Jawaabaat al‑rasuul Butrus
Al‑jawaab al‑awwal
Mugaddima
Butrus hu waahid min al‑talaamiiz al‑atnaachar al‑azalaahum Isa al‑Masiih le yabgo rusulah. Wa l‑rasuul Butrus katab al‑jawaab da be izin Allah wa be gudrat al‑Ruuh al‑Khudduus.
Wa hu katab al‑jawaab da le l‑Masiihiyiin al‑gaaʼidiin fi khamsa manaatig fi Aasiya, al‑haaliiyan Turkiya. Wa l‑naas dool gaaʼidiin yiʼazzubuuhum wa yitaʼʼubuuhum be sabab iimaanhum be l‑Masiih. Wa Butrus katab leehum achaan yichajjiʼhum le yitaabuʼu al‑Masiih wa yiʼiichu be haal saalhe wa yahmalo al‑taʼab fi chaan al‑Masiih. Wa yizakkirhum kadar humman misil ajaanib fi l‑buldaan dool achaan iimaanhum. Wa baʼadeen, yichtaruku maʼa l‑Masiih fi majdah misil achtarako maʼaayah fi l‑taʼab.
Wa Butrus wassaf leehum kikkeef yagdaro yiʼiichu maʼa naas al‑ma muʼminiin wa maʼa l‑muʼminiin kula. Hatta kan humman min gabaayil wa buldaan chig chig kula, humman bigo waahid fi Isa al‑Masiih be sabab iimaanhum.
Wa Butrus amar al‑muʼminiin achaan yihtarumu al‑hukkaam wa yasmaʼo kalaamhum. Wa hu yichajjiʼ al‑abiid wa l‑awiin le yiwassufu iimaanhum be l‑Masiih be haalhum al‑adiile maʼa siidhum aw maʼa rujaalhin kan ma muʼminiin kula. Wa hu naada kulla l‑Masiihiyiin achaan yihtarumu al‑waahidiin le l‑aakhariin. Wa be da, yijiibu le l‑Masiih al‑naas al‑ma muʼminiin beyah.
Khalli Allah yibaarik ayyi naadum al‑yagri al‑kalaam da wa yaftah galbah achaan yakrub al‑kalaam wa yitaabiʼah fi ayyi haal. Aamiin.