Wasaaya Allah wa aadaat al-naas
15
Wa waahidiin min al-ulama wa l-Fariisiyiin jo le Isa min Madiinat al-Khudus wa saʼalooh wa gaalo :
2 Maala talaamiizak ma yitaabuʼu aadaat al-juduud ?
Maala ma yikhassulu iideenhum be wadu al-juduud gubbaal ma yaakulu ?
3 Wa Isa radda leehum wa gaal :
Wa intu maala tiriidu aadaatku lahaddi taabo ma titaabuʼu wasaaya Allah ?
4 Allah amaraana wa gaal <Karrim ammak wa abuuk>
wa <Ayyi naadum al-yuguul kalaam fasil fi ammah walla abuuh,
waajib yaktuluuh>.
5 Wa laakin intu tuguulu :
Kan naadum hajja le ammah wa abuuh wa gaal «
Kulla cheyy al-awwal saaʼadtuku beyah ana anteetah le Beet Allah »,
6 khalaas al-naadum da ma waajib yisaaʼid ammah wa abuuh.
Wa misil da battaltu wasaaya Allah achaan titaabuʼu aadaatku.
7 Ya munaafikhiin!
Kalaam Allah al-nabi Ichaʼya gaalah foogku sahiih.
Hu gaal
8 <Al-naas dool yikarrumuuni be khuchuumhum wa laakin fi guluubhum ma yiriiduuni.
9 Wa sujuudhum leyi baatil wa kula taʼaaliimhum da wasaaya al-naas bas>.
Al-yisawwi naadum ma taahir
10 Wa Isa naada kulla l-naas wa gaal leehum :
Asmaʼo kalaami wa afhamooh.
11 Al-cheyy al-yisawwi naadum ma taahir,
hu ma al-cheyy al-yadkhul fi khachmah laakin al-cheyy al-yamrug min khachmah,
da bas yisawwi naadum ma taahir.
12 Wa talaamiizah jo leyah wa gaalo :
Ma taʼarif al-Fariisiyiin ziʼilo min al-kalaam da walla ?
13 Wa radda leehum wa gaal :
Ayyi khadaar al-abuui Allah ma teerabah yinmalit.
14 Khalluuhum.
Humman amyaaniin wa yuguudu al-amyaaniin.
Kan naadum amyaan yuguud amyaan aakhar,
kulluhum yagaʼo fi nugra.
15 Wa Butrus gaal leyah :
Fassir leena al-masal al-awwal da.
16 Wa Isa radda leyah wa gaal :
Intu kula lissaaʼ ma fihimtu walla ?
17 Al-akil al-dakhal fi khachmak yamchi fi batnak wa baʼadeen yamrug min jildak.
Da lissaaʼ ma fihimtuuh walla ?
18 Wa laakin al-kalaam al-yamrug min khachum al-naadum baji min galbah wa l-kalaam da yisawwiih ma taahir.
19 Achaan min galib al-naadum yamrug al-fikir al-cheen wa l-katil wa l-zina wa l-fasaala wa l-sirge wa l-chahaada be l-kidib wa kalaam al-kufur.
20 Wa dool bas al-yisawwu al-naadum ma taahir wa laakin kan naadum ma khassal iideenah wa akal,
da abadan ma yisawwiih ma taahir.
Iimaan al-mara al-Kanʼaaniiye
21 Wa Isa faat min al-bakaan da wa macha fi balad hana Suur wa Seeda fi Lubnaan.
22 Wa mara min al-Kanʼaaniyiin jaat wa sarakhat leyah wa gaalat :
Sayyidna,
Ibn Dawuud,
arhamni !
Bineeyti gaaʼide fi azaab chadiid achaan hi chootanat.
23 Wa Isa ma gaal leeha cheyy wa talaamiizah jo leyah wa hannasooh wa gaalo :
Asmaʼ kalaamha wa rudd leeha achaan hi jaaye waraana wa tisawwi leena haraka katiire.
24 Wa Isa gaal leeha :
Allah rassalaani le Bani Israaʼiil bas wa humman khanam Allah al-muwaddiriin.
25 Wa laakin al-mara garrabat leyah wa sajadat wa gaalat :
Sayyidna,
aawinni.
26 Wa radda leeha be masal wa gaal :
Akil al-iyaal da,
kan nantuuh le l-kulaab da ma sameh.
27 Wa gaalat :
Kalaamak da sahiih,
sayyidna.
Wa laakin al-kulaab kamaan yaakulu al-yidaffig min maaʼuun siyaadhum.
28 Wa Isa radda leeha wa gaal :
Ya mara,
iimaanki chadiid marra waahid !
Khalli yabga leeki misil dawwartih.
Wa bineeytha ligat al-aafe min al-wakit daak.
Al-Masiih anta akil le arbaʼa alif naas
29 Wa Isa macha min al-daar di be derib hana bahar al-Jaliil wa talaʼ fi hajar wa gaʼad tihit.
30 Wa naas katiiriin marra waahid jaayiin leyah wa jaabo maʼaahum al-uruj wa l-mukarsahiin wa l-amyaaniin wa l-bukum wa aakhariin katiiriin wa khattoohum giddaamah wa Isa daawaahum.
31 Wa l-naas ajjabo bilheen wakit chaafo al-naas al-bukum bihajju wa l-mukarsahiin ligo al-aafe wa l-uruj raaykhiin wa l-amyaaniin chaayfiin.
Wa chakaro Allah Rabb hana Israaʼiil.
32 Wa laakin Isa naada talaamiizah wa gaal :
Indi fi galbi mahanna le l-naas dool,
achaan humman gaaʼidiin maʼaayi min talaata yoom wa ma induhum cheyy yaakuluuh.
Wa ma nidoor nikhalliihum yufuut jiiʼaaniin achaan gudrithum chiyya wa akuun ma yalhago buyuuthum.
33 Wa l-talaamiiz gaalo :
Al-naas katiiriin bilheen.
Ween nalgo leehum akil fi l-khala da ?
34 Wa Isa saʼalaahum wa gaal :
Induku kam khubza ?
Wa raddo leyah wa gaalo :
Sabʼa.
Wa indina huut dugaag chiyya.
35 Wa Isa amaraahum le l-naas achaan yagoodu tihit.
36 Wa chaal al-khubzaat al-sabʼa wa l-huut wa chakar Allah wa kassaraahum wa antaahum le l-talaamiiz wa humman gassamooh le l-naas.
37 Wa kulla l-naas akalo lahaddi chibʼo.
Wa l-talaamiiz lammo al-akil al-faddal wa malo beyah sabʼa gufaf.
38 Wa adad al-naas al-akalo tamma arbaʼa alif raajil.
Wa awiin wa iyaal kula akalo.
39 Wa Isa gaal le l-naas khalli yamchu wa khalaas rikib fi l-markaba wa macha fi daar Majdaan.