo min ganaadiil al-gameh.
24 Wa l-Fariisiyiin chaafoohum wa hajjo leyah wa gaalo :
Maala humman gaaʼidiin yisawwu al-khidme al-ma halaal fi yoom al-sabit ?
25 Wa Isa radda leehum wa gaal :
Ma gareetu al-Kitaab walla ?
Nisiitu al-cheyy al-Dawuud sawwaah wakit hu wa jamaaʼtah jiiʼaaniin wa hawjaaniin walla ?
26 Wa Dawuud andassa fi beet Allah wakit Abiyaatar kabiir rujaal al-diin wa akal al-khubza al-antooha al-naas le Allah.
Wa da ma halaal le ayyi naadum illa rujaal al-diin.
Wa Dawuud anta minha le jamaaʼtah kula wa humman akalo.