Al-naadum al-indah chawaatiin katiiriin
5
Wa khalaas gataʼo al-bahar wa wislo fi daar al-Jaraasiyiin.
2 Wa Isa dalla min al-markaba wa ajala ke naadum waahid laagaah.
Hu ja leyah min bakaan al-khubuur wa hu muchootin.
3 Wa hu saakin fi l-khubuur wa ma fi naadum al-yagdar yarbutah battaan.
Kan be jinziir kula ma yinrabit.
4 Katiir ke rabato iideenah wa rijileenah be guyuud min hadiid wa janzarooh laakin al-janaaziir hu gattaʼaahum be gu wa l-guyuud hu daayman kassaraahum marra waahid.
Wa ma fi insaan al-yagdar yisabbitah.
5 Leel wa nahaar hu gaaʼid daayman yiʼiit fi ust al-khubuur wa fi l-jibaal wa yajrah nafsah be hujaar.
6 Wa min baʼiid hu chaaf Isa wa jara leyah wa sajad giddaamah.
7 Wa be hiss chadiid aat wa gaal :
Ya Isa Ibn Allah al-Aali.
Tidoor minni chunu ?
Nachhadak be usum Allah ma tiʼazzibni.
8 Wa gaal al-kalaam da achaan Isa awwal gaal leyah «
Ya cheetaan,
amrug minnah ».
9 Wa Isa saʼalah wa gaal :
Usmak yaatu ?
Wa l-muchootin radda leyah wa gaal :
Ana usmi Deech achaan aniina chawaatiin katiiriin.
10 Wa l-chawaatiin chahadooh le Isa be chidde achaan ma yatrudhum fi bakaan baʼiid.
11 Wa fi l-bakaan da,
fi khanaaziir katiiriin gaaʼidiin basraho fi taraf al-hajar.
Wa l-chawaatiin chahadooh le Isa wa gaalo :
12 Rassilna fi l-khanaaziir dool wa khalliina nindasso fooghum.
13 Wa Isa antaahum izin.
Wa khalaas al-chawaatiin marago min al-naadum wa dakhalo fi l-khanaaziir.
Wa adad al-khanaaziir gariib alfeen.
Wa kulluhum jaro min al-juruf wa wagaʼo fi l-bahar wa khalaas al-almi akalaahum.
14 Wa ruʼyaanhum arrado wa macho ooro beyah kulla l-naas al-fi l-hille wa fi l-ziraaʼa.
Wa kulla l-naas gammo marago min al-hille achaan yichiifu al-cheyy al-bigi.
15 Wa jo le Isa wa chaafo al-muchootin aglah aafe.
Hu gaaʼid saakit bas wa laabis khulgaan.
Wa irifo da bas al-naadum al-awwal deech al-chawaatiin gaaʼidiin foogah.
Wa khaafo bilheen.
16 Wa fi l-bakaan da,
al-naas al-chaafo al-cheyy al-Isa sawwaah ooro al-naas al-aakhariin be l-cheyy al-bigi le l-muchootin wa l-khanaaziir.
17 Wa humman gammo chahadooh le Isa yamchi min daarhum.
18 Wa wakit Isa yidoor yarkab fi l-markaba,
al-naadum al-awwal muchootin chahadah le Isa achaan yamchi maʼaayah.
19 Laakin Isa aba.
Wa gaal leyah :
Gabbil fi beetak wa le naasak ooriihum be kulla cheyy al-Allah sawwaah leek wa be kikkeef hu rahamaak.
20 Wa l-naadum macha wa bada yiballikh khabarah le naas al-Mudun al-Achara wa ooraahum be kulla cheyy al-Isa sawwaah leyah.
Wa kulla l-naas ajjabo minnah bilheen.
Al-bineeye al-maatat wa l-mara al-taʼbaane
21 Wa Isa rikib fi l-markaba battaan wa gataʼ al-bahar wa gabbal fi l-bakaan al-awwal gaaʼid foogah.
Wa naas katiiriin lammo foogah.
