Moot al-nabi Yahya
14
Wa fi l-wakit daak,
Hiruudus muhaafiz daar al-Jaliil simiʼ khabar hana Isa.
2 Wa gaal le khaddaamiinah :
Da Yahya al-Mukhattis !
Hu baʼas min al-maytiin !
Achaan da bas al-gudra al-ajiibe di gaaʼide foogah.
3 Wa awwal,
Hiruudus karab Yahya fi l-sijin wa rabatah be janaaziir fi chaan zawjitah Hiruudiiya.
Awwal hi marit Filibbus akhuuh le Hiruudus
4 wa Yahya gaal leyah :
Ma halaal leek taakhudha.
5 Wa Hiruudus dawwar yaktul Yahya laakin hu khaayif min zaʼal al-naas achaan fi fikirhum Yahya nabi.
6 Wa laakin yoom hool mawlid Hiruudus,
gaaʼidiin yiʼayyudu wa bineeyit Hiruudiiya liʼibat giddaamhum wa Hiruudus farhaan bilheen minha.
7 Wa halaf bantiiha ayyi cheyy al-tidoorah.
8 Wa l-bineeye awwal chaawarat ammaha wa baʼad da gaalat :
Antiini raas Yahya al-Mukhattis wa jiibah leyi hini fi sufra.
9 Wa l-malik nidim le kalaamah wa laakin amarahum le askarah yijiibu raas Yahya ajala achaan halaf giddaam kula diifaanah.
10 Wa rassal askar fi l-sijin wa gataʼo raas Yahya.
11 Wa jaabo al-raas fi sufra wa antooh le l-bineeye wa hi waddatah le ammaha.
12 Wa talaamiiz Yahya jo wa chaalo janaaztah wa dafanooh wa khalaas macho ooro Isa.
Al-Masiih anta akil le khamsa alif naas
13 Wa Isa simiʼ al-khabar da wa rikib fi l-markaba wa macha wiheedah fi bakaan ma foogah naas.
Wa laakin naas katiiriin simʼo hu macha hinaak wa marago min hillaalhum wa macho waraayah be rijileenhum.
14 Wa wakit Isa dalla min al-markaba fi khachum al-bahar,
hu chaaf naas katiiriin bilheen gaaʼidiin yarjooh wa hanna fooghum wa daawa al-mardaaniin al-maʼaahum.
15 Wa wakit al-achiiye bigat,
al-talaamiiz jo leyah wa gaalo :
Al-bakaan da khala wa l-wakit akhkhar.
Khalaas,
khalli al-naas yamchu fi l-hillaal wa yibiiʼu cheyy yaakuluuh.
16 Wa Isa gaal le talaamiizah :
Ma waajib leehum yamchu.
Intu bas antuuhum akil.
17 Wa gaalo :
Ma indina cheyy illa khamsa khubza wa huut itneen.
18 Wa Isa gaal leehum :
Jiibuuhum leyi hini.
19 Wa hajja le kulla l-naas wa gaal :
Agoodu tihit fi l-gechch.
Wa chaal al-khubzaat al-khamsa wa l-huut al-itneen wa rafaʼ raasah le l-sama wa chakar Allah wa kassar al-khubzaat wa antaahum le talaamiizah wa gassamoohum le l-naas.
20 Wa kulla l-naas akalo.
Wa chibʼo lahaddi faddalo.
Wa l-talaamiiz lammo al-akil al-faddal wa malo beyah atnaachar guffa.
21 Wa adad al-naas al-akalo tamma misil khamsa alif rujaal.
Wa awiin wa iyaal kula akalo.
Al-Masiih raakh fi raas al-almi
22 Wa Isa amaraahum le talaamiizah yarkabo fi l-markaba achaan yagtaʼo al-bahar giddaamah.
Wa hu gaaʼid fi khachum al-bahar achaan yidoor yuguul le l-naas khalli yamchu.
23 Wa wakit al-naas macho khalaas,
Isa talaʼ fi raas al-hajar achaan yisalli wiheedah.
Wa baʼad al-makharib,
hu gaaʼid hinaak wiheedah.
24 Wa markabat al-talaamiiz lihgat ust al-bahar wa l-riih gaaʼide tusuug min giddaamhum wa l-almi gaaʼid bibarjil al-markaba.
25 Wa be waradde,
Isa ja leehum raayikh fi raas al-almi.
26 Wa wakit al-talaamiiz chaafo Isa raayikh fi raas al-almi,
khaafo bilheen wa gaalo :
Da dull!
28 Wa Butrus gaal leyah :
Sayyidna !
Kan sahiih daahuuk inta,
khalaas naadiini achaan naji leek raayikh fi raas al-almi.
29 Wa Isa gaal leyah :
Taʼaal.
Wa Butrus dalla min al-markaba wa bada yamchi le Isa raayikh fi raas al-almi.
30 Wa laakin wakit Butrus hassa gudrat al-riih,
hu khaaf bilheen wa bada yatmus.
Wa sarakh wa gaal :
Sayyidna !
Najjiini !
31 Wa Isa madda iidah ajala wa karabah wa gaal :
Iimaanak lissaaʼ daʼiif.
Maala chakkakt ?
32 Wa wakit rikbo fi l-markaba khalaas,
al-riih wigfat.
33 Wa fi l-markaba al-talaamiiz jo sajado leyah wa gaalo :
Sahiih,
inta Ibn Allah.