Buʼaas al-Masiih
28
Awwal yoom al-usbuuʼ yaʼni wakit yoom al-sabit kammal khalaas,
Mariyam al-Majdaliiye wa Mariyam al-aakhara lamman gubbaal al-harraay ma tamrug wa machan achaan yichiifan keef al-khabur.
2 Wa waahid min malaaʼikat Allah nazal min al-sama wa l-ard anhazzat bigi zilzaal chadiid.
Wa ja le l-khabur wa dardag al-hajar min khachum al-khabur wa gaʼad foogah.
3 Wa l-malak yichaabih misil barraaga wa khalagah abyad karr.
4 Wa wakit al-askar al-gaaʼidiin yaharsu al-khabur chaafooh,
khoof chadiid karabaahum wa wagaʼo misil al-maytiin.
5 Wa l-malak kallam le l-awiin wa gaal :
Ma takhaafan.
Ana naʼarif intan tifattichan Isa al-katalooh fi l-saliib.
6 Hu hini ma fi.
Hu baʼas khalaas.
Da bigi misil hu awwal gaal leeku.
Taʼaalan,
chiifan al-bakaan al-yaabis al-hu awwal raagid foogah.
7 Wa yalla ajala amchan.
Guulan le talaamiizah «
Hu baʼas min al-maytiin wa yamchi giddaamku fi daar al-Jaliil wa hinaak tichiifuuh ».
Da ana ooreetkan.
8 Wa l-awiin khaayfaat marra waahid wa laakin farhaanaat bilheen wa jaran min al-khabur le l-talaamiiz achaan yiballikhan leehum al-bichaara.
9 Wakit maachaat achaan yikhabbiran al-talaamiiz,
Isa zaatah laagaahin wa gaal leehin :
Al-salaam aleekum.
Al-awiin garraban leyah wa karaban rijileenah wa sajadan leyah.
10 Wa Isa gaal leehin :
Ma takhaafan.
Amchan guulan le akhwaani waajib yamchu fi daar al-Jaliil achaan hinaak yichiifuuni.
Kidib al-kubaaraat wa l-askar
11 Wakit al-awiin maachaat fi l-derib,
waahidiin min al-askar macho fi l-madiina wa lammo maʼa kubaaraat rujaal al-diin wa ooroohum be kulla cheyy al-bigi.
12 Wa kubaaraat rujaal al-diin wa l-chuyuukh lammo wa achchaawaro ambeenaathum fi l-kalaam da.
Wa anto maal katiir le l-askar dool
13 wa gaalo leehum :
Laazim tuguulu «
Talaamiiz Isa jo fi l-leel wa sirgo janaaztah wakit aniina naaymiin ».
14 Wa kan al-waali simiʼ be l-kalaam da aniina nihaamu leeku wa ma talgo ayyi muchkila.
15 Wa l-askar chaalo al-maal wa sawwo misil al-kubaaraat gaalo leehum.
Wa min al-wakit daak lahaddi al-yoom,
katiiriin min al-Yahuud simʼo kalaamhum da.
Al-Masiih rassal talaamiizah
16 Wa l-talaamiiz al-ihdaachar macho fi daar al-Jaliil fi l-hajar al-Isa wassafah leehum.
17 Wa wakit chaafo Isa,
sajado leyah laakin waahidiin chakkako.
18 Wa Isa ja wa hajja leehum wa gaal :
Allah antaani kulla l-sulta fi l-sama wa fi l-ard.
19 Achaan da,
amchu naadu naas hana kulla l-umam achaan yabgo talaamiizi wa khattusuuhum fi almi be usum Allah Abuuna wa Ibnah al-Masiih wa l-Ruuh al-Khudduus.
20 Allumuuhum achaan yisawwu kulla cheyy al-ana ooreetku beyah.
Wa khalaas ana gaaʼid maʼaaku kulla yoom lahaddi kumaalit al-dunya.