Wa hu gaaʼid fi khachum al-bahar.
22 Wa fi l-bakaan da,
naadum waahid ja leyah wa hu cheekh waahid min masaaʼiil hana beet al-sala wa usmah Jaayrus.
Wa wakit chaaf Isa,
hu sajad giddaamah.
23 Wa chahad Isa bilheen wa gaal :
Bineeyti sakhayre bas gariib tumuut.
Taʼaal khutt iideenak foogha wa hi talga al-aafe wa ma tumuut.
24 Wa Isa gamma macha maʼaayah.
Wa naas katiiriin bilheen maachiin waraayah wa gaaʼidiin yiʼassuruuh fi l-derib.
25 Wa fi mara waahide fi ust al-naas.
Wa indaha atnaachar sana dammaha bidaffig.
26 Wa hi awwal machat le dakaatiir katiiriin wa tiʼibat katiir min khidmithum.
Wa hi dafaʼat leehum kulla maalha wa laakin ma ligat al-aafe.
Wa bigi leeha gaasi min awwal.
27 Wa hi simʼat khabar hana Isa.
Wa hi machat le Isa fi ust al-naas wa garrabat leyah min waraayah wa maddat iidha wa limsat khalagah.
28 Wa gaalat fi galibha «
kan nalmas khulgaanah bas nalga al-aafe ».
29 Wa ajala ke dammaha wigif.
Wa irifat fi nafisha hi ligat al-aafe.
30 Wa Isa irif fi nafsah gudra maragat minnah.
Wa ajala ke allaffat fi ust al-naas al-katiiriin al-maachiin maʼaayah wa saʼalaahum wa gaal :
Yaatu al-limis khalagi ?
31 Wa talaamiizah gaalo :
Sayyidna,
fi naas katiiriin muhaawiginnak wa yiʼassuruuk.
Maala tasʼalna yaatu al-limisaak ?
32 Wa Isa gaaʼid yillaffat achaan yichiif al-naadum al-limisah.
33 Wa l-mara irifat al-cheyy al-bigi foogha wa gaaʼide tarjif min al-khoof.
Wa jaat le Isa wa sajadat giddaamah wa ooratah be kulla cheyy al-bigi leeha.
34 Wa Isa hajja leeha wa gaal :
Ya bineeyti,
iimaanki beyi najjaaki.
Amchi be l-salaam wa agoodi be l-aafiya.
35 Wa wakit Isa gaaʼid yihajji leeha,
fi naas waahidiin jo min beet al-cheekh al-bineeytah mardaane wa gaalo :
Bineeytak maatat khalaas.
Khalli al-muʼallim yinjamma.
36 Wa Isa aba ma yasmaʼ kalaamhum wa hajja le l-cheekh wa gaal :
Ma takhaaf.
Aamin beyi bas.
37 Wa hu ma khalla ayyi naadum yamchi maʼaayah illa Butrus wa Yaakhuub wa Yuuhanna akhuuh le Yaakhuub.
38 Wa wislo fi beet al-cheekh wa Isa chaaf al-naas gaaʼidiin bisawwu haraka katiire.
Wa humman gaaʼidiin yabku be hiss aali haznaaniin le l-bineeye al-maatat.
39 Wa hu dakhal fi l-beet wa hajja leehum wa gaal :
Maala tabku be hiss foog misil da ?
Al-bineeye ma maatat.
Hi naayme bas.
40 Wa dihiko leyah be chamaata wa hu maragaahum kulluhum min al-beet.
Wa gamma maʼa abu al-bineeye wa ammaha wa l-naas al-maʼaayah wa dakhal fi lubb al-beet fi l-bakaan al-bineeye raagde foogah.
41 Wa karab iidha wa hajja leeha be kalaam ibraani al-daariji wa gaal «
Talisa kuumi ».
Wa maʼanaatah «
Ya bineeyti nuguul leeki gummi ».