Al-kubaaraat achchaawaro foog al-Masiih
26
Wakit Isa kammal kalaamah da,
hu gaal le talaamiizah :
2 Taʼarfu baʼad yoomeen Iid al-Fisha baji wa yisallumu Ibn al-Insaan le l-kubaaraat achaan yaktuluuh fi l-saliib.
3 Wa fi l-wakit da,
kubaaraat rujaal al-diin wa l-chuyuukh lammo fi beet Gayaafa wa hu kabiir rujaal al-diin.
4 Wa rakano kikkeef yakurbu Isa be l-achiir wa yaktuluuh.
5 Wa gaalo ambeenaathum :
Ma nakurbuuh fi ayyaam al-iid achaan akuun fitna tabga ambeenaat al-naas.
Al-mara al-sabbat itir fi raas al-Masiih
6 Isa gaaʼid fi hille usumha Beet Anya fi beet Simʼaan al-Mubarris.
7 Wa mara waahide jaat leyah wa jaabat gazaaza hana itir khaali bilheen wa sabbatah kulla ke fi raas Isa wakit hu gaaʼid yinjamma.
8 Wa wakit al-talaamiiz chaafo al-cheyy al-hi gaaʼide tisawwiih,
ziʼilo wa gaalo :
Maala tallafat al-maal misil da ?
9 Kan biʼna al-itir da,
nalgo gurus katiir achaan nantuuh le l-masaakiin.
10 Wa Isa irif kalaamhum wa gaal leehum :
Maala tibachtunu al-mara di ?
Hi sawwat leyi cheyy sameh.
11 Al-masaakiin gaaʼidiin maʼaaku daayman wa laakin ana kamaan ma nagood maʼaaku daayman.
12 Hi sabbat al-itir fi jildi wa misil ke jahhazatni le l-khabur.
13 Nuguul leeku al-hagg,
fi ayyi bakaan fi l-dunya al-yiballukhu foogah al-bichaara,
yihajju fi l-cheyy al-hi sawwatah wa yizakkuruuha.
Khiyaanat Yahuuza le l-Masiih
14 Wa fi l-bakaan da,
waahid min al-talaamiiz al-atnaachar usmah Yahuuza al-Iskhariyooti macha le kubaaraat rujaal al-diin.
15 Wa gaal leehum :
Tantuuni kam achaan nisallim leeku Isa ?
Wa hasabo leyah talaatiin riyaal fudda.
16 Wa min al-wakit daak,
Yahuuza gaaʼid yifattich fursa achaan yisallim leehum Isa.
Al-acha
17 Wa awwal yoom min ayyaam Iid al-Khubza bala Tawwaara,
talaamiiz Isa jo leyah wa gaalo :
Tidoor aniina namchu ween achaan nihassulu leek acha hana l-Fisha ?
18 Wa radda leehum wa gaal :
Adkhulu fi l-madiina wa amchu fi beet fiilaan wa guulu leyah «
Al-muʼallim yuguul leek wakti garrab khalaas wa naakul al-acha maʼa talaamiizi fi beetak ».
19 Wa l-talaamiiz sawwo kulla cheyy misil hu gaalah leehum wa hassalo acha hana Iid al-Fisha.
20 Wa fi makharib,
Isa gaaʼid yinjamma maʼa l-atnaachar.
21 Wa wakit gaaʼidiin yaakulu,
hu gaal :
Nuguul leeku al-hagg,
naadum waahid minku yukhuunni.
22 Wa hizno bilheen wa ayyi naadum minhum saʼalah wa gaal :
Ya sayyidna,
ana walla ?
23 Wa radda leehum wa gaal :
Al-naadum al-yidiss iidah maʼaayi fi l-maaʼuun,
hu bas al-yukhuunni.
24 Laabudda Ibn al-Insaan yumuut misil maktuub leyah fi l-Kitaab wa laakin al-azaab yarja al-raajil al-yukhuun Ibn al-Insaan.
Akheer le l-raajil da kan ma wildooh.
25 Wa Yahuuza al-khaanah saʼalah wa gaal :
Ya muʼallim,
ana walla ?
Wa Isa radda leyah :
Inta bas gultah.
26 Wa wakit gaaʼidiin yilʼachcho,
Isa chaal khubza waahide wa chakar Allah wa kasarha wa antaaha le talaamiizah wa gaal :
Chiiluuh wa aakuluuh.
Da jismi.
27 Wa chaal kaas wa chakar Allah wa antaah leehum wa gaal :
Acharbo minnah kulli waahid minku.
28 Al-fi l-kaas da yiwassif dammi al-hu hana l-muʼaahada al-jadiide.
Wa dammi yidaffig fi chaan naas katiiriin achaan Allah yakhfir leehum zunuubhum.
29 Wa nuguul leeku,
min al-yoom ma nachrab battaan min asiir al-inab lahaddi al-yoom al-nacharbah min jadiid maʼaaku fi mamlakat abuui.
30 Wa madaho be l-Zabuur wa marago min al-madiina wa macho fi Jabal al-Zaytuun.
Al-Masiih gaal Butrus yankurah
31 Wa Isa gaal leehum :
Al-leele di kulluku takhaafo wa tikhalluuni achaan maktuub fi l-Kitaab <Nadrub al-raaʼi wa l-khanam yichattutu>.
32 Wa laakin baʼad ana baʼast,
namchi giddaamku fi daar al-Jaliil.
33 Wa Butrus radda leyah wa gaal :
Kan kulla l-aakhariin yikhalluuk kula,
ana ma nikhalliik.
34 Isa radda leyah wa gaal :
Nuguul leek al-hagg,
al-leele di gubbaal al-diik ma yiʼooʼi,
inta tankurni talaata marraat.
35 Wa Butrus gaal :
Ana kan numuut maʼaak kula,
abadan ma nankurak.
Wa kulla l-talaamiiz gaalo nafs al-cheyy.
Duʼa al-Masiih fi Jassi Maani
36 Wa khalaas Isa wa talaamiizah macho fi bakaan usmah Jassi Maani wa gaal leehum :
Agoodu hini wa ana namchi giddaam achaan nisalli.
37 Wa chaal maʼaayah Butrus wa awlaad Zabadi al-itneen wa bigi haznaan wa bada yatʼab bilheen.
38 Wa gaal leehum :
Galbi bigi haznaan marra waahid lahaddi nidoor al-moot.
Agoodu hini waaʼiyiin maʼaayi.
39 Wa macha giddaam minhum chiyya wa sajad fi l-ard wa saʼal Allah wa gaal :
Ya Abuui,
khalli kaas al-taʼab da yufuut minni baʼiid kan da mumkin.
Wa laakin khalli yabga misil inta tidoorah wa ma misil ana nidoorah.
40 Wa gabbal le l-talaamiiz wa ligiihum naaymiin wa gaal le Butrus :
Saaʼa waahide kula ma gidirtu tagoodu maʼaayi waaʼiyiin ?
41 Agoodu waaʼiyiin wa asʼalo Allah achaan al-taʼab ma yijarrib iimaanku wa yitallifah.
Achaan al-insaan indah niiye laakin ma indah gudra.
42 Wa marra taaniye macha saʼal Allah wa gaal :
Ya abuui,
kan ma mumkin kaas al-taʼab yufuut minni illa nacharbah,
khalaas khalli yabga misil inta tidoorah.
43 Wa gabbal le l-talaamiiz wa battaan ligiihum naaymiin achaan al-noom chaalaahum.
44 Wa khallaahum wa macha saʼal Allah taalit marra wa gaal nafs al-cheyy misil gibeel.
45 Wa baʼadeen gabbal le talaamiizah wa gaal :
Intu naaymiin walla ?
Tidooru tinjammo walla ?
Khalaas al-wakit tamma.
Ibn al-Insaan khaanooh khalaas wa yisallumuuh le l-muznibiin !
46 Gummu namchu.
Chiifu,
al-yukhuunni jaayi.
Al-Masiih karabooh
47 Wa Isa lissaaʼ ma kammal al-kalaam da wa Yahuuza ja.
Hu waahid min al-talaamiiz al-atnaachar wa jaab maʼaayah naas katiiriin induhum suyuuf wa isaay.
Kubaaraat rujaal al-diin wa l-chuyuukh rassaloohum.
48 Wa l-khaayin antaahum alaama min awwal wa gaal :
Al-naadum al-nihibbah,
da bas hu.
Akurbuuh.
49 Wa ajala ke macha le Isa wa gaal :
Ya sayyidna,
al-salaam aleek.
Wa jo karabo Isa.
51 Wa waahid min al-naas al-gaaʼidiin maʼa Isa madda iidah wa salla seefah wa darab abid hana kabiir rujaal al-diin wa gataʼ adaanah.
52 Wa Isa gaal leyah :
Dakhkhil seefak fi beetah achaan ayyi naadum al-yisill al-seef yumuut be l-seef.
53 Wa fikirku chunu ?
Ma nagdar nasʼal musaaʼada min abuui achaan yirassil leyi uluuf min al-malaaʼika wa yidaawusu leyi walla ?
54 Wa laakin kan sawweet ke,
kikkeef al-kalaam al-maktuub fi l-Kitaab yabga ?
Al-Kitaab buguul al-cheyy al-gaaʼid yabga hini laabudda yabga.
55 Wa Isa hajja le l-naas wa gaal :
Kikkeef ?
Intu jiitu takurbuuni be seef wa asa da.
Ana mujrim walla ?
Kulli yoom ana gaaʼid fi hooch Beet Allah wa gaaʼid niʼallim al-naas wa intu ma karabtuuni.
56 Wa laakin bigi misil da achaan kulla cheyy al-anbiya katabooh yabga.
Wa khalaas kula talaamiizah khallooh wa jaro.
57 Wa l-naas al-karabo Isa waddooh fi beet Gayaafa kabiir rujaal al-diin.
Al-ulama wa l-chuyuukh lammo fi beetah wa gaaʼidiin yarjoohum.
58 Wa Butrus taabaʼah min baʼiid lahaddi beet hana kabiir rujaal al-diin wa andassa wa gaʼad tihit been al-askar achaan yichiif al-cheyy al-yabga.
Al-Masiih giddaam al-Majlis
59 Wa kubaaraat rujaal al-diin wa kulla naas hana l-majlis al-kabiir lammo wa achchaawaro.
Wa fattacho chuhuud kaddaabiin achaan yahkumu Isa be l-moot.
60 Wa chuhuud kaddaabiin katiiriin jo wa laakin ma ligo naas itneen al-kalaamhum waahid.
Wa baʼad wakit tawiil,
naaseen gammo
61 wa gaalo :
Al-naadum da gaal «
Ana nagdar nikassir Beet Allah wa fi talaata yoom nabniih battaan ».
62 Wa kabiir rujaal al-diin gamma wa saʼal Isa wa gaal :
Ma turudd le chahaadithum foogak walla ?
63 Wa Isa gaaʼid saakit bas.
Wa kabiir rujaal al-diin saʼalah battaan wa gaal :
Nihallifak be usum Allah al-Hayy.
Guul leena inta al-Masiih Ibn Allah walla ?
64 Wa Isa radda leyah wa gaal :
Misil inta gultah.
Wa nuguul leeku yoom waahid baji tichiifu Ibn al-Insaan fi kursi jamb Allah al-Gaadir fi nussah al-zeenaay wa tichiifuuh raakib fi l-sahaab jaayi min al-sama.
65 Wa kabiir rujaal al-diin gamma chagga khalagah min al-zaʼal wa gaal :
Khalaas !
Hu achrak.
Wa battaan ma nidooru chaahid aakhar.
Intu zaatku simiʼtu kalaam al-muchrik da.
66 Kharaarku chunu ?
Wa raddo leyah wa gaalo :
Hu khaati wa waajib leyah al-moot.
67 Wa bazzakho fi wijhah wa darabooh wa waahidiin chaddagooh
68 wa gaalo :
Ya l-Masiih,
hajji leena kalaam naazil min Allah wa guul leena yaatu al-darabaak.
Butrus nakar al-Masiih
69 Wa fi l-wakit daak,
Butrus gaaʼid fi l-hooch.
Wa khaddaama waahide jaat leyah wa gaalat :
Inta maʼa Isa al-Jaliili da.
70 Wa giddaam kulla l-naas Butrus nakarah wa gaal :
Kalaamki da ma naʼarfah.
71 Wa macha fi khachum al-hooch wa khaddaama aakhara kula chaafatah wa irifatah wa hajjat le l-naas al-gaaʼidiin hinaak wa gaalat :
Al-naadum da kula maʼa Isa al-min al-Naasira.
72 Wa taani marra Butrus nakar al-kalaam wa halaf wa gaal :
Ana ma naʼarif al-raajil da.
73 Wa baʼad chiyya,
al-naas al-waagfiin hinaak jo leyah wa gaalo :
Sahiih,
inta waahid minhum.
Naʼarfuuk achaan lisaanak misil lisaanhum.
74 Wa Butrus gamma yahlif wa gaal :
Khalli Allah yanʼalni kan kalaami ma sahiih.
Abadan ma naʼarif al-raajil da.