Injiil al-Masiih
Al-juzu al-Markhus katabah
Khidmit al-nabi Yahya
1
Diihi bichaarat Isa al-Masiih Ibn Allah.
Wa l-bichaara badat
2 misil al-kalaam al-Allah gaalah al-maktuub fi kitaab al-nabi Ichaʼya.
Hu gaal <Asmaʼo.
Nirassil mursaali giddaamak wa hu yiʼaddil leek al-derib.
3 Wa hiss hana naadum gaaʼid binaadi fi l-khala wa buguul jahhuzu derib al-Rabb wa addulu leyah al-chawaariʼ>.
4 Wa khalaas al-nabi Yahya al-Mukhattis hu bas al-naadum al-gamma fi l-khala wa bada yinaadi al-naas achaan yutuubu min zunuubhum wa hu yikhattishum* fi l-almi leechaan Allah yakhfir leehum zunuubhum.
5 Wa naas katiiriin bilheen min Daar al-Yahuudiiya wa Madiinat al-Khudus marago wa macho le Yahya fi l-khala.
Wa iʼtarafo be zunuubhum wa Yahya khattasaahum fi bahar al-Urdun.
6 Wa Yahya laabis khalag min suuf al-albil wa raabit sulbah be farwa wa yaakul jaraad wa asal al-nahal.
7 Wa hu gaaʼid yibachchir al-naas wa buguul :
Naadum waahid jaayi waraayi wa hu gaadir minni bilheen wa ana ma tammeet leyah khaddaam kula.
8 Wa ana khattastuku fi l-almi wa laakin hu yikhattisku be l-Ruuh al-Khudduus.
Al-Masiih khattasooh wa Ibliis jarrabah
9 Wa fi l-wakit da,
Isa gamma min hillit al-Naasira al-fi daar al-Jaliil wa macha le Yahya.
Wa Yahya khattasah fi bahar al-Urdun.
10 Wa ajala ke wakit Isa gamma min al-almi,
hu chaaf al-samaawaat anfataho wa l-Ruuh al-Khudduus naazil foogah min al-sama misil hamaama.
11 Wa hiss min al-sama ansamaʼ wa gaal :
Inta bas Ibni.
Ana nihibbak wa ana farhaan beek bilheen.
12 Wa ajala ke al-Ruuh al-Khudduus gaadah le Isa wa waddaah fi lubb al-khala.
13 Wa gaʼad fi l-khala arbaʼiin yoom wa Ibliis jarrabah.
Wa fi l-wakit da,
Isa gaaʼid fi l-bakaan al-haywaanaat gaaʼidiin foogah wa l-malaaʼika gaaʼidiin yisaaʼuduuh.
Al-Masiih naada talaamiizah al-awwalaaniyiin
14 Wa karabo Yahya fi l-sijin.
Wa Isa macha fi daar al-Jaliil wa ballakh le l-naas bichaarat Allah.
15 Wa gamma yuguul :
Al-wakit tamma wa mamlakat Allah garrabat.
Tuubu min zunuubku wa aamunu be l-bichaara.
16 Wa wakit Isa raayikh fi khachum hana bahar al-Jaliil,
hu chaaf naadum usmah Simʼaan maʼa akhuuh usmah Andareeyas.
Wa humman hawwaatiin wa gaaʼidiin yazgulu charakhum fi l-bahar achaan yakurbu huut.
17 Wa Isa gaal leehum :
Taʼaalu taabuʼuuni.
Awwal intu gaaʼidiin tikarrubu huut wa min al-yoom ana nisawwiiku tikarrubu al-naas le derib Allah.
18 Wa ajala ke khallo charakhum wa gammo taabaʼooh.
19 Wa Isa macha giddaam chiyya wa chaaf Yaakhuub maʼa akhuuh Yuuhanna awlaad Zabadi.
Wa humman gaaʼidiin yiʼaddulu charakhum fi markabathum.
20 Wa ajala ke Isa naadaahum.
Wa humman gammo khallo abuuhum Zabadi fi l-markaba maʼa khaddaamiinah wa taabaʼo Isa.
Al-Masiih tarad cheetaan min naadum
21 Wa Isa wa talaamiizah macho fi hillit Kafar Naahuum.
Wa fi yoom al-sabit hu dakhal fi beet al-sala wa gamma yiʼallim al-naas.
22 Wa l-naas ajjabo bilheen min taʼaaliimah achaan allamaahum be kalaam indah gudra wa ma misil kalaam al-ulama.
23 Wa ajala ke,
naadum muchootin gamma fi beet al-sala.
Wa indah cheetaan cheen.
Wa hu aat
24 wa gaal :
Ya Isa al-min al-Naasira !
Tidoor minnina chunu ?
Jiit hini achaan tahlikna walla ?
Ana naʼarfak.
Inta bas al-khudduus al-Allah rassalah.
25 Wa Isa kachcha leyah wa gaal :
Askut wa amrug minnah.
26 Wa l-cheetaan rama al-naadum wa hu gamma yifatfit wa aat be hiss haarr wa khalaas al-cheetaan marag minnah.
27 Wa kulla l-naas astakhrabo minnah bilheen wa assaaʼalo ambeenaathum wa gaalo :
Haay !
Da chunu ?
Indah taʼliim jadiid wa gudra lahaddi baamur al-chawaatiin wa basmaʼo kalaamah.
28 Wa ajala ke khabarah chatta fi kulla hillaal hana Daar al-Jaliil kulla ke.
Al-Masiih daawa naas katiiriin
29 Wa ajala ke,
Isa wa talaamiizah marago min beet al-sala wa andasso fi beet hana Simʼaan wa Andareeyas.
Wa Yaakhuub wa Yuuhanna kula maʼaahum.
30 Wa nasiibtah le Simʼaan raagde hinaak maaruuda bilheen.
Wa ajala ke ooro Isa beeha.
31 Wa Isa macha leeha wa karab iidha wa gawwamaaha foog.
Wa l-wirde tawwaali khallatha wa hi dayyafathum.
32 Wa l-wata bigat makharib wa l-harraay wagaʼat khalaas.
Wa jaabo le Isa ayyi naadum al-mardaan walla muchootin.
33 Wa naas al-hille kulluhum lammo fi khachum al-beet.
34 Wa hu daawa naas katiiriin al-mardaaniin be amraad chig chig wa tarad chawaatiin katiiriin.
Wa hu amaraahum le l-chawaatiin ma yihajju achaan humman irifooh.
Ruwaakhit al-Masiih fi daar al-Jaliil
35 Wa be fajur badri gubbaal al-harraay ma tamrug,
Isa gamma wa marag fi bakaan ma indah naas.
Wa hu salla hinaak.
36 Wa Simʼaan wa l-naas al-maʼaayah fattachooh.
37 Wa ligooh wa hajjo leyah wa gaalo :
Kulla l-naas gaaʼidiin binaaduuk.
38 Wa hu radda leehum wa gaal :
Taʼaalu namchu fi l-hillaal al-aakhariin achaan niballikh leehum kalaam Allah.
Achaan da bas ana jiit.
39 Wa gamma raakh fi kulla daar al-Jaliil wa gaaʼid yibachchir al-naas fi buyuut al-sala wa yatrud al-chawaatiin.
Al-Masiih daawa naadum indah al-baras
40 Wa naadum indah baras ja le Isa wa sajad giddaamah.
Wa chahadah wa gaal :
Kan tidoor tidaawiini,
akiid inta tagdar wa nabga taahir.
41 Wa Isa hanna foogah wa madda iidah wa limis al-indah baras.
Wa gaal :
Nidoor nidaawiik.
Abga taahir.
42 Wa ajala ke jildah biri min al-baras wa hu bigi taahir.
43 Wa Isa rassalah wa amarah be kalaam gawi
44 wa gaal leyah :
Asmaʼ.
Ma tiʼoori naadum be l-cheyy al-bigi foogak.
Amchi wassif nafsak le raajil al-diin gabul.
Wa gaddim dahiiye le Allah misil al-nabi Muusa amaraana beeha wa misil da,
al-naas yaʼarfu kadar inta ligiit al-aafe wa bigiit taahir.
45 Laakin al-naadum da macha wa bada yihajji beyah le kulla l-naas wa chattat al-khabar.
Wa achaan da,
Isa ma gidir yadkhul fi ayyi hille kan al-naas yaʼarfu hu jaayi.
Wa hu gaʼad fi l-kadaade wa naas katiiriin min kulla bakaan macho leyah